ខេត្តកណ្ដាល៖ សមត្ថកិច្ចនគរបាលខេត្តកណ្តាល កំពុងតាមចាប់ខ្លួនជនសង្ស័យ ៣ នាក់ ពាក់ព័ន្ធករណីរក្សាទុកអាវុធខុសច្បាប់ ខណៈស្ត្រីម្នាក់ត្រូវបានបញ្ជូនទៅតុលាការពាក់ព័ន្ធករណីជួញដូរគ្រឿងញៀន។
លោក មាន សំណាង អធិការនគរបាលស្រុកអង្គស្នួលខេត្តកណ្ដាល បានឲ្យដឹងនៅថ្ងៃទី ១៨ មេសានេះថា សមត្ថកិច្ចកំពុងតាមចាប់ខ្លួនជនសង្ស័យ ៣ នាក់ បន្ទាប់ពីបានរកឃើញថា មានរក្សាទុកអាវុធខុសច្បាប់។
លោកថ្លែងថា៖ «ជនសង្ស័យទាំង ៣ នាក់នោះ យើងបានស្គាល់អត្តសញ្ញាណអស់ហើយ ពេលនេះយើងកំពុងធ្វើសាវតារ ដាក់កម្លាំងតាមចាប់ខ្លួនមកផ្តន្ទាទោសតាមច្បាប់ ចំណែកស្ត្រីពាក់ព័ន្ធករណីគ្រឿងញៀនបានបញ្ជូនទៅតុលាការហើយ»។
តាមរបាយការណ៍របស់សមត្ថកិច្ចស្រុកបានបញ្ជាក់ថា ជនសង្ស័យទាំង ៣ នាក់ មានទី១ ឈ្មោះ ពែល មី ភេទប្រុស អាយុ ២០ ឆ្នាំ រស់នៅភូមិត្រពាំងត្បែង ឃុំសំរោងលើ ស្រុកអង្គស្នួល។ ទី២ ឈ្មោះ ធីម ឌឿន (ហៅពែក) ភេទប្រុស អាយុ ២១ ឆ្នាំ មានលំនៅក្នុងភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរមិនពិតប្រាកដ ហើយឈ្មោះនេះក៏ស្ថិតក្នុងដីកាបង្គាប់ឱ្យចាប់ខ្លួនពីបទជួញដូរដោយខុសច្បាប់នូវសារធាតុញៀនផងដែរ។ ចំណែកជនសង្ស័យទី៣ មានឈ្មោះ សល់ រស្មី ភេទប្រុស អាយុ ២១ ឆ្នាំ មានលំនៅក្នុងភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរមិនពិតប្រាកដ។
ចំណែកវត្ថុតាងដែលរឹបអូសរួមមាន ១- អាវុធម៉ាក Ak ស្វាយបត់ចំហៀង ១ ដើម បង់ ១ មានគ្រាប់ ២៧ គ្រាប់។ ២- អាវុធម៉ាក AK កាត់ស្វាយ ១ ដើម បង់ ១ មានគ្រាប់ ៣០ គ្រាប់ ។ ៣- អាវុធខ្លីម៉ាក ប្រាហា ១ ដើម បង់ ១ មានគ្រាប់ ៦ គ្រាប់ និងស្រោមអាវុធ ១។ ៤- អាវុធច្នៃប្រើខ្យល់បាញ់គ្រាប់កង់ ៣ ដើម។ ៥- ដាវ ១ ដើម ពូថៅដៃដងឈើ ១ កាំបិតប៉័ងតោ ១ និងកន្ត្រៃ ១។ ៦- ថ្នាំញៀនប្រភេទម៉ាទឹកកក ១ កញ្ចប់ធំ ថ្នាំញៀនប្រភេទ WY ២ គ្រាប់ និងឧបករណ៍ប្រើប្រាស់វេចខ្ចប់ថ្នាំញៀនមួយចំនួនទៀត។
លោក មាន សំណាង បានបញ្ជាក់ថា វត្ថុតាងទាំងអស់ត្រូវបានសមត្ថកិច្ចកសាងសំណុំរឿងបញ្ជូនទៅតុលាការរួចហើយ ប៉ុន្តែលោកមិនបានបញ្ជាក់ច្បាស់ថា បញ្ជូនទៅពីពេលណាទេ។
កាលពីថ្ងៃទី ១៦ ខែមេសា សមត្ថកិច្ចនគរបាលប៉ុស្តិ៍រដ្ឋបាលសំរោងលើ បានសហការជាមួយនគរបាលជំនាញស្រុកអង្គស្នួល ខេត្តកណ្តាល ក្រោមការសម្របសម្រួលពីស្ថាប័នអយ្យការសាលាដំបូងខេត្ត ចុះទៅឆែកឆេរលំនៅឋាន ១ កន្លែងរបស់ឈ្មោះ ពែល មី ស្ថិតក្នុងភូមិត្រពាំងត្បែង ដោយបានរកឃើញអាវុធអាកា ២ ដើម អាវុធខ្លី ១ ដើម អាវុធកែច្នៃ ៣ ដើម រួមនឹងសម្ភារខុសច្បាប់មួយចំនួនក្នុងនោះក៏មានទាំងថ្នាំញៀនផងដែរ។ នេះបើតាមប្រព័ន្ធផ្សព្វផ្សាយក្នុងស្រុក។
ការឆែកឆេនេះធ្វើឡើងក្រោយពីនគរបាលរដ្ឋបាលឃុំសំរោងលើទទួលបានសេចក្តីរាយការណ៍ថា ឈ្មោះ សល់ រស្មី (ត្រូវជាក្មួយបង្កើត) បានយកកាំភ្លើងកែច្នៃ (ប្រើខ្យល់ដាក់ហ្គាស់បាញ់គ្រាប់កង់) គំរាមថា បាញ់សម្លាប់ ដើម្បីសុំលុយ ៥ ០០០ រៀល។
បន្ទាប់ពីស្រាវជ្រាវសមត្ថកិច្ចបានដឹងថា ជនសង្ស័យទាំង ៣ នាក់ កំពុងលាក់ខ្លួននៅផ្ទះរបស់ ពែល មី ប៉ុន្តែជនសង្ស័យទាំងនោះបានរត់គេចខ្លួន មុនពេលសមត្ថកិច្ចទៅដល់។ ពេលនោះសមត្ថកិច្ចបានអញ្ជើញស្ត្រីម្នាក់ ឈ្មោះ សាឡយ វិច្ឆិកា អាយុ ១៦ ឆ្នាំ មុខរបរមិនពិតប្រាកដ ត្រូវជាប្រពន្ធរបស់ជនសង្ស័យឈ្មោះ ពែល មី ទៅកាន់អធិការដ្ឋាននគរបាលស្រុក ដើម្បីសាកសួរ។
តាមឈ្មោះ សាឡយ វិច្ឆិកា បានឆ្លើយប្រាប់សមត្ថកិច្ចថា ខ្លួនជាអ្នកលក់ថ្នាំញៀន ចំណែកអាវុធជាវត្ថុតាងទាំងនោះត្រូវបានឈ្មោះ ពែល មី ជាអ្នកយកមកលាក់ទុក៕