.jpg)
គ្រូពេទ្យពិនិត្យសាកសពស្រ្តីរងគ្រោះ ដែលប្ដីវាយប្រពន្ធបណ្ដាលឲ្យស្លាប់។ រូបថត នគរបាល
កណ្ដាលៈ នគរបាលស្រុកស្អាងកំពុងតាមចាប់ខ្លួនជនសង្ស័យម្នាក់ករណីវាយប្រពន្ធបណ្តាលឲ្យស្លាប់ពេលបញ្ជូនដល់មន្ទីរពេទ្យកាលពីថ្ងៃទី ១០ ឧសភា នៅក្នុងភូមិព្រែកខ្មែរ ឃុំស្អាងភ្នំ ស្រុកស្អាង ខេត្តកណ្តាល។
លោក រស់ ចន្ថា អធិការនគរបាលស្រុកស្អាងប្រាប់ពីម្សិលមិញថា ជនសង្ស័យ ឈ្មោះជួន សារ៉ន អាយុ ៣៧ ឆ្នាំ។ រីឯស្ត្រីរងគ្រោះឈ្មោះ នី ឡេហ្សា អាយុ ២២ ឆ្នាំជាកម្មការិនីរោងចក្រ។ ពួកគេរស់នៅភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាល។ ជនសង្ស័យបានគេចខ្លួនបន្ទាប់ពីវាយប្រពន្ធស្លាប់។
លោកថា៖ «ករណីនេះសមត្ថកិច្ចខ្ញុំកំពុងតាមចាប់ជនសង្ស័យហើយយើងកំពុងដុតដៃដុតជើងធ្វើការងារនេះ»។
លោក លន ចាន់ថា នាយនគរបាលប៉ុស្តិ៍ឃុំស្អាងភ្នំបានថ្លែងពីម្សិលមិញថាករណីនេះសមត្ថកិច្ចមិនទាន់អាចសន្និដ្ឋានបានថា មកពីមូលហេតុអ្វីទេ ប៉ុន្តែសាច់ញាតិស្ត្រីរងគ្រោះបានប្រាប់សមត្ថកិច្ចថា ប្តីប្រពន្ធនេះទើបតែធ្វើសំបុត្រលែងលះប្រហែល ១ ខែមុនថ្ងៃកើតហេតុ។
លោកបានបន្ថែមថា តាមសាក្សីមុនពេលកើតហេតុនៅម៉ោងជាង ៤ រសៀលថ្ងៃ ១០ ឧសភា គេឃើញស្ត្រីរងគ្រោះជិះម៉ូតូម្នាក់ឯងដល់ផ្លូវបេតុងចូលវត្តស្អាងភ្នំ ក្នុងភូមិព្រែកខ្មែរ ឃុំស្អាងភ្នំ ស្រុកស្អាង។ ពេលនោះស្រាប់តែគេឃើញប្តីស្ត្រីនោះជិះម៉ូតូតាមហើយបើកម៉ូតូកៀរម៉ូតូស្ត្រីរងគ្រោះបណ្តាលឲ្យដួល និងបានវាយស្ត្រីរងគ្រោះត្រូវដើមទ្រូង ១ ដៃដួលផ្កាប់មុខ ហើយត្រូវសាច់ញាតិដឹកយកមន្ទីរពេទ្យស្រុក ប៉ុន្តែជនរងគ្រោះស្លាប់បន្ទាប់ពីបញ្ជូនដល់មន្ទីរពេទ្យ។
ជុំវិញករណីនេះសមត្ថកិច្ចនគរបាលស្រុកស្អាងភ្នំម្នាក់សុំមិនឲ្យបញ្ចេញឈ្មោះបានឲ្យដឹងថា បើតាមសាច់ញាតិស្ត្រីរងគ្រោះថា មុនកើតហេតុ ១ ខែប្ដីប្រពន្ធនេះបានឈ្លោះគ្នាដោយប្ដីចោទប្រពន្ធថាមានទំនាក់ទំនងជាមួយបុរសផ្សេង។
រីឯលោក ស វិចិត្រ មេឃុំស្អាងភ្នំឲ្យដឹងថា ប្តីប្រពន្ធនេះមានកូន ២ នាក់ប្រុសម្នាក់ និងស្រីម្នាក់ តែលោកមិនដឹងពីអាយុកូនៗនោះទេ។ លោកថា អំឡុងខែមេសា ពួកគេបានទៅសុំធ្វើលិខិតលែងលះគ្នានៅឃុំស្អាងភ្នំ ប៉ុន្តែអាជ្ញាធរឃុំមិនបានសម្រេចទេ។
លោកបន្តថា៖ «កាលណាគេប្តឹង យើងហៅគាត់ទាំងសងខាងសម្រុះសម្រួលគ្នាហើយបើឯកភាពថាជានាគ្នាវិញយើងធ្វើជាកិច្ចសន្យាបញ្ជាក់ថារួមរស់ជាមួយគ្នាវិញ។ អាហ្នឹងយើងចុះហត្ថលេខាឲ្យ»។
លោកថា ការលែងគ្នាគឺអាជ្ញាធរឃុំគ្មានសិទ្ធិចុះហត្ថលេខាឲ្យទេ តែបើពួកគាត់នៅតែលែងលះគ្នាគឺជារឿងរបស់ពួកគាត់៕
