.jpg)
រថយន្តដែលជួបគ្រោះថ្នាក់ចរាចរណ៍នៅស្រុកបវេល ខេត្តបាត់ដំបងពីថ្ងៃទី ២៤ ខែឧសភា។ រូបថត សហការី
បាត់ដំបងៈ សមត្ថកិច្ចកំពុងស្រាវជ្រាវរកអត្តសញ្ញាណ បុរសម្នាក់ដែលបើកបររថយន្ត បុកម៉ូតូ និងបន្តទៅបុករថយន្ត ១ គ្រឿងទៀត ធ្វើឱ្យក្មេងស្រី ២ នាក់ និងស្ត្រីចំណាស់ម្នាក់ស្លាប់ ខណៈបុរសម្នាក់ទៀតបានរងរបួសធ្ងន់នៅតាមបណ្តោយផ្លូវ ៥៧B ក្នុងភូមិស្វាយជ្រំ ឃុំ-ស្រុក បវេល ខេត្តបាត់ដំបង កាលពីល្ងាចថ្ងៃទី ២៤ ឧសភា។
លោក ចាន់ សុធី ប្រធានការិយាល័យចរាចរណ៍នៃស្នងការដ្ឋាននគរបាលខេត្តបាត់ដំបងឱ្យដឹងនៅថ្ងៃទី ២៥ ឧសភា ថា ក្មេងរងគ្រោះស្លាប់ទី១- ឈ្មោះ រ៉ាន់ សាន់ ភេទ ស្រី អាយុ ១៨ ឆ្នាំ ទី២- អ៊ុល សេង ភេទ ស្រី អាយុ ១៦ ឆ្នាំ ពួកគេរស់នៅក្នុងភូមិដូនអាវ ឃុំ-ស្រុកបវេល ខេត្តបាត់ដំបង។
ចំណែកភាគីរថយន្តនីស្សាន់មានស្រីម្នាក់ស្លាប់ឈ្មោះ កុយ អេង អាយុ ៥២ ឆ្នាំ និងប្តីរបួសធ្ងន់។ ជនរងគ្រោះទាំង ២ នាក់ប្តីប្រពន្ធរស់នៅភូមិបវេល ១ ឃុំ-ស្រុកបវេល ខេត្តបាត់ដំបង។
លោកថ្លែងថា៖ «ករណីនេះយើងកំពុងស្រាវជ្រាវដើម្បីកំណត់អត្តសញ្ញាណជនល្មើសជាម្ចាស់រថយន្ត LEXUS ដើម្បីនាំខ្លួនជននេះចូលខ្លួនមកដោះស្រាយតាមច្បាប់ជាមួយជនរងគ្រោះ ព្រោះបុរសម្ចាស់រថយន្តនោះជាអ្នកបង្កហេតុ»។
ទោះយ៉ាងណាបើតាមលោក វរសេនីយ៍ឯក សុខ សារិន អធិការនគរបាលស្រុកបវេលប្រាប់តាមសាក្សី ដែលឃើញហេតុការណ៍ថា ដំបូងឡើយគេបានឃើញរថយន្ត ១ គ្រឿង ម៉ាក LEXUS LS400 ពណ៌ខ្មៅពាក់ស្លាកលេខភ្នំពេញ 2AX-9396 បើកបរដោយបុរសម្នាក់បើកបរពីលិចក្នុងភូមិសាស្ត្រស្រុកបវេល ទៅទិសកើតដែលទំនងសំដៅទៅទីរួមខេត្តបាត់ដំបង។
ដោយសាររថយន្ត LEXUS នោះបើកក្នុងល្បឿនលឿន ក៏រេចង្កូតទៅបុកពីក្រោយម៉ូតូ ១ គ្រឿង របស់ក្មេងស្រីរងគ្រោះដែលជិះឌុបគ្នា ក្នុងទិសដៅស្របគ្នាពេញមួយទំហឹងតែម្តង។
គេបានឃើញក្មេងរងគ្រោះទាំង ២ នាក់ ត្រូវរថយន្តបុកប៉ើង ហើយរថយន្តបង្កបានបុករុញម៉ូតូក្មេងរងគ្រោះទៅបុកផ្អឹបនឹងរថយន្តម៉ាកនីស្សាន់ ១ គ្រឿងទៀត ដែលបើកបញ្ច្រាសទិសគ្នា (ពីទិសខាងកើតទៅលិច) បណ្តាលឱ្យរថយន្តនីស្សាន់ ១ គ្រឿងនោះ ក្រឡាប់ធ្លាក់ផ្លូវខាងស្តាំដៃជាច្រើនត្រឡប់ធ្វើឱ្យស្ត្រីចំណាស់ម្នាក់ត្រូវកៀបនឹងដែករថយន្តបណ្តាលឱ្យស្លាប់ភ្លាមៗនៅកន្លែងកើតហេតុ។
រីឯបុរសជាប្តីអ្នកបើករថយន្តរបួសធ្ងន់ត្រូវបានដឹកទៅសង្គ្រោះបន្ទាន់ នៅមន្ទីរពេទ្យបង្អែកខេត្តបាត់ដំបង។
លោកបន្តថា ក្រោយកើតហេតុ ពលរដ្ឋបានរាយការណ៍ទៅនគរបាលប៉ុស្តិ៍ឃុំបវេល ហើយនគរបាលឃុំបានរាយការណ៍ប្រាប់សមត្ថកិច្ច ដើម្បីចុះជួយអន្តរាគមន៍បន្ទាន់ក្នុងការជួយសង្គ្រោះជនរងគ្រោះ។ ភ្លាមៗនោះដែរ លោកក៏បានរាយការណ៍ទៅជំនាញផ្នែកចរាចរណ៍ខេត្តបាត់ដំបង ដើម្បីចុះវាស់វែងធ្វើកំណត់ហេតុបញ្ជូនទៅតុលាការ ខណៈអ្នកដែលបើកបររថយន្តបង្កឱ្យមានគ្រោះថ្នាក់ចរាចរណ៍នេះបានរត់គេចខ្លួនបាត់។
លោកប្រាប់ថា៖ «សមត្ថកិច្ចស្រុកបវេលយើង គ្រាន់តែទៅជួយសហការ ដើម្បីសម្រួលបញ្ហា តែខាងខេត្តគាត់ជាអ្នកអនុវត្តនីតិវិធីច្បាប់។ រថយន្ត LEXUS ជាអ្នកបង្កក្នុងគ្រោះថ្នាក់ចរាចរណ៍នេះ»។
លោក សុខ សារិន បញ្ជាក់ថា ចំពោះវត្ថុតាងរថយន្តទាំង ២ គ្រឿង និងម៉ូតូក្មេងស្រីរងគ្រោះ ត្រូវបានមន្ត្រីចរាចរណ៍ខេត្តដឹកយកទៅរក្សាទុកនៅការិយាល័យចរាចរណ៍នៃស្នងការនគរបាលខេត្តបាត់ដំបងហើយ ដើម្បីរង់ចាំម្ចាស់រថយន្ត LEXUS បង្កហេតុចូលខ្លួនដោះស្រាយតាមផ្លូវច្បាប់។
ចំណែកសាកសពត្រូវបានសមត្ថកិច្ច ប្រគល់ជូនក្រុមគ្រួសារយកទៅធ្វើបុណ្យតាមប្រពៃណីរៀងៗខ្លួន៕
