ភ្នំពេញ: មន្ត្រីជំនាញអគ្គនាយកដ្ឋានអន្តោប្រវេសន៍បាននិងកំពុងសាកសួរ និងធ្វើកំណត់ហេតុលើជនជាតិចិន ២៨ នាក់ បន្ទាប់ពីឃាត់ខ្លួនកាលពីថ្ងៃទី ១២ ខែ មិថុនា ពាក់ព័ន្ធករណីលួចឆ្លងដែនមកស្នាក់នៅនិងធ្វើការនៅកម្ពុជាខុសច្បាប់ដោយគ្មានលិខិតឆ្លងដែន ប៉ុន្ដែមន្ត្រីមិនដឹងពេលវេលាត្រូវបញ្ជូនទៅប្រទេស ចិន វិញទេ។
លោក អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធីនៃអគ្គនាយកដ្ឋានអន្តោប្រវេសន៍បានឲ្យដឹងថា សមត្ថកិច្ចជំនាញកំពុងបន្តសួរនិងធ្វើកំណត់ហេតុលើសំណុំរឿងនេះដោយមួយចំនួនមានលិខិតឆ្លងដែនប៉ុន្ដែគ្មានសៀវភៅការងារ និងមួយចំនួនទៀត គ្មានលិខិតអ្វីទាំងអស់។
ក្នុងនោះក៏មានជនជាតិចិន ១០ នាក់ បានយកឯកសារ (លិខិតឆ្លងដែន និងលិខិតស្នាក់នៅ) មកបញ្ជាក់ជាបន្តបន្ទាប់ដែរ។
លោកថា៖ «ឥឡូវនេះ មានអ្នកខ្លះយកលិខិតឆ្លងដែនមកបង្ហាញសមត្ថកិច្ចយើងបន្តបន្ទាប់ហើយ ឥឡូវកំពុងបន្តពិនិត្យមើលឯកសារទាំងនេះ ប្រសិនបើគាត់មកត្រឹមត្រូវតាមច្បាប់ គឺយើងអនុញ្ញាតឲ្យគាត់នៅ ហើយអ្នកគ្មានសៀវភៅការងារក៏យើងពិន័យគាត់ដែរ។ អ៊ីចឹង លុះត្រាតែគាត់បំពេញលក្ខខណ្ឌការងារត្រឹមត្រូវតាមច្បាប់យើង»។
លោកបន្ថែមថា លើសពីនេះ បើពួកគេមិនមានឯកសារបញ្ជាក់ទេ សមត្ថកិច្ចនឹងជូនដំណឹងទៅស្ថានទូតចិនប្រចាំកម្ពុជាដើម្បីយកទៅប្រទេសចិនវិញប៉ុន្តែលោកថា មិនទាន់អាចបញ្ជាក់ពី ពេលវេលាបាននៅឡើយទេ។
លោក ទៀង ច័ន្ទសារ អធិការនគរបាលខណ្ឌដូនពេញបានថ្លែងពីម្សិលមិញថា សមត្ថកិច្ចលោកបានសហការជាមួយអគ្គនាយកដ្ឋានអន្តោប្រវេសន៍ និងស្នងការដ្ឋាននគរបាលរាជធានីភ្នំពេញ ដើម្បីចុះឆែកឆេរទីតាំងការងារ និងកន្លែងស្នាក់នៅរបស់ជនជាតិចិនទាំងនេះ ប៉ុន្ដែរបាយការណ៍ផ្សេងៗ លោកបានប្រគល់ជូនអគ្គនាយកដ្ឋានអន្តោប្រវេសន៍ទាំងអស់ហើយ។
លោកបញ្ជាក់ថា៖ «កម្លាំងខ្ញុំគ្រាន់តែសហការជាមួយកម្លាំងជំនាញផ្សេងទេ។អ៊ីចឹងរបាយការណ៍ឬកំណត់ហេតុអ្វីផ្សេងៗសួរទៅអគ្គនាយកដ្ឋានអន្តោប្រវេសន៍ព្រោះជាជំនាញគាត់»។
តាមរបាយការណ៍របស់អគ្គនាយកដ្ឋានអន្តោប្រវេសន៍បានបង្ហាញកាលពីថ្ងៃទី ១២ មិថុនាថា ប្រតិបត្តិការនេះមានការសម្របសម្រួលពីលោក ខាំ សុផារី ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញដោយចុះត្រួតពិនិត្យការដ្ឋានសំណង់ នៅតាមបណ្តោយផ្លូវលេខ ១០០ ក្នុងសង្កាត់វត្តភ្នំ ខណ្ឌដូនពេញ។
របាយការណ៍ដដែលឲ្យដឹងថា ក្នុងប្រតិបត្តិការនេះបានរកឃើញកម្មករ ៤០ នាក់ ស្រី ៥ នាក់ ក្នុងនោះមានជនជាតិចិន ២៨ នាក់។ ជាលទ្ធផលនៃការសាកសួរជនជាតិចិនទាំង ២៨ នាក់ នោះគឺមាន ១៩ នាក់ មានលិខិតឆ្លងដែន (គ្មានប័ណ្ណការងារ) និងចំនួន ៩ នាក់ មិនមានលិខិតឆ្លងដែន។
បើតាមរបាយការណ៍ ជនជាតិចិន ៩ នាក់ ដែលគ្មានលិខិតឆ្លងដែនត្រូវបានយកមកអគ្គនាយកដ្ឋានអន្តោប្រវេសន៍ រីឯលិខិតឆ្លងដែនរបស់អ្នកគ្មានប័ណ្ណការងារចំនួន ១៩ ក្បាល ក៏ត្រូវបានដកហូត ដើម្បីចាត់ការបន្ដតាមច្បាប់ផងដែរ។
កាលពីខែ ធ្នូ ឆ្នាំ ២០១៨ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានបណ្តេញជនជាតិចិន ២៣៥ នាក់ ក្នុងនោះស្រី ៣៥ នាក់ ចេញពីកម្ពុជាទៅប្រទេសកំណើតវិញតាមយន្តហោះនៅច្រកទ្វារអាកាសយានដ្ឋានអន្តរជាតិភ្នំពេញក្រោយពីការបង្ក្រាបករណីឆបោកគំរាមកំហែង និងជំរិតទារប្រាក់តាមប្រព័ន្ធទូរគមនាគមន៍ (VOIP) នៅស្រុកត្រាំកក់ និងស្រុកបាទី ខេត្តតាកែវ នៅ ៤ ទីតាំងផ្សេងៗគ្នា។
តាមស្ថិតិរបស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានឲ្យដឹងថានៅក្នុងឆ្នាំ ២០១៨ មានជនបរទេសចំនួន ១ ៣៤៨ នាក់ ត្រូវនឹង ៥២ សញ្ជាតិ ត្រូវបានបណ្ដេញចេញពីកម្ពុជា។ រីឯ ៥ ឆ្នាំចុងក្រោយនេះ មានជនបរទេស ៩៥ សញ្ជាតិ ដែលមានសរុប ១៥ ៣៦៦ នាក់ ត្រូវបានបណ្ដេញចេញពីកម្ពុជា៕