ភ្នំពេញ: សមត្ថកិច្ចក្រសួងមហាផ្ទៃកំពុងបន្តនីតិវិធីសាកសួរមនុស្សមួយចំនួនទៀតក្នុងចំណោម ១៣ នាក់ (ជនបរទេស ៥ នាក់) ដែលត្រូវបានឃាត់ក្នុងរយៈពេល ២ ថ្ងៃពាក់ព័ន្ធនឹងការផលិត និងការលក់ឧបករណ៍ក្លែងក្លាយសម្រាប់ធ្វើតេស្ត និងការពារកូវីដ ១៩ បន្ទាប់ពីមានមនុស្ស ៤ នាក់ទើបត្រូវបានអនុញ្ញាតឲ្យត្រឡប់ទៅផ្ទះវិញ ក្រោយពេលអប់រំរួច។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបានប្រាប់ភ្នំពេញប៉ុស្ដិ៍ពីម្សិលមិញថា ក្នុងចំណោមមនុស្ស ១៣ នាក់ ដែលសមត្ថកិច្ចជំនាញឃាត់ខ្លួននៅថ្ងៃទី ២៩ និង ៣០ ខែមីនានោះគឺមាន ៤ នាក់ ត្រូវបានសមត្ថកិច្ចអប់រំ ហើយអនុញ្ញាតឲ្យវិលទៅផ្ទះវិញ រីឯមនុស្ស ៩ នាក់ទៀត កំពុងស្ថិតក្នុងនីតិវិធីសាកសួរនៅឡើយ។
លោកបន្តថាមនុស្ស ៩ នាក់នោះ ត្រូវបានឃាត់ខ្លួនពេលសមត្ថកិច្ចបើកប្រតិបត្តិការបង្ក្រាបទូទាំងប្រទេសចំនួន ១២ ករណី ក្នុងនោះមាន ៩ ករណី នៅក្នុងរាជធានីភ្នំពេញ ២ ករណី នៅខេត្តព្រះសីហនុ និង ១ ករណី នៅខេត្តសៀមរាប។ ចំពោះអ្នកដែលត្រូវបានអប់រំហើយអនុញ្ញាតឲ្យទៅផ្ទះវិញនោះគឺជាអ្នកលក់តាមអនឡាញ ដែលពួកគាត់មិនមានផលិតផលក្នុងស្ដុកទេ ហើយប្រសិនបើមានគេកុម្ម៉ង់ទិញទើបទៅយកពីអ្នកផ្សេង មកលក់បន្ត។
លោក ឆាយ គឹមខឿន បញ្ជាក់ថា៖ «សមត្ថកិច្ចបានរឹបអូសឧបករណ៍ក្លែងក្លាយមួយចំនួនធំក្នុងនោះមានម្ជុលធ្វើតេស្តឈាម ២១ ដើម ឧបករណ៍តេស្តបន្ទាន់ ១៣ កេស (នៅភ្នំពេញ) និង ៤៨ កញ្ចប់ (នៅព្រះសីហនុ) សម្លៀកបំពាក់ ៤០០ កុំប្លេ និងម៉ាស់ក្លែងក្លាយ ១៩១ ៥០០ ម៉ាស់ផងដែរ។ ទោះយ៉ាងណាករណីលក់ផលិតផលមិនត្រឹមត្រូវនេះទាក់ទងសន្ដិសុខជាតិទាំងមូលដូច្នេះយើងត្រូវតែការប្រឆាំងនឹងជនឆ្លៀតឱកាសទាំងអស់នេះដោយបន្តចុះប្រតិបត្តិការបន្តបន្ទាប់ទៀត»។
លោក ឡី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមអ្នកលក់ឱសថកម្ពុជាបានថ្លែងពីម្សិលមិញថា លោកគាំទ្រចំពោះប្រតិបត្តិការបង្ក្រាបរបស់សមត្ថកិច្ចលើអ្នកឆ្លៀតឱកាសប្រកបមុខរបររកស៊ីមិនស្មោះត្រង់នេះ។ បើមានអាជីវកររកស៊ីមិនត្រឹមត្រូវស្របពេលដែលប្រទេសជាតិកំពុងរងគ្រោះដោយជំងឺកូវីដ ១៩ បែបនេះ នឹងបង្កគ្រោះមហន្ដរាយមួយកម្រិតថែមទៀតដល់អ្នកប្រើប្រាស់។
លោកបានជំរុញឲ្យសមត្ថកិច្ចចាត់វិធានការឲ្យតឹងរ៉ឹងបំផុតចៀសវាងការលក់ដូរកេងចំណេញគ្មានគិតពីប្រយោជន៍ជាតិ និងផលប៉ះពាល់ដល់អ្នកប្រើប្រាស់ផលិតផល។
លោកបញ្ជាក់ថា៖ «ប្រទេសយើងកំពុងជួបគ្រោះពីជំងឺកូវីដ១៩នេះ អាជីវករ ឬឱសថការីយើង មិនគួរកេងចំណេញហួសហេតុពេកទេ គួរតែនាំគ្នាធ្វើទាន បរិច្ចាគសម្ភារខ្លះតាមដែលអាចធ្វើទៅបាន ហើយបើយើងម្នាក់ៗគិតតែពីចំណេញ តើអ្នករងគ្រោះជាជនជាតិយើងនឹងទៅជាយ៉ាងណាបើគាត់គ្មានលទ្ធភាពទិញរបស់ថ្លៃៗនោះ? »។
ការបង្ក្រាបនេះក្រោយពីលោកនាយករដ្ឋមន្ត្រី ហ៊ុន សែន បានប្រកាសដាក់បទបញ្ជាយ៉ាងម៉ឹងម៉ាត់ ហើយកាលពីថ្ងៃទី ២៩ ខែមីនា លោក នេត សាវឿន អគ្គស្នងការនគរបាលជាតិបានបញ្ជាឲ្យនគរបាលទូទាំងប្រទេស សហការជាមួយនគរបាលនាយកដ្ឋានប្រឆាំងបទល្មើសបច្ចេកវិទ្យា ស្រាវជ្រាវ និងចាប់ឃាត់ខ្លួនម្ចាស់ឱសថស្ថានរូបណាដែលលក់ឧបករណ៍ធ្វើតេស្ត និងការពារជំងឺ Covid-19 គ្មានការអនុញ្ញាតស្របច្បាប់។
ជាមួយគ្នានេះដែរកាលថ្ងៃទី ៣០ ខែមីនា លោកនាយករដ្ឋមន្ត្រី ហ៊ុន សែន ត្រូវបាន Fresh News ដកស្រង់ប្រសាសន៍ថា រាជរដ្ឋាភិបាលបានសម្រេចបញ្ជាទិញម៉ាស់ពី ៣ លាន កើនដល់ ៥ លាន ២ សែនម៉ាស់សម្រាប់ចែកចាយជូនពលរដ្ឋ និងផ្តល់ជូនគ្រូពេទ្យកម្ពុជានៅក្នុងអំឡុងពេលមានបញ្ហា Covid-19 នេះ។
លោកបានចាត់ឲ្យក្រសួងសុខាភិបាលបញ្ជាទិញពីក្រៅប្រទេសចំនួន ៤ លានម៉ាស់ និងបញ្ជាទិញពីរោងចក្រផ្ទាល់នៅខេត្តព្រះសីហនុចំនួន ១ លាន ២ សែនម៉ាស់។ ចំពោះរោងចក្រផលិតម៉ាស់នៅខេត្តព្រះសីហនុ ក្រោយពីបញ្ជាទិញទំនិញហើយ រោងចក្រនេះនឹងក្លាយជារោងចក្រផលិតម៉ាស់សម្រាប់ផ្គត់ផ្គង់ឲ្យរដ្ឋដើម្បីប្រើប្រាស់នៅក្នុងស្រុកតែម្តង។
ក្រៅពីរោងចក្រផលិតម៉ាស់នេះលោកនាយករដ្ឋមន្ត្រីបានបញ្ជាឲ្យរោងចក្រមួយទៀតដែលមានសមត្ថភាពអាចផលិតទឹកអាល់កុលជាង ១០ ០០០ លីត្រ ក្នុង ១ ថ្ងៃ សម្រាប់ជាទំនិញផ្គត់ផ្គង់ឲ្យរដ្ឋផងដែរដោយទុកអាល់កុលជាទំនិញយុទ្ធសាស្ត្រសម្រាប់ប្រើប្រាស់ក្នុងកាលៈទេសៈនៃការរីករាលដាលជំងឺ Covid-19 នៅកម្ពុជា។
លោកបានបញ្ជាក់ថា ពេលនេះម៉ាស់ប្រៀបដូចជា គ្រាប់កាំភ្លើងដែលត្រូវបម្រុងទុក ដើម្បីការពារខ្លួន ខណៈថវិកាដែលចំណាយទៅលើការទិញម៉ាស់ អាល់កុល និងអាវសម្រាប់ផ្គត់ផ្គង់ដល់គ្រូពេទ្យនោះត្រូវបានលោកអះអាងថា ជាថវិការបស់សប្បុរសជនដែលបានបរិច្ចាគជាបន្តបន្ទាប់ដល់គណៈកម្មការជាតិប្រយុទ្ធប្រឆាំងនឹងជំងឺកូវីដ ១៩ កន្លងមកនេះ៕