បន្ទាយមានជ័យ/សៀមរាប: នគរបាលអន្ដោប្រវេសន៍ខេត្តសៀមរាបកំពុងសាកសួរជនសង្ស័យបរទេស ៦ សញ្ជាតិសរុប ១៩៧ នាក់ (ស្រី ១២៤ នាក់) បន្ទាប់ពីបញ្ជូនពីខេត្តបន្ទាយមានជ័យក្រោយពេលចាប់ខ្លួនកាលពីថ្ងៃទី ១៩ ខែវិច្ឆិកា ជុំវិញករណីបើកល្បែងអនឡាញខុសច្បាប់នៅសង្កាត់/ក្រុងប៉ោយប៉ែត ខណៈជនជាតិខ្មែរ ១២ នាក់ផ្សេងទៀតត្រូវបានដោះលែង។
លោក កែវ វណ្ណថន អគ្គនាយករងអន្តោប្រវេសន៍នៃអគ្គស្នងការដ្ឋាននគរបាលជាតិ និងជាអ្នកដឹកនាំកម្លាំងចុះបង្ក្រាបផ្ទាល់កាលពីម្សិលមិញបានបដិសេធការធ្វើអត្ថាធិប្បាយលម្អិតជុំវិញករណីនេះ ប៉ុន្ដែលោកបានបញ្ជាក់យ៉ាងខ្លីថា មន្ត្រីជំនាញបាន និងកំពុងបន្តសាកសួរជនសង្ស័យបរទេសទាំង ១៩៧ នាក់នោះនៅឡើយ។ «ខ្ញុំអត់ទាន់អាចបញ្ជាក់ពីចំណាត់ការលម្អិតទេ ព្រោះសំណុំរឿងនេះស្ថិតនៅក្នុងដំណាក់ការស្រាវជ្រាវបន្ត»។
លោក អាត់ ខែម ស្នងការនគរបាលខេត្តបន្ទាយមានជ័យដែលបានដឹកនាំសមត្ថកិច្ចខេត្តចូលរួមក្នុងប្រតិបត្តិការនេះ មិនបានបញ្ជាក់ពីករណីនេះទេកាលពីម្សិលមិញដោយលោកអះអាងថា របាយការណ៍ពាក់ព័ន្ធត្រូវបានប្រគល់ជូនទៅមន្ត្រីជំនាញអន្តោប្រវេសន៍អស់ទៅហើយ។
លោកបញ្ជាក់ថា៖ «ខ្ញុំអត់អាចជម្រាបជូនលម្អិតបានទេ ហើយសូមសួរទៅមន្ត្រីជំនាញនៃអគ្គនាយកដ្ឋានអន្តោប្រវេសន៍ ព្រោះពួកខ្ញុំមិនមានរបាយការណ៍ហ្នឹងទៀតទេ ហើយរឿងនីតិវិធីបែបណាទៀតនោះ ខ្ញុំអត់ដឹងទេ»។
ប៉ុន្ដែបើតាមបណ្ដាញសារព័ត៌មានក្នុងស្រុកមួយបានដកស្រង់សម្ដីលោក អាត់ ខែម កាលពីថ្ងៃទី ២០ ខែវិច្ឆិកាថា ប្រតិបត្តិការនេះត្រូវបានលោក កែវ វណ្ណថន អគ្គនាយករងអន្តោប្រវេសន៍ជាអ្នកដឹកនាំកម្លាំងចម្រុះ សហការជាមួយសមត្ថកិច្ចប្រឆាំងបទល្មើសល្បែងពាណិជ្ជកម្មខេត្តបន្ទាយមានជ័យដោយមានការសម្របសម្រួលនីតិវិធីពីលោក តេង សាម៉ៃ ព្រះរាជអាជ្ញារងសាលាដំបូងខេត្តបន្ទាយមានជ័យបានចុះត្រួតពិនិត្យគោលដៅបើកល្បែងអនឡាញខុសច្បាប់ចំនួន ២ កន្លែង។ ក្នុងនោះទីតាំងទី ១ នៅផ្ទះសំណាក់នាគទិព្វ ២ និងទីតាំងទី ២ នៅផ្ទះល្វែងក្រុមហ៊ុន Paramex (គ្មានច្បាប់អនុញ្ញាត) នៅភូមិក្បាលស្ពាន ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកបន្តថានៅចំណុចទីតាំងទី ២ នេះសមត្ថកិច្ចនគរបាលបានឃាត់ខ្លួនជនជាតិខ្មែរ និងបរទេសសរុបចំនួន ២០៩នាក់ (ស្រី ១៣០ នាក់)។ ក្នុងនោះមានជនសង្ស័យ ៧ សញ្ជាតិរួមមាន ជនជាតិថៃ ១៨៣ នាក់ (ស្រី ១១៨ នាក់) ឥណ្ឌា ៣ នាក់, ម៉ាឡេស៊ី ២ នាក់ (ស្រី), ឥណ្ឌូនេស៊ី ២ នាក់, តៃវ៉ាន់ ២ នាក់, ឡាវ ៥ នាក់ (ស្រី ៤ នាក់) និងជនជាតិខ្មែរ ១២ នាក់ (ស្រី ៦ នាក់)។ រីឯវត្ថុតាងមានដូចជាម៉ាស៊ីនកុំព្យូទ័រ ១០ គ្រឿង និងទូរស័ព្ទដៃមួយចំនួន។ រីឯអគារទីតាំងខាងលើត្រូវបានបិទជាបណ្ដោះអាសន្ន។
លោកបន្ថែមថា ក្រោយពីត្រួតពិនិត្យរួចហើយកម្លាំងចម្រុះបានអនុញ្ញាតឲ្យជនជាតិខ្មែរចំនួន ១២ នាក់ ត្រឡប់ទៅលំនៅឋានវិញ។ ចំណែកជនបរទេសចំនួន ១៩៧ នាក់ (ស្រី ១២៤ នាក់) ត្រូវបានឃាត់ខ្លួនបញ្ជូនទៅការិយាល័យអន្ដោប្រវេសន៍នៅខេត្តសៀមរាបដើម្បីអនុវត្តបន្តតាមនីតិវិធីច្បាប់។
លោក ធិន ស៊ិនដេត អធិការនគរបាលក្រុងប៉ោយប៉ែតបានថ្លែងថា លោកនិងនគរបាលក្រុងប៉ោយប៉ែតបានចូលរួម ប៉ុន្ដែកម្លាំងរបស់លោកមួយចំនួនបានយាមប្រចាំការនៅខាងក្រៅអគារដោយក្រុមមន្ត្រីជំនាញអន្តោប្រវេសន៍បានចូលអនុវត្តប្រតិបត្តិការនេះផ្ទាល់។
លោកបន្តថា ជនសង្ស័យបរទេសទាំងនោះត្រូវបានបញ្ជូនទៅការិយាល័យអន្តោប្រវេសន៍ខេត្តសៀមរាបដើម្បីត្រួតពិនិត្យ សាកសួរ និងស្រាវជ្រាវបន្ថែមទៀត។
លោក ស៊ិនដេត បញ្ជាក់ថា៖ «ខ្ញុំជម្រាបតែប៉ុណ្ណឹងទេ ហើយអាចសួរទៅមន្ត្រីជំនាញនៃអគ្គនាយកដ្ឋានអន្តោប្រវេសន៍បន្ថែមទៀត ព្រោះពួកគាត់អ្នកចុះអនុវត្តប្រតិបត្តិការនេះផ្ទាល់ ហើយគាត់ក៏ជាអ្នកជំនាញដែរ...»។
គួរបញ្ជាក់ថាលោកនាយករដ្ឋមន្ត្រី ហ៊ុន សែន បានចេញសារាចរណែនាំមួយកាលពីខែសីហាឆ្នាំនេះ ឲ្យចាត់វិធានការលើល្បែងភ្នាល់តាមប្រព័ន្ធអនឡាញ ឬប្រព័ន្ធអ៊ីនធឺណិត ក្រោយពេលដឹងថាមានក្រុមឧក្រិដ្ឋជនបរទេសមួយចំនួនបានប្រើប្រាស់ល្បែងនេះដើម្បីបោកប្រាស់ជំរិតទារប្រាក់ពីជនរងគ្រោះទាំងក្នុង និងក្រៅប្រទេស៕