ភ្នំពេញៈ នគរបាលខណ្ឌមានជ័យកាលពីម្សិលមិញបានបន្តសួរមនុស្ស ២៧ នាក់ក្នុងនោះមានអ្នកកាសែត ១៣ នាក់ផង បន្ទាប់ពីឃាត់ខ្លួនកាលពីថ្ងៃទី ២៤ ឧសភា ពាក់ព័ន្ធនឹងការបញ្ជល់មាន់ និងលេងល្បែងស៊ីសងនៅភូមិដំណាក់ធំ ៣ សង្កាត់ស្ទឹងមានជ័យទី ៣ ខណ្ឌមានជ័យ រាជធានីភ្នំពេញ។
លោក ម៉េង វិមានតារា អធិការនគរបាលខណ្ឌមានជ័យឲ្យដឹងពីម្សិលមិញថា ករណីអ្នកកាសែត និងអ្នកលេងល្បែងស៊ីសងខុសច្បាប់នោះសមត្ថកិច្ចលោកកំពុងបន្តសួរនៅអធិការដ្ឋាននគរបាលខណ្ឌមានជ័យ មុនពេលបញ្ជូនបន្តទៅតុលាការ។
លោកថ្លែងយ៉ាងខ្លីមុនបិទទូរស័ព្ទថា៖ «ខ្ញុំមិនទាន់បញ្ជូនពួកគេទៅតុលាការទេ កំពុងកសាងសំណុំរឿងតាមនីតិវិធី»។
លោក ម៉េង វិមានតារា មិនបានបញ្ជាក់ពីមូលហេតុនៃការឃាត់ខ្លួននេះទេ។ តែមន្ត្រីនគរបាលប៉ុស្ដិ៍សង្កាត់ស្ទឹងមានជ័យ ៣ ម្នាក់សុំមិនបញ្ចេញឈ្មោះឲ្យដឹងថា ការចុះបង្ក្រាបទីតាំងលួចបញ្ជល់មាន់ និងលេងអាប៉ោងនេះគឺបន្ទាប់ពីពលរដ្ឋផ្តល់ព័ត៌មានមកឲ្យសមត្ថកិច្ច។
លោកបញ្ជាក់ថា ក្នុងចំណោមអ្នកដែលត្រូវឃាត់ខ្លួនក្នុងនោះមានអ្នកកាសែត ១៣ នាក់ រីឯ ១៧ នាក់ទៀតជាអ្នកភ្នាល់ល្បែងបញ្ជល់មាន់។
លោកបន្ថែមថា ក្រៅពីឃាត់ខ្លួនមនុស្ស សមត្ថកិច្ចបានរឹបអូសវត្ថុតាងមួយចំនួនរួមមានមាន់ឈ្មោល ៥ ក្បាល (ងាប់ ២ ក្បាល),ជញ្ជីងសម្រាប់ថ្លឹងមាន់ ១ គ្រឿង,ទូរស័ព្ទដៃចាស់ ២០ គ្រឿង និងម៉ូតូ ៣ គ្រឿង។
លោក ផុស សុវណ្ណ អ្នកនាំពាក្យក្រសួងព័ត៌មានបានថ្លែងថា កំហុសអ្នកកាសែតអ៊ីចឹងជួនកាលក្រសួងហៅចាងហ្វាងព្រមាន ឬបើសមត្ថកិច្ចចោទប្រកាន់ក៏ត្រូវព្យួរការងាររបស់គាត់អ៊ីចឹងដែរ៕