ភ្នំពេញៈ នគរបាលខណ្ឌពោធិ៍សែនជ័យ នៅកំពុងបន្តធ្វើការសាកសួរក្រុមក្មេងទំនើង ដែលប្រដាប់ដោយដាវសាំម៉ូរ៉ៃ និងកាំបិតប៉័ងតោចំនួន ២៨ នាក់ បន្ទាប់ពីត្រូវបានចាប់ឃាត់ខ្លួនកាលពីយប់រំលងអាធ្រាត្រ ឈានចូលថ្ងៃទី ០៤ ខែ កុម្ភៈ ឆ្នាំ ២០២១ ខណៈពួកគេកំពុងប្រមូលផ្ដុំគ្នា នៅលើដងផ្លូវវេងស្រេង និងស្រែកឡូឡារំខានដល់ការរស់នៅរបស់ប្រជាពលរដ្ឋ នៅក្នុងមូលដ្ឋានភូមិជ្រៃកោង ២ សង្កាត់ចោមចៅទី២។
លោក ម៉ន វុធី អធិការនគរបាលខណ្ឌពោធិ៍សែនជ័យ បានប្រាប់ ភ្នំពេញ ប៉ុស្តិ៍ថា ខណៈកំពុងចុះល្បាត រក្សាសុវត្ថិភាព សន្តិសុខ នាពេលយប់នៅតាមបណ្ដោយផ្លូវវេងស្រេង កម្លាំងសមត្ថកិច្ចបានប្រទះឃើញ មនុស្សមួយក្រុមប្រមូលផ្ដុំគ្នា នៅមុខហ្គារាស់សាំងមួយកន្លែង ក្នុងភូមិសាស្ត្រខាងលើនេះ ដោយមានអ្នកខ្លះកាន់ដាវ និងកាំបិត និងស្រែកឡូឡា បង្កការភ័យខ្លាចដល់អ្នកដំណើរ និងអ្នកភូមិក្នុងតំបន់នោះ ហើយកម្លាំងរបស់លោកក៏បានបង្ក្រាបចាប់ឃាត់ខ្លួនពួកគេយកមកសួរនាំតែម្ដង។
លោក វុធី បានបញ្ជាក់ថា៖ «ថ្វីបើក្នុងយប់នោះ ពួកគេនៅពុំទាន់ធ្វើសកម្មភាពហឹង្សាណាមួយកើតឡើង ប៉ុន្តែសកម្មភាពរបស់ពួកគេបានបង្កឲ្យមានការភ័យខ្លាចដល់អ្នកភូមិ និងអ្នកដំណើរឆ្លងកាត់ក្នុងតំបន់នោះ»។
បើតាមលោក វុធី ក្នុងប្រតិបត្តិការនោះ កម្លាំងសមត្ថកិច្ចបានចាប់រឹបអូសវត្ថុតាងមួយចំនួន រួមមានម៉ូតូ ១២ គ្រឿង ដាវចំនួន ៥ ដើម កាំបិតប៉័ងតោ ២ ដើម និងគ្រឿងញៀនប្រភេទ Ice Methamphetamine ចំនួន ៧ កញ្ចប់តូច។
បន្ទាប់ពីឆែកឆេររកឃើញគ្រឿងញៀន ក្រុមមន្ត្រីនគរបាលជំនាញបានយកសំណាកទឹកនោមរបស់ពួកគេទៅធ្វើតេស្តរកសារធាតុញៀន។ ជាលទ្ធផលមនុស្ស ១៨ នាក់ ក្នុងចំណោមពួកគេ ត្រូវបានរកឃើញវិជ្ជមានសារធាតុញៀននៅក្នុងទឹកនោម។
ក្រោយពីទទួលបានលទ្ធផលនៃការធ្វើតេស្តលើសំណាកទឹកនោមរបស់ពួកគេ ក្រុមមន្ត្រីជំនាញបានញែកពួកគេចេញជា ២ ក្រុមដាច់ពីគ្នា ដើម្បីងាយស្រួលក្នុងការស៊ើបសួរចម្លើយពាក់ព័ន្ធករណីប្រមូលផ្ដុំគ្នាដោយមានដាវ និងកាំបិតច្រូងច្រាងនេះ ដើម្បីឈានទៅកសាងសំណុំរឿងបញ្ជូនទៅតុលាការ ចាត់វិធានការបន្តតាមនីតិវិធីច្បាប់។
លោកបានបញ្ជាក់ថា៖ «នៅពេលនេះ ក្រុមមន្ត្រីនគរបាលជំនាញយើងនៅមិនទាន់បញ្ចាប់ការស៊ើបពួកគេនៅឡើយទេ»។
លោកបានបន្ថែមថា កន្លងមកមានសេចក្ដីរាយការណ៍ពីប្រជាពលរដ្ឋថា មានករណីវាយប្រតប់គ្នា ឆក់ការបូប និងកាប់ប្លន់យកម៉ូតូ ពីអ្នកដំណើរ ដែលឆ្លងកាត់តាមបណ្ដោយផ្លូវក្នុងភូមិសាស្ត្រខាងលើនេះ នៅពេលយប់ផងដែរ៕