.jpg)
ជនសង្ស័យជួញដូរគ្រឿងញៀនដែលត្រូវបានសមត្ថកិច្ចចាប់ខ្លួន។ រូបថត នគរបាល
ភ្នំពេញៈ សមត្ថកិច្ចនៃមន្ទីរប្រឆាំងគ្រឿងញៀននៃក្រសួងមហាផ្ទៃបន្តសាកសួរជនសង្ស័យម្នាក់ពាក់ព័ន្ធគ្រឿងញៀនជិត ៤ គីឡូក្រាម បន្ទាប់ពីចាប់ខ្លួនបាននៅភូមិស្លែងរលើង សង្កាត់អូរបែកក្អម ខណ្ឌសែនសុខ រាជធានីភ្នំពេញកាលពីថ្ងៃទី ១០ ខែកញ្ញា ឆ្នាំ ២០១៩។
លោក មាស វិរិទ្ធ អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់ពីម្សិលមិញថា ករណីជនសង្ស័យម្នាក់ឈ្មោះ យ៉េន ជឿន ភេទប្រុស អាយុ ២៩ ឆ្នាំដែលសមត្ថកិច្ចរបស់មន្ទីរប្រឆាំងគ្រឿងញៀនចាប់ខ្លួនបាននោះគឺកំពុងបន្តសាកសួរនៅឡើយទេ។
លោកថ្លែងថា៖ «ករណីនេះប្រសិនបើសមត្ថកិច្ចយល់ថាអាចមានអ្នកពាក់ព័ន្ធ គឺសមត្ថកិច្ចនឹងសុំយោបល់ទៅព្រះរាជអាជ្ញាដើម្បីបន្តនីតិវិធីនៃការឃុំខ្លួនទៀត ដើម្បីស្រាវជ្រាវរកអ្នកពាក់ព័ន្ធ»។
លោកប្រាប់ថា មន្ទីរប្រឆាំងគ្រឿងញៀនបានបើកប្រតិបត្តិការបង្ក្រាបមេខ្លោងជួញដូរគ្រឿងញៀនម្នាក់នេះនៅក្នុងភូមិស្លែងរលើង សង្កាត់អូរបែកក្អម ខណ្ឌសែនសុខ រាជធានីភ្នំពេញកាលពីថ្ងៃទី ១០ ខែកញ្ញា។ ក្នុងប្រតិបត្តិការនេះសមត្ថកិច្ចដកហូតបានមេតំហ្វេតាមីន (ICE) ទម្ងន់ ៣២៥៤,៣១ ក្រាម កេតាមីនទម្ងន់ ៣៤៦ ក្រាម និង អ៊ិចស្តាស៊ី (MDMA) ទម្ងន់ ២៥៣,២៣ ក្រាម ដោយដកហូតបានគ្រឿងញៀនសរុបទម្ងន់ជិត ៤ គីឡូក្រាម។
លោកបញ្ជាក់ថា៖ «ការឈានដល់ការចាប់ខ្លួនមេខ្លោងនេះ គឺជាការស្រាវជ្រាវរបស់សមត្ថកិច្ចជំនាញក្នុងការអនុវត្តផែនការនៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ហើយជាមួយនឹងបទបញ្ជារបស់សម្តេចក្រឡាហោម [ស ខេង] ឲ្យខិតខំបន្តយកចិត្តទុកដាក់បន្ថែមទៀតដើម្បីទទួលបានលទ្ធផលកាន់តែល្អប្រសើរឡើង»។
លោកបានបន្ថែមថា៖ «យើងបន្តស្រាវជ្រាវចំពោះកិច្ចការងារនេះ ពីព្រោះបុគ្គលនេះមិនមែនចេះផលិត គ្រឿងញៀនដោយខ្លួនឯងទេ។ យើងត្រូវស្រាវជ្រាវថាតើគាត់ទិញ ឬទទួលគ្រឿងញៀនពីនរណាមក ដូច្នេះសមត្ថកិច្ចត្រូវបន្តការស្រាវជ្រាវ»។
លោកមិនទាន់អាចបញ្ជាក់បានទេថាតើជនសង្ស័យនឹងបញ្ជូនទៅតុលាការនៅពេលណានោះ៕
