ភ្នំពេញៈ សមត្ថកិច្ចជំនាញកំពុងរៀបចំបំពេញបែបបទដើម្បីបណ្តេញបុរសជនជាតិបារាំងម្នាក់ចេញពីកម្ពុជា បន្ទាប់ពីកម្លាំងនគរបាលអន្តោប្រវេសន៍នៃស្នងការដ្ឋាននគរបាលរាជធានីភ្នំពេញចាប់ឃាត់ខ្លួនពាក់ព័ន្ធករណីស្នាក់នៅដោយខុសច្បាប់ ប្រើប្រាស់អាវុធខុសច្បាប់ និងបង្កការអុកឡុកវាយបំផ្លាញទ្រព្យសម្បត្តិអ្នកដទៃ។ នេះបើតាមលោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញកាលពីថ្ងៃពុធ។
លោក សុខសីហា ប្រាប់ ភ្នំពេញ ប៉ុស្តិ៍ថា បុរសជនជាតិបារាំង ឈ្មោះ BAUDRY SEBASTIEN អាយុ ៤៣ ឆ្នាំ ត្រូវបានកម្លាំងសមត្ថកិច្ចចាប់ឃាត់ខ្លួន កាលពីថ្ងៃទី ២៣ ខែកុម្ភៈ ឆ្នាំ ២០២១ នៅចំណុចបរិវេណក្នុងបុរីសុភមង្គល ដែលមានទីតាំងស្ថិតនៅក្នុងសង្កាត់ខណ្ឌជ្រោយចង្វារ រាជធានីភ្នំពេញ បន្ទាប់ពីគាត់បានផឹកស្រាស្រវឹង ហើយបង្កការអុកឡុកវាយបំផ្លិចបំផ្លាញ សម្ភារមួយចំនួននៅក្នុងគេហដ្ឋាន ដែលគាត់បានជួលស្នាក់នៅ។
លោកបន្តថា ក្រោយពេលចាប់ខ្លួន ក្រុមកម្លាំងនគរបាលអន្តោប្រវេសន៍បានសហការជាមួយកម្លាំងអធិការដ្ឋាននគរបាលខណ្ឌជ្រោយចង្វារធ្វើការឆែកឆេរផ្ទះដែលគាត់ស្នាក់នៅ រកឃើញ និងរឹបអូសវត្ថុតាងមួយចំនួនរួមមានស្លឹកកញ្ឆាក្រៀម ដែលជាប្រភេទរុក្ខជាតិញៀន និងត្រូវបានហាមឃាត់ដោយច្បាប់កម្ពុជាចំនួន ៣ កញ្ចប់តូច អាវុធវែងខ្លី ២ ដើម និងកាំភ្លើងបាញ់សត្វ ១ ដើម។
មិនតែប៉ុណ្ណោះ ទិដ្ឋាការស្នាក់នៅក្នុងប្រទេសកម្ពុជា របស់គាត់បានផុតសុពលភាពតាំងពីខែ វិច្ឆិកា ឆ្នាំ ២០២០ មក។ លោក សុខសីហា បញ្ជាក់ថា៖ «គាត់ត្រូវបានកម្លាំងនគរបាលអន្តោប្រវេសន៍កសាងសំណុំរឿងចោទប្រកាន់ពីបទស្នាក់នៅកម្ពុជាខុសច្បាប់ ប្រើប្រាស់សារធាតុញៀន និងអាវុធខុសច្បាប់ និង បទបំផ្លិចបំផ្លាញទ្រព្យសម្បត្តិអ្នកដទៃ។ នៅពេលនេះ ក្រុមមន្ត្រីជំនាញកំពុងរៀបចំបែបបទ និងនីតិវិធីបណ្ដេញចេញពីកម្ពុជា»។
ចំណែកលោក ទិត វិសិដ្ឋ ស្នងការរងទទួលបន្ទុកផ្នែកស៊ើបអង្កេត និងអនុវត្តនីតិវិធីនៃផែនការងារអន្តោប្រវេសន៍បានថ្លែងថា បុរសជនជាតិបារាំងរូបនោះ ធ្លាប់ត្រូវបានសមត្ថកិច្ចឃាត់ខ្លួនធ្វើការអប់រំណែនាំម្ដងរួចមកហើយ ពាក់ព័ន្ធករណីបង្កការអុកឡុកវាយបំផ្លិចបំផ្លាញទ្រព្យសម្បត្តិអ្នកដទៃកាលពីអំឡុងពាក់កណ្ដាលឆ្នាំ ២០២០។
លោក វិសិដ្ឋ ថ្លែងថា៖ «ដោយសារគាត់ធ្លាប់ប្រព្រឹត្តបទល្មើស ហើយទិដ្ឋាការស្នាក់នៅកម្ពុជារបស់គាត់បានផុតសុពលភាពទៅហើយនោះ ដូច្នេះយើងចាំបាច់ត្រូវរៀបចំនីតិវិធីបណ្ដេញគាត់ចេញពីកម្ពុជាតែម្ដង»។
បើតាមលោក វិសិដ្ឋ សមត្ថកិច្ចបានជូនដំណឹងអំពីករណីបុរសជនជាតិបារាំងឈ្មោះ BAUDRY SEBASTIEN ទៅកាន់ស្ថានទូតបារាំងប្រចាំកម្ពុជាកាលពីរសៀលថ្ងៃអង្គារ។ លោកបន្តថា៖ «ខាងស្ថានទូតបារាំងប្រចាំកម្ពុជា ក៏បានគាំទ្រឱ្យសមត្ថកិច្ចយើងអនុវត្តនីតិវិធីទៅតាមច្បាប់កម្ពុជា»។
តំណាងស្ថានទូតបារាំងប្រចាំកម្ពុជាពីម្សិលមិញបានបដិសេធធ្វើអត្ថាធិប្បាយលើបញ្ហានេះ។
លោកវិសិដ្ឋក៏បានប្រាប់ឱ្យដឹងទៀតថា តាមរយៈលទ្ធផលនៃការធ្វើតេស្តទឹកនោម BAUDRY SEBASTIEN មានវិជ្ជមានសារធាតុញៀននៅក្នុងខ្លួន ហើយពេលនេះមន្ត្រីនគរបាលជំនាញបានបញ្ជូនគាត់ទៅវិទ្យាស្ថានជាតិសុខភាពសាធារណៈ ដើម្បីធ្វើតេស្តរកមេរោគកូវីដ ១៩ មុនពេលបណ្ដេញចេញពីកម្ពុជា។
លោកបន្តថា បច្ចុប្បន្នលោក BAUDRY SEBASTIEN កំពុងត្រូវបានឃុំខ្លួនជាបណ្ដោះអាសន្ននៅអធិការដ្ឋាននគរបាលខណ្ឌជ្រោយចង្វារ ដើម្បីចាត់ការបន្តតាមនីតិវិធីច្បាប់៕