កំពង់ធំ៖សមត្ថកិច្ចកងរាជអាវុធហត្ថខេត្តកំពង់ធំកំពុងប្រមូលព័ត៌មានពីសាក្សី និងកំពុងសាកសួរជនសង្ស័យជាមន្ត្រីអាវុធហត្ថម្នាក់ បន្ទាប់ចាប់ខ្លួនពីថ្ងៃទី ២៩ ឧសភា ពាក់ព័ន្ធករណីចាក់អតីតភរិយារបួសធ្ងន់ នៅភូមិត្បូងទឹក ឃុំមានរិទ្ធ ស្រុកសណ្តាន់ ខេត្តកំពង់ធំ កាលពីថ្ងៃទី ២៣ ខែឧសភា ឆ្នាំ២០២១។
លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានប្រាប់ភ្នំពេញប៉ុស្តិ៍នៅថ្ងៃទី ៣០ ឧសភាថា ឈ្មោះ ស្រ៊ន ពេជ្ររស្មី ដែលបានចាក់អតីតភរិយាឱ្យរងបួសនោះ សមត្ថកិច្ចកងរាជអាវុធហត្ថខេត្តកំពង់ធំចាប់ខ្លួនបានហើយកាលពីថ្ងៃទី ២៩ ឧសភា ហើយករណីនេះសមត្ថកិច្ចជំនាញកំពុងដំណើរការតាមនីតិវិធីច្បាប់។
លោកថ្លែងថា៖«ករណីនេះឯកឧត្តមនាយឧត្តមសេនីយ៍ សៅ សុខា មានប្រសាសន៍បញ្ជាក់ថា បុគ្គលដែលប្រព្រឹត្តខុសច្បាប់ គឺមិនអាចអត់ឱនឱ្យបាននោះទេ ពោលត្រូវតែស្រាវជ្រាវចាប់ខ្លួន ដើម្បីយកមកផ្ដន្ទាទោសតាមផ្លូវច្បាប់ជាធរមាន។ ចំពោះព័ត៌មានបន្តទៀតសូមសួរទៅអយ្យការទៅ»។
លោកព្រះរាជអាជ្ញារង សាយ វាសនា និងជាអ្នកនាំពាក្យអយ្យការអមសាលាដំបូងខេត្តកំពង់ធំបានប្រាប់ភ្នំពេញប៉ុស្តិ៍នៅទី ៣០ ឧសភា នេះថា ករណីនេះសមត្ថកិច្ចកងរាជអាវុធហត្ថបានជូនដំណឹងមកអយ្យការអមសាលាដំបូងខេត្តកំពង់ធំហើយកាលពីថ្ងៃទី ២៩ ឧសភា បន្ទាប់ពីឃាត់ខ្លួនជនសង្ស័យបាននៅខេត្តកំពង់ធំ។ ដូច្នេះមន្ត្រីកងរាជអាវុធហត្ថដែលធ្វើការងារផ្នែកនេះកំពុងសាកសួរជនសង្ស័យនៅទីបញ្ជាការដ្ឋានកងរាជអាវុធហត្ថខេត្តកំពង់ធំនៅឡើយ មិនទាន់បញ្ជូនមកសាលាដំបូងខេត្តកំពង់ធំទេ។ ចំពោះមូលហេតុពិតនៃការបង្កហិង្សានេះនៅពេលសួរសាក្សីជុំវិញហេតុការណ៍នេះអស់ទើបដឹង។
លោកបញ្ជាក់ថា៖«រឿងនេះមិនមែនសួរតែជនសង្ស័យម្នាក់ទេគឺ ត្រូវហៅសាក្សីចូលឆ្លើយបំភ្លឺបន្ថែមទៀត ដើម្បីបានព័ត៌មានសព្វគ្រប់ជុំវិញការបង្ករបួសស្នាមនេះ។ប៉ុន្តែរឿងនេះក៏មិនយូរដែរ នឹងត្រូវបញ្ជូនមកតុលាការហើយ»។
បើតាម ផេក របស់កងរាជអាវុធហត្ថលើផ្ទៃប្រទេសបានសរសេរកាលពីយប់ថ្ងៃទី ២៤ ខែឧសភាឆ្នាំ ២០២១ ថា តាមសេចក្តីរាយការណ៍របស់លោកឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ បានដឹងថា នៅវេលាម៉ោង ៧ កន្លះព្រឹក ថ្ងៃទី ២៣ ខែឧសភា ឆ្នាំ ២០២១ ជនសង្ស័យឈ្មោះ ស្រ៊ន ពេជ្ររស្មី បានយកកាំបិតចុងស្រួចចាក់ទៅលើប្រពន្ធដែលបានលែងលះគ្នារួចហើយតាមសាលក្រមលេខ ១៨ (ក) ចុះថ្ងៃទី ១៧ ខែឧសភា ២០២១ និងសំណុំរឿងរដ្ឋប្បវេណីលេខ ៨០ ចុះថ្ងៃទី ៦ ខែមេសា២០២១ របស់សាលាដំបូងខេត្តកំពង់ធំ ។
តាមផេកដដែលបានបន្តថា ការចាក់នេះបណ្ដាលឱ្យរបួសចំនួន ៥ កន្លែង (ដៃឆ្វេង ២ កន្លែង,ដៃស្តាំ ២ កន្លែង និងកញ្ចឹងក ១ កន្លែង) ដោយមូលហេតុមកពីខឹងប្រពន្ធសុំលែង។ក្រោយពីទទួលបានព័ត៌មាននេះនៅថ្ងៃទី ២៣ ឧសភា នោះ កម្លាំងមូលដ្ឋានកងរាជអាវុធហត្ថស្រុកសណ្តាន់ បានតាមចាប់ឈ្មោះ ស្រ៊ន ពេជ្ររស្មី ដែលកំពុងគេចខ្លួនចូលព្រៃចម្ការក្នុងភូមិត្បូងទឹក ឃុំមានរិទ្ធ ស្រុកសណ្តាន់ ។តែដោយសារ តំបន់នោះសម្បូរទៅដោយចម្ការស្វាយចន្ទី ចម្ការកៅស៊ូ និងព្រៃរបោះផងនោះ ធ្វើឲ្យជនល្មើសគេចខ្លួនបាត់។
ប៉ុន្តែដោយអនុវត្តតាមបទបញ្ជាយ៉ាងម៉ឹងម៉ាត់របស់នាយឧត្តមសេនីយ៍ សៅ សុខា ដែលបញ្ជាក់ថា មិនអាចអត់ឱនឱ្យបាន និងត្រូវតែស្រាវជ្រាវចាប់ខ្លួនមកផ្ដន្ទាទោសតាមផ្លូវច្បាប់ កម្លាំងកងរាជអាវុធហត្ថគ្រប់លំដាប់ថ្នាក់ក្នុងខេត្តកំពង់ធំក៏បានស្រាវជ្រាវ
រហូតចាប់ខ្លួនជនសង្ស័យបាននៅថ្ងៃទី ២៩ ឧសភា តែម្ដង៕