.jpg)
គ្រឿងញៀនទម្ងន់ ២០,០៥ គីឡូ ដែលប្រទះឃើញអណ្តែតលើទឹកសមុទ្រនៅភូមិអាឡាតាន់ឃុំជ្រោយប្រស់ ស្រុក-ខេត្តកោះកុងកាលពីថ្ងៃទី ២៨ មីនា។ រូបថត សហការី
កោះកុងៈ នគរបាលប្រឆាំងគ្រឿងញៀនខេត្តកោះកុងកំពុងស្វែងរកមេខ្លោងគ្រឿងញៀនទម្ងន់ ២០,០៥ គីឡូ បន្ទាប់ពីប្រទះឃើញអណ្តែតលើទឹកសមុទ្រនៅភូមិអាឡាតាន់ឃុំជ្រោយប្រស់ ស្រុក-ខេត្តកោះកុងកាលពីថ្ងៃទី ២៨ មីនា ដោយបានសុំសហការជាមួយប៉ូលិសអន្តរជាតិ។
លោក មីន រស្មី ស្នងការរងនគរបាលផែនប្រឆាំងបទល្មើសគ្រឿងញៀនខេត្តកោះកុងឲ្យដឹងពីម្សិលមិញថា ករណីគ្រឿងញៀននេះសមត្ថកិច្ចកំពុងបន្តស្រាវជ្រាវរកមេខ្លោងដោយសុំសហការជាមួយនគរបាលអន្តរជាតិ។
លោកថា៖ «ករណីនេះយើងកំពុងបើកការស្រាវជ្រាវយ៉ាងក្តៅគគុក និងជូនដំណឹងដល់ប៉ូលិសអន្តរជាតិឲ្យជួយធ្វើការនេះ»។
លោកបន្តថា ដើម្បីបានឃើញជាក់ស្តែងកាលពីថ្ងៃទី ៣០ មីនា ស្នងការដ្ឋាននគរបាលខេត្តកោះកុងបានបង្ហាញជាសាធារណៈតាមរយៈធ្វើសន្និសីទកាសែតដោយមានលោកស្រី មិថុនា ភូថង អភិបាលខេត្តកោះកុង និងព្រះរាជអាជ្ញារងនៃសាលាដំបូងខេត្តកោះកុងចូលរួមផងដែរ។
លោក មីន រស្មី បញ្ជាក់ថាការរកគ្រឿងញៀននេះដោយសារប៉ុន្មានខែមុនមានការរត់ពន្ធគ្រឿងញៀនតាមផ្លូវទឹកឆ្លងដែនពីថៃចូលតាមផ្ទៃសមុទ្រកម្ពុជា ហើយបានធ្លាក់គ្រឿងញៀនចូលក្នុងទឹកសមុទ្រក្នុងដែនទឹកថៃ។ ចាប់ពីពេលនោះមក្ចនគរបាលខេត្តបានផ្សព្វផ្សាយដល់ពលរដ្ឋពិសេសអ្នកនេសាទថា ប្រសិនបើឃើញអ្វីសង្ស័យអណ្តែតទឹកសូមរាយការណ៍បន្ទាន់។
លោកបន្តថា លុះនៅព្រឹកថ្ងៃទី ២៨ មីនា ប្រជានេសាទម្នាក់បានបើកកាណូតទៅនេសាទក៏ប្រទះឃើញកញ្ចប់ប្លាស្ទិកអណ្តែតទឹកសមុទ្រ និងបានរាយការណ៍ជូនសមត្ថកិច្ច ហើយពេលយកពិនិត្យនៅស្នងការដ្ឋាននគរបាលខេត្តឃើញកញ្ចប់តូចៗជាច្រើន។
លោកថា ក្រោយបើកកញ្ចប់នោះសមត្ថកិច្ចបានធ្វើតេស្តវត្ថុក្នុងកញ្ចប់នោះទើបដឹងថាជាគ្រឿងញៀនប្រភេទមេតំហ្វេតាមីន (ICE) ម៉ាទឹកកកដែលមានទម្ងន់ ២០,០៥ គីឡូក្រាម៕
