ភ្នំពេញៈ នគរបាលខណ្ឌជ្រោយចង្វារកំពុងរៀបចំបញ្ជូនក្មេងទំនើង ២ នាក់ ទៅសាលាដំបូងរាជធានីភ្នំពេញនៅថ្ងៃនេះ បន្ទាប់ពីចាប់ខ្លួនពីថ្ងៃទី ៨ មីនា នៅសង្កាត់ជ្រោយចង្វារពាក់ព័ន្ធករណីជិះម៉ូតូទៅទះក្បាលបុរសបរទេសម្នាក់រួចយករូបភាពទៅបង្ហោះលើហ្វេសប៊ុកជាទង្វើដែលអ្នកច្បាប់ថា អាចប្រឈមទោសពី ១ ឆ្នាំទៅ ៣ ឆ្នាំ បើអំពើនោះធ្វើឡើងដោយចេតនា។
លោក ឯក សេរីវុធ អធិការរងនគរបាលខណ្ឌជ្រោយចង្វារឱ្យដឹងពីម្សិលមិញថា ជនសង្ស័យឈ្មោះ លឹម ហុងឡេង អាយុ ១៨ ឆ្នាំ និងឈ្មោះ រិទ្ធ ចាន់តារា អាយុ ១៧ ឆ្នាំ គឺសមត្ថកិច្ចលោកគ្រោងបញ្ជូនបន្តទៅសាលាដំបូងរាជធានីភ្នំពេញនៅថ្ងៃទី ១០ មីនានេះ។ ប៉ុន្តែនេះគ្រាន់តែជាការគ្រោងទេ ព្រោះសំណុំរឿងនៅថ្ងៃនេះ (ថ្ងៃទី ៩ មីនា) កំពុងបន្តចាត់ការនៅអធិការដ្ឋាននគរបាលខណ្ឌនៅឡើយ។
លោកថ្លែងថា៖ «រឿងនេះយើងត្រូវតែបញ្ជូនជនសង្ស័យទៅតុលាការហើយ ប៉ុន្តែយើងកំពុងតែធ្វើការមិនទាន់បញ្ចប់ការងារ។ យើងគ្រោងបញ្ជូនពួកគេទៅតុលាការនៅថ្ងៃស្អែកនេះ (ថ្ងៃទី ១០ មីនា) បើយើងរៀបចំឯកសារចប់»។
លោក ចាន់ ប៊ុនធឿន នាយនគរបាលប៉ុស្តិ៍សង្កាត់ជ្រោយចង្វារបានប្រាប់ភ្នំពេញប៉ុស្តិ៍ថាជនសង្ស័យឈ្មោះ លឹម ហុងឡេង គឺជាសិស្សថ្នាក់ទី ១១ រស់នៅផ្ទះជួលក្នុងភូមិកៀនឃ្លាំងសង្កាត់-ខណ្ឌជ្រោយចង្វារ។ រីឯឈ្មោះ រិទ្ធ ចាន់តារា គ្មានមុខរបរពិតប្រាកដស្នាក់នៅបន្ទប់ជួលនៅភូមិ១ សង្កាត់-ខណ្ឌជ្រោយចង្វាររាជធានីភ្នំពេញ។
លោកបន្តថា ក្រោយទទួលបញ្ជាលោកអធិការនគរបាលខណ្ឌជ្រោយចង្វារ តាមរយៈវិទ្យុទាក់ទង និងកំណត់អត្តសញ្ញាណបានតាមរយៈហ្វេសប៊ុកមកលោកក៏បានចាត់កម្លាំងនគរបាលប៉ុស្តិ៍ចុះស្រាវជ្រាវរហូតចាប់បានជនសង្ស័យតែម្តង។
លោកបានថ្លែងថា៖ «ជនសង្ស័យទាំង ២ នាក់នោះសមត្ថកិច្ចខ្ញុំបានបញ្ជូនបន្តទៅអធិការដ្ឋាននគរបាលខណ្ឌជ្រោយចង្វារចាត់ការបន្ត។ ចំពោះនីតិវិធី ឬចំណាត់ការបន្តយ៉ាងណាទៀតនោះ ជាសមត្ថកិច្ចនគរបាលខណ្ឌ»។
លោក ចាន់ ប៊ុនធឿន បញ្ជាក់ប្រាប់តាមចម្លើយរបស់ក្រុមជនសង្ស័យថា មុនបង្កហេតុ ពួកគេបាននាំគ្នាផឹកស្រាបៀររហូតស្រវឹង។ បន្ទាប់មកពួកគេក៏បានជិះម៉ូតូ ១ គ្រឿងចេញពីកន្លែងផឹកស៊ី ដោយមានឈ្មោះ លឹមហុងឡេង ជាអ្នកឌុប ឈ្មោះ រិទ្ធ ចាន់តារា។ ចៃដន្យនៅពេលកំពុងជិះម៉ូតូឌុបគ្នានោះក៏ឃើញបុរសបរទេសម្នាក់ដែលមានក្បាលកោរត្រងោលកំពុងជិះកង់ស្របទិសគ្នាក្នុងភូមិសាស្ត្រ សង្កាត់ជ្រោយចង្វារ។
ពេលនោះឈ្មោះ លឹម ហុងឡេង បានជិះម៉ូតូទៅអែបក្បែរបុរសបរទេសនោះ ហើយឈ្មោះ រិទ្ធចាន់តារា ក៏បានទះក្បាលបុរសនោះពីក្រោយមួយទំហឹង ហើយគ្នីគ្នាពួកគេ ២-៣ នាក់ទៀត ចាំថតសកម្មភាព និងនាំគ្នាសើចរួចជិះគេចខ្លួនបាត់។
លោក ប៊ុនធឿន បានប្រាប់តាមសម្តីជនសង្ស័យទៀតថា ក្រោយមកពួកគេក៏បានយករូបភាពទះក្បាលជនបរទេសនេះទៅបង្ហោះតាម TikTok និងតាមហ្វេសប៊ុករហូតសមត្ថកិច្ចស្រាវជ្រាវចាប់ខ្លួនពួកគេទាំង ២ នាក់នោះតែម្តង។
លោកមេធាវី យុង ផានិត អនុប្រធាននាយកដ្ឋានការពារក្តីជនក្រីក្រនៃគណៈមេធាវីនៃព្រះរាជាណាចក្រកម្ពុជាបានថ្លែងកាលពីម្សិលមិញថា ករណីនេះពាក់ព័ន្ធនឹងការប្រើអំពើហិង្សា ហើយបើយោងតាមមាត្រា ២១៧ នៃក្រមព្រហ្មទណ្ឌប្រសិនបើការប្រព្រឹត្តនោះធ្វើឡើងដោយចេតនាត្រូវផ្តន្ទាទោសដាក់ពន្ធនាគារពី ១ ឆ្នាំទៅ ៣ ឆ្នាំ និងពិន័យប្រាក់ពី ២ លានទៅ ៦ លានរៀល៕
វីដេអូ៖