កំពត: អាជ្ញាធរខេត្តកំពតកំពុងវាយតម្លៃការខូចខាត និងស្រាវជ្រាវរកមូលហេតុពិតប្រាកដ បន្ទាប់ពីមានឧបទ្ទេវហេតុអគ្គិភ័យឆេះផ្សារសាមគ្គីត្រពាំងរពៅស្ទើរទាំងស្រុង ក្នុងឃុំព្រែកត្នោត ស្រុកទឹកឈូ ខេត្តកំពត កាលពីព្រលប់ថ្ងៃទី ៧ ខែ សីហា ខណៈសមត្ថកិច្ចសន្និដ្ឋានថា មកពីទុស្សេចរន្តអគ្គិសនី ប៉ុន្ដែមិនមានបង្កគ្រោះថ្នាក់ដល់មនុស្សទេ។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានប្រាប់ភ្នំពេញប៉ុស្ដិ៍កាលពីម្សិលមិញថា ខណៈនេះ អាជ្ញាធរខេត្តបាន និងកំពុងស្រង់ស្ថិតិអាជីវករ ចំនួនតូបដែលកំពុងលក់ដូរក្នុងផ្សារ និងទំហំខូចខាតទ្រព្យសម្បត្តិ ។ ចំពោះតួលេខបឋម តូបអាជីវករដែលកំពុងលក់ដូរសរុបមាន ១៨៧ តូបក្នុងនោះឆេះអស់ទាំងស្រុង ១៤៧ តូប ដែលបណ្ដាលមកពីទុស្សេចរន្តអគ្គិសនី។
លោកបន្តថា ប្រតិបត្តិការពន្លត់អគ្គិភ័យនោះ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន ៥ គ្រឿង ក្នុងនោះ ២ គ្រឿង មកពីអធិការដ្ឋានស្រុកព្រៃនប់ ខេត្តព្រះសីហនុ ដោយប្រើទឹកអស់ ៣៥ រថយន្ត ។ ករណីនេះ មិនបានឆេះឆ្លងដល់ផ្ទះពលរដ្ឋដែលនៅជិតទេ រីឯអ្នកគ្រោះថ្នាក់ក៏ពុំមានដែរ។
លោក ច័ន្ទមធុរិទ្ធ បញ្ជាក់ថា៖ «ផ្សារហ្នឹងឆេះ គឺបណ្ដាលមកពីទុស្សេចរន្តអគ្គិសនី ហើយយើងកំពុងស្រាវជ្រាវបន្ថែម ដើម្បីដឹងកាន់តែច្បាស់ ហើយទំហំនៃការខូចខាតនោះ យើងមិនទាន់ដឹងទេ លោកអភិបាលខេត្តបានឲ្យមន្ត្រីជំនាញចុះស្រង់ស្ថិតិហ្នឹង ហើយគួរជួយគាត់យ៉ាងណាទៀតនោះ គឺយើងកំពុងពិភាក្សាគ្នា»។
លោក ភី ឌក នាយប៉ុស្ដិ៍នគរបាលរដ្ឋបាលឃុំព្រែកត្នោតបានថ្លែងថា នៅក្នុងផ្សារនេះ មិនមានអាជីវករស្នាក់នៅពេលយប់ទេ ពោលគឺពួកគាត់បានត្រឡប់ទៅផ្ទះរៀងៗខ្លួន បន្ទាប់ពីឈប់លក់ដូរនៅពេលថ្ងៃ ដោយបានរើអីវ៉ាន់ដាក់ក្នុងតូប រួចចាក់សោ ប៉ុន្ដែមានសន្ដិសុខយាមនៅខាងក្រៅផ្សារដោយមិនអាចចូលទៅខាងក្នុងផ្សារបានទេ។
លោកបន្តថា មុនមានអគ្គិភ័យឆេះនេះ គេឃើញប្រព័ន្ធអគ្គិសនី មានលក្ខណៈញាក់ៗ ប៉ុន្ដែត្រូវបានគេជួសជុលឡើងវិញ «កាលពីប៉ុន្មានថ្ងៃមុនហ្នឹង គឺភ្លើងវាដូចជាញាក់ៗ ហើយភ្លើងហ្នឹងភ្លឺភ្លិបភ្លែតៗ និងបណ្ដាលឲ្យឆេះទូទឹកកកអាជីវករម្នាក់ ប៉ុន្ដែយើងគ្រប់គ្រងទាន់ពេល លុះ ២ ថ្ងៃ ក្រោយមកក៏មានហេតុការណ៍នេះទៅ»។
លោក ស៊ុន រ៉ាវុធ ហៅទ្រី ជាម្ចាស់ផ្សារសាមគ្គីត្រពាំងរពៅនេះបានថ្លែងពីម្សិលមិញថា លោកសោកស្ដាយណាស់ចំពោះហេតុការណ៍នេះ ដោយធ្វើឲ្យខាតបង់ទាំងអស់គ្នា គឺលោកក៏ខាតច្រើន រីឯអាជីវករក៏ខាតបង់ច្រើនដែរព្រោះវាជាហេតុការណ៍ដែលគេមិនអាចដឹងមុន។
លោកបន្តថា មុនកើតហេតុប្រព័ន្ធអគ្គិសនីមានបញ្ហា ដោយមានភ្លើងញាក់ៗ ហើយលោកក៏បានជូនដំណឹងទៅមន្ត្រីអគ្គិសនីដើម្បីចុះមកជួសជុលបន្ទាន់ «ពួកគាត់បានជួសជុលរួចរាល់ហើយ ប៉ុន្ដែខ្ញុំមិនដឹងជាមូលហេតុអ្វីទេ បានជាវាឆាបឆេះនៅពេលយប់ទៅវិញ ព្រោះពេលយប់អាជីវករយើងគាត់តែងបិទភ្លើង តែថ្ងៃហ្នឹងប្រហែលមានអ្នកភ្លេចបិទភ្លើងហើយ»។
អ្នកស្រី ដួង សុភក្ដិ ជាម្ចាស់ហាងលក់ទូរស័ព្ទនៅជាប់ផ្សារនេះបានថ្លែងថា ផ្ទះអ្នកស្រីនៅជិតផ្សារនោះ ប៉ុន្ដែភ្លើងមិនឆេះដល់ទេ។ មុនពេលភ្លើងឆេះ អ្នកស្រីបានឃើញអណ្ដាតភ្លើងចេញពីតូបមួយនៅចំកណ្ដាលផ្សារ ប៉ុន្ដែអ្នកស្រីមិនបានស្គាល់តូបលេខប៉ុន្មានទេ។
អ្នកស្រីបន្តថា ភ្លាមៗនោះ នគរបាលប៉ុស្ដិ៍ព្រែកត្នោត បានសុំជំនួយអន្តរាគមន៍ពីថ្នាក់ស្រុក និងខេត្តដើម្បីជួយពន្លត់ ប៉ុន្ដែរថយន្តសង្គ្រោះស្រុកទឹកឈូមានចំនួនតិច រង់ចាំជំនួយមកពីខេត្ត និងស្រុកព្រៃនប់ ខេត្តព្រះសីហនុទៀតទើបយឺតយ៉ាវ «ផ្សារហ្នឹងគេធ្វើពីឈើប្រក់ស័ង្កសី ដល់ពេលមានអគ្គិភ័យកើតឡើងអ៊ីចឹងទៅ គឺវាឆេះលឿនណាស់ ហើយឡានទឹកក៏មកយឺតទៀត ព្រោះនៅឆ្ងាយៗ អ៊ីចឹងក៏ពិបាកបន្ទោសគាត់ដែរ»៕