.jpg)
អ្នកជួញដូរ និងប្រើគ្រឿងញៀនពេលចាប់ខ្លួនបាន។ រូប Norkorwat News
ពោធិ៍សាត់ៈ នគរបាលប្រឆាំងគ្រឿងញៀនកំពុងបន្តសាកសួរបុរសជនសង្ស័យ ៤ នាក់ នៅស្នងការដ្ឋាននគរបាលខេត្តពោធិ៍សាត់កាលពីម្សិលមិញ បន្ទាប់ពីឃាត់ខ្លួនពាក់ព័ន្ធករណីជួញដូរគ្រឿងញៀនប្រភេទមេតំហ្វេតាមីនចំនួន ២៤ កញ្ចប់តូចធំកាលពីថ្ងៃទី ១៩ កញ្ញា នៅភូមិរវៀង ឃុំសំរោង ស្រុកភ្នំក្រវាញ ខេត្តពោធិ៍សាត់។
លោក ស៊ី សាវិន នាយការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តពោធិ៍សាត់ប្រាប់ពីម្សិលមិញថា ជនទាំង ៤ នាក់នោះ ទី១- ឈ្មោះ សេក គឹមសឿន អាយុ ៤១ ឆ្នាំ ទី២- ឈ្មោះ កុយ កែម អាយុ ២៩ ឆ្នាំ ទី៣- ឈ្មោះ សោម សំរេច អាយុ ៤០ ឆ្នាំ។ ពួកគេទាំង ៣ នាក់រស់នៅភូមិអង្គ្រង ឃុំសំរោង ស្រុកភ្នំក្រវាញ ខេត្តពោធិ៍សាត់ និងទី៤- ឈ្មោះ មឿន រិន អាយុ ៣០ ឆ្នាំរស់នៅភូមិរវៀង ឃុំសំរោង។
លោកថ្លែងថា៖ «ខ្ញុំទុកពួកគេទាំង ៤ នាក់ នៅការិយាល័យខ្ញុំមិនទាន់លើសកំណត់ឃុំខ្លួន ២៤ ម៉ោងទេ។ ឥឡូវខាងជំនាញខ្ញុំកំពុងបន្តសួរពួកគេនៅថ្ងៃនេះទៀត (ថ្ងៃ ២១ កញ្ញា) និងរៀបចំឯកសារដើម្បីបញ្ជូនទៅតុលាការខេត្ត»។
លោកបន្តថា ចំពោះវត្ថុតាងដែលដកហូតបានរួមមានម្សៅក្រាមពណ៌សថ្លា ២៤ កញ្ចប់ (ធំ ៦ កញ្ចប់ និងតូច ១៨ កញ្ចប់) ទូរស័ព្ទដៃ ១០ គ្រឿង ម៉ូតូ ៤ គ្រឿង រណារយន្ត ២ គ្រឿង និងឈើអារចម្រុះ ១១៣ ដុំ។
លោក ហ៊ុន ចាន់ធា នាយផ្នែកនគរបាលស្រុកភ្នំក្រវាញប្រាប់ពីម្សិលមិញដែរថា បទល្មើសនេះមានតែឈ្មោះ សេក គឹមសឿន ប៉ុណ្ណោះ ជាអ្នកចែកចាយ រីឯ ៣ នាក់ទៀតជាអ្នកប្រើប្រាស់។
លោកឲ្យដឹងថា ការបង្ក្រាបនេះគឺសមត្ថកិច្ចជំនាញស្រុកភ្នំក្រវាញជាអ្នកចុះអនុវត្តផ្ទាល់ ដោយដំបូងចាប់បានឈ្មោះ សេក គឹមសឿន ពេលគេកំពុងរៀបចំចែកចាយថ្នាំញៀនដលអ្នកប្រើ។
លោកថា៖ «បន្ទាប់ពីឃាត់បានមេចែកចាយហើយ សមត្ថកិច្ចយើងបានឲ្យជនសង្ស័យនាំទៅចាប់បានអ្នកប្រើប្រាស់ ៣ នាក់ទៀត...ករណីគ្រឿងញៀនបង្កបញ្ហាច្រើនយ៉ាងណាស់ មិនត្រឹមតែបំផ្លាញខ្លួនឯង និងគ្រួសារទេ តែវាប៉ះពាល់ដល់សន្តិសុខសណ្តាប់ធ្នាប់សង្គមផង»។
តាមរបាយការណ៍ស្តីពីលទ្ធផលបង្ក្រាបគ្រឿងញៀនរបស់ក្រសួងមហាផ្ទៃបង្ហាញថា ក្នុងរយៈពេល ៦ ខែដើមឆ្នាំនេះ សមត្ថកិច្ចបង្ក្រាបបានជាង ៤ ពាន់ករណីដែលកើន ២៧ ភាគរយ ធៀបនឹងរយៈពេលដូចគ្នាកាលពីឆ្នាំ ២០១៩។
ជាមួយគ្នានេះឃាត់ខ្លួនជនល្មើសបានជាង ៨ ពាន់នាក់ កើនលើស ២៦ ភាគរយក្នុងនោះរួមមាន ជនជាតិខ្មែរ ៨ ៣៦៩ នាក់ វៀតណាម ៩៦ នាក់ ជនជាតិឡាវ ២ នាក់, ថៃ ៣ នាក់, ជនជាតិចិន ១៣ នាក់, មីយ៉ាន់ម៉ាម្នាក់ ឥណ្ឌូនេស៊ីម្នាក់, សិង្ហបុរីម្នាក់, ជប៉ុនម្នាក់ និងជនជាតិនីហ្សេរីយ៉ាម្នាក់៕
