The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​កំពុង​សាកសួរ​ពលរដ្ឋ​ ១៥ ​នាក់​ បន្ទាប់ពី​ឆែក​ឃើញ​អាវុធ




សមត្ថកិច្ច​កំពុង​សាកសួរ​ពលរដ្ឋ​ ១៥ ​នាក់​ បន្ទាប់ពី​ឆែក​ឃើញ​អាវុធ

Content image - Phnom Penh Post
អាវុធ​មួយ​ចំនួន​ ដែលសមត្ថកិច្ចឆែកឃើញ។ សហការី

សមត្ថកិច្ច​កំពុង​សាកសួរ​ពលរដ្ឋ​ ១៥ ​នាក់​ បន្ទាប់ពី​ឆែក​ឃើញ​អាវុធ

ព្រះសីហនុៈ សមត្ថកិច្ច​ខេត្ដ​ព្រះសីហនុ​កំពុង​សាកសួរ​ពលរដ្ឋ​ចំនួន​ ១៥ នាក់​ដែល​បាននាំគ្នា​ទៅ​ចាប់ដី​រដ្ឋ​រស់នៅ បន្ទាប់ពី​សមត្ថកិច្ច​បាន​ចុះទៅ​ត្រួតពិនិត្យ​ដល់ទី​កន្លែង​ដែល​ស្ថិត​ក្នុង​ភូមិ​គគីរ ឃុំ​បិតត្រាង ស្រុក​ព្រៃនប់​កាលពី​ព្រឹក​ម្សិលមិញ ដោយ​រកឃើញ​អាវុធ​មួយ​ចំនួន​មាន ដាវ កាំបិត ចម្ពាមកៅស៊ូ និង​កាំភ្លើង​កែច្នៃ​។

លោក ជួន ណារិន្ទ ស្នងការ​ខេត្ដ​ព្រះសីហនុ​ប្រាប់​ភ្នំពេញប៉ុស្ដិ៍​កាលពី​ម្សិលមិញ​ថា ក្រោយ​លោក​អភិបាលខេត្ដ​បាន​ទទួល​ដំណឹង​ថា នៅ​ទីតាំង​កើតហេតុ​ខាង​លើ​មាន​ការ​ផ្ទុះអាវុធ​កាលពី​ថ្ងៃ​ទី​ ១៣ ខែ​​ វិច្ឆិកា ដល់​ព្រឹក​ថ្ងៃទី​ ១៤ ខែ វិច្ឆិកា លោក​អភិបាលខេត្ដ​បាន​បញ្ជា​ឲ្យ​កម្លាំង​សមត្ថកិច្ច​ចុះ​ទៅ​ធ្វើ​រដ្ឋបាល​ត្រួតពិនិត្យ​ដល់​ទីកន្លែង​ពលរដ្ឋ​រស់នៅ​ក៏​បាន​រកឃើញ​អាវុធ​មួយ​ចំនួន ទើប​ឈាន​ដល់​ការឃាត់ខ្លួន​ពលរដ្ឋ​ជា​ជនសង្ស័យ​ចំនួន​ ១៥ ​នាក់​ មក​សាកសួរ​នៅ​ស្នងការ​នគរបាល​ខេត្ដ​ព្រះសីហនុ​។

លោក​ថ្លែងថា​៖ «​ដូច្នេះ​យើង​ក៏បាន​ចុះ​ទៅ​ធ្វើ​រដ្ឋបាល​នៅ​កន្លែង​នោះ​គឺ​មិន​មាន​ការផ្ទុះ​អាវុធ​ផ្ទុះ​អី​ទេ​។ ក្រោយពេល​យើង​ចុះ​ធ្វើ​រដ្ឋបាល​ក៏​យើង​ត្រួតពិនិត្យ​ឃើញ​មនុស្ស​មួយចំនួន​មាន​ដាវ​សាមូរ៉ៃ​មាន​ពូថៅ កាំបិត ចម្ពាម និង​កាំភ្លើង​កែច្នៃ ទើប​យើង​ប្រមូល​យក​មក​មាន​ ១៥ ​នាក់ ​មក​ធ្វើការ​សាកសួរ​»​។ បើ​តាម​លោក​ ណារិន្ទ ការចុះទៅ​ត្រួតពិនិត្យ​របស់​កម្លាំង​សមត្ថកិច្ច​គឺ​មិន​មាន​ការផ្ទុះអាវុធ​នោះទេ ប៉ុន្ដែ​មាន​អ្នកសារព័ត៌មាន​មួយ​ចំនួន ពួកគាត់​ចូលចិត្ដ​យកទៅ​បំភ្លៃ​។

លោកស្នងការ​មិន​ទាន់​អាច​បញ្ជាក់​បាន​ថា ពលរដ្ឋ​ដែល​មក​រស់នៅ និង​មាន​រក្សាទុក​អាវុធ​ផ្សេងៗ​នោះ​រស់នៅ​លើដី​របស់​រដ្ឋ​ ឬ​បែប​ណា​នៅឡើយ​ទេ ប៉ុន្ដែ​លោក​ថា បើ​ពលរដ្ឋ​មាន​សកម្មភាព​បង្ក​ឲ្យ​មាន​ភាពអសន្តិសុខ​បែបនេះ​គឺ​ត្រូវតែ​ធ្វើការ​ឃាត់ខ្លួន​មក​សាកសួរ​ដើម្បី​ថែរក្សា​សន្តិសុខ​។

លោក​ សរ កក្កដា អភិបាលស្រុក​ព្រៃនប់​ដែល​បាន​ចូលរួម​ដឹកនាំ​កម្លាំង​សមត្ថកិច្ច​ចុះ​ត្រួតពិនិត្យ​ដល់​កន្លែង​ដែល​ពលរដ្ឋ​រស់នៅ និង​ឈានដល់​ឃាត់ខ្លួន​កាលពី​ម្សិលមិញ​បាន​បដិសេធ​ធ្វើការ​បកស្រាយ​ដោយ​បង្វែរ​ឲ្យ​សួរ​ទៅ​រដ្ឋបាល​ខេត្ដ​ព្រះសីហនុ​។

លោក ឃាង ភារម្យ អ្នក​នាំពាក្យ​រដ្ឋបាល​សាលា​ខេត្ដ​ព្រះសីហនុ​បាន​ថ្លែងថា លោក​មិនទាន់​ទទួល​បាន​ព័ត៌មាន​លម្អិត​នៅឡើយ​ទេ គិត​ត្រឹម​ល្ងាច​ថ្ងៃ​ព្រហស្បតិ៍​ម្សិលមិញ​។ លោក​បញ្ជាក់​ថា​៖​ «​មាន​ករណី​នេះ​បាន​កើតឡើង ប៉ុន្ដែ​ខ្ញុំ​មិនទាន់​មាន​ព័ត៌មាន​លម្អិត​នៅ​ឡើយ​ទេ ព្រោះ​កំពុង​ស្ថិត​នៅ​នីតិវិធី​របស់​សមត្ថកិច្ច​កំពុង​សាកសួរ​នៅឡើយ​»​។ ប៉ុន្ដែ​លោក​បញ្ជាក់​ថា តំបន់​ដែល​ពលរដ្ឋ​រស់នៅ និង​មាន​រក្សាទុក​អាវុធ​នោះ​គឺជា​តំបន់​គម្រប​ព្រៃឈើ គ្រប់គ្រង​ដោយ​ក្រសួង​កសិកម្ម រុក្ខាប្រមាញ់ និង​នេសាទ​ដែល​ជា​ដី​របស់​រដ្ឋ​។

លោក ភារម្យ បញ្ជាក់​ថា​៖ «​ចំពោះ​ការ​ទៅកាន់​កាប់ ការ​ទៅ​ទន្ទ្រាន កាប់ឆ្ការ រហូតដល់​មានការ​ប្រដាប់​ដោយ​អាវុធ មាន​កាំបិត ពូថៅ ផ្សេងៗ​នោះ គឺជា​ទង្វើ​មិន​ស្របច្បាប់​។ ដូច្នេះ​ការងារ​នេះ​គឺ​កំពុង​ស្ថិត​នៅក្នុង​នីតិវិធី​សមត្ថកិច្ច យើង​រង់ចាំ​របាយការណ៍​លម្អិត​ពី​សមត្ថកិច្ច​ថា តើ​រឿងហេតុ​នោះ​វា​យ៉ាងម៉េច​»​។

លោក សុខ សុខុម ​ប្រធាន​អង្គការ​ស្រាវជ្រាវ​ជាតិ​កម្ពុជា (CNRO) លើកឡើង​ថា ដី​ដែល​ពលរដ្ឋ​ទៅ​រស់នៅ​ទីតាំង​ខាងលើ​ជា​ដី​របស់​រដ្ឋ ប៉ុន្ដែ​មាន​ពលរដ្ឋ​មួយចំនួន​បាន​ទៅ​ចាប់ដី​រស់នៅ​រហូត​ដល់​មាន​ការដណ្ដើម​ដី​គ្នា ឈាន​ដល់​ការផ្ទុះអាវុធ​រវាង​ពលរដ្ឋ និង​ពលរដ្ឋ​។ «​ខ្ញុំ​មិន​គាំទ្រ​ចំពោះ​សកម្មភាព​ដែល​ពលរដ្ឋ​ទាំងនោះ​បានធ្វើ​ទេ​។ ក្រុម​នោះ​ជា​ក្រុម​ពួក​បាញ់បោះ​ឃើញ​សមត្ថកិច្ច​ចុះទៅ​ចាប់​នោះ​។ ដី​នោះ​ជា​ដី​ស្ថិត​នៅ​តំបន់​ពយម៉ាចូវ ដី​នោះ​ជា​ដី​រដ្ឋ​ស្ថិត​នៅក្នុង​តំបន់​គម្រប​ព្រៃឈើ​»៕

អត្ថបទគួរចាប់អារម្មណ៍