មណ្ឌលគិរីៈ សមត្ថកិច្ចនគរបាលខេត្តមណ្ឌលគិរីកំពុងសាកសួរមនុស្ស ៤ នាក់ (ជាប្ដីប្រពន្ធ) ពាក់ព័ន្ធករណីលួចដាំដើមកញ្ឆាចំនួនជិត ៧ ០០០ ដើម មានទីតាំងស្ថិតនៅចំណុចអូរទេរ ក្នុងភូមិពូហ្យាម ឃុំសែនមនោរម្យ ស្រុកអូររាំង ក្រោយពីសមត្ថកិច្ចបានចុះបង្ក្រាបដល់ទីតាំង និងធ្វើការបំផ្លាញចោលកាលពីថ្ងៃទី ៤ ខែមេសា។
អធិការនគរបាលស្រុកអូររាំង លោក វ៉ាន់ ដានីន នៅថ្ងៃទី ៥ មេសានេះបានបដិសេធបំភ្លឺជុំវិញករណីនេះ ដោយលោកគ្រាន់តែថា ឥឡូវនេះកំពុងស្ថិតក្នុងការស្រាវជ្រាវបន្ថែមដោយសមត្ថកិច្ចកំពុងសាកសួរព័ត៌មានពីម្ចាស់ដីដែលពួកគាត់ជាបងប្អូនជនជាតិដើមភាគតិចព្នង។
លោកថា៖ «សូមអធ្យាស្រ័យជុំវិញរឿងនេះយើងកំពុងធ្វើការស្រាវជ្រាវរកមេខ្លោងនៅពីក្រោយការដាំដើមកញ្ឆានេះ អីចឹងអត់ទាន់អាចបញ្ជាក់យ៉ាងណាបានទេ។
ក៏ប៉ុន្តែតាមរបាយការណ៍របស់សមត្ថកិច្ចនគរបាលប្រឆាំងគ្រឿងញៀនខេត្តមណ្ឌលគិរីបានឲ្យដឹងថា ទីតាំងដាំដុះដំណាំកញ្ឆាចំនួនទាំង ២ ទីតាំង ស្ថិតនៅចំណុចអូរទេរ[អូរក្បាលព្រះព្រំប្រទល់ជាប់ក្រុងសែនមនោរម្យ ក្នុងភូមិពូហ្យាម ឃុំសែនមនោរម្យ ស្រុកអូររាំងខេត្តមណ្ឌលគិរី។ ទីតាំងទី១ មានផ្ទៃដីទំហំ ១៥ ម៉ែត្រគុណ ១២០ ម៉ែត្រ និងទីតាំងទី២ មានផ្ទៃដីទំហំ ១០ ម៉ែត្រគុណ ១៥ ម៉ែត្រ។
ក្នុងប្រតិបត្តិការបង្ក្រាបនេះកម្លាំងជំនាញបានដកហូតវត្ថុតាងទាំង ២ ទីតាំង រួមមានដំណាំកញ្ឆាសរុបចំនួន ៦ ៩១០ ដើម [បំផ្លាញចោលនៅហ្នឹងកន្លែង] ធុងបាញ់ថ្នាំចំនួន ១ ធុងស្រោចទឹកចំនួន ១ ម៉ាស៊ីនប៉ូមទឹកចំនួន ២ គ្រឿង និងចបចាំងស្មៅចំនួន ៣។
លោក ស៊ុម សោភ័ណ្ឌ ស្នងការរងទទួលបន្ទុកផែនប្រឆាំងគ្រឿងញៀននៃស្នងការដ្ឋាននគបាលខេត្តមណ្ឌលគិរីប្រាប់ ភ្នំពេញ ប៉ុស្តិ៍ នៅថ្ងៃ ៥ មេសានេះថា ករណីនេះមានពលរដ្ឋបានរាយការណ៍ទៅសមត្ថកិច្ចហើយក្រោយពីមានបញ្ជាពីលោកស្នងការកម្លាំងចម្រុះចុះទៅពិនិត្យដល់កន្លែងដាំ។
លោកបានថ្លែងថា៖ «មានប្រជាពលរដ្ឋរាយការណ៍ថា មានដំណាំមួយប្រភេទដូចជាមិនដែលឃើញ អ៊ីចឹងលោកស្នងការបានបញ្ជាឲ្យខាងសមត្ថកិច្ចយើងចុះទៅពិនិត្យមើលទើបដឹងថា នោះជាដំណាំកញ្ឆាហើយគាត់ក៏បញ្ជាឲ្យបំផ្លាញចោលតែម្តងទៅ»។
លោក សោភ័ណ្ឌ ប្រាប់ថា នៅពេលសមត្ថកិច្ចបានចុះទៅដល់កន្លែងដាំមិនបានរកឃើញម្ចាស់ដីនោះទេ ប៉ុន្តែក្រោយមកសមត្ថកិច្ចបានទាក់ទងទៅពួកគាត់បានហើយពួកកាត់ក៏ចូលខ្លួនមកបំភ្លឺ ជុំវិញរឿងដាំដើមកញ្ឆានេះ។
លោកថា៖ «ពេលថ្ងៃគាត់មិននៅយើងចុះទៅអត់បានជួបគាត់ទេ ដល់ពេលក្រោយពីគាត់ចូលមកវិញយើងទាក់ទងបានទៅក៏ហៅពួកគាត់មកបំភ្លឺនៅស្នងការដ្ឋាន។ ពួកគាត់ជាប្រជាពលរដ្ឋបានចូលរួមសហការដោយធ្វើដំណើរមកអង្គភាពយើងទាំងយប់មកសម្រាកនៅកន្លែងយើងហើយព្រឹកឡើងថ្ងៃទី ៥ មេសា ហ្នឹងបានបន្តការសាកសួរពួកគាត់»។
តាមរយៈការសាកសួរពលរដ្ឋ ៤ នាក់ ដែលជាម្ចាស់ដីលោក សោភ័ណ្ឌ បញ្ជាក់ថា ជនសង្ស័យជាមេខ្លោងក្នុងការដាំដើមកញ្ឆានេះ គឺមនុស្សមកពីខេត្តផ្សេង [ខេត្តតាកែវ] ដោយបានលាក់អត្តសញ្ញាណហើយទៅបោកប្រាស់ប្រជាពលរដ្ឋឲ្យដាំដើមកញ្ឆា នៅក្នុងចម្ការដំណាំហូបផ្លែដែលប្រជាពលរដ្ឋកំពុងដាំដែលមានត្រប់ត្រឡាចល្ពៅជាដើម ដោយកុហកថា ជាដើមស្បៃរឿង និងស្ពៃបារាំង។ «ពលរដ្ឋ ៤ នាក់ហ្នឹង ប្រពន្ធមិនសូវដឹងប៉ុន្មានទេ គាត់បានដាំតែត្រប់ល្ពៅ អីហ្នឹងទេ ព្រោះជនសង្ស័យមកទាក់ទងតែប្តី ដោយកុហកថា ជាដំណាំស្បៃរឿង និងស្ពៃបារាំង ដាក់ដាំចន្លោះៗដំណាំរបស់ពួកគាត់ដាំហូបផ្លែហ្នឹង»។
បើតាមលោក សោភ័ណ្ឌ ជនសង្ស័យជាមេខ្លោងនៅពីក្រោយការដាំដើមកញ្ឆានេះបានរៀបចំបច្ចេកទេសក្នុងការដាំដោយខ្លួនឯង និងបានណែនាំឲ្យប្រជាពលរដ្ឋចូលរួមដាំដោយអះអាងប្រាប់ពលរដ្ឋថា ដំណាំនោះមានទីផ្សារខ្ពស់ហើយអាចរកចំណូលបានច្រើន។
លោកថា៖ «ខាងជនសង្ស័យជាអ្នកបណ្តុះ អ្នកដាំអ្នកអីទាំងអស់ទេ ក្នុង ១ ខែគេទៅមើលម្តង ២ ដងអ៊ីចឹងទៅ។ អ៊ីចឹងពីទីតាំងហ្នឹង ទីតាំងទី១ វារាងធំបន្តិច អាហ្នឹងគាត់ជួយគ្នាដាំជាមួយជនសង្ស័យ ចំណែកកន្លែងទីតាំងទី២ វារាងតូច ជនសង្ស័យគាត់ទៅដាំតែម្នាក់ឯង»៕