ព្រះសីហនុៈ សមត្ថកិច្ចកងរាជអាវុធហត្ថខេត្តព្រះសីហនុកំពុងសាកសួរជនជាតិចិនចំនួន ៧ នាក់ បន្ទាប់ពីចាប់ខ្លួនបានកាលពីម្សិលមិញពាក់ព័ន្ធនឹងករណីចាប់ជនជាតិចិនដូចគ្នាចំនួន ១០ នាក់ បង្ខាំងធ្វើទារុណកម្មជំរិតទារប្រាក់ប្រព្រឹត្តនៅភូមិ ៣ សង្កាត់ ១ ក្រុងព្រះសីហនុ ខណៈក្រុមជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត។
ករណីនេះបានកើតឡើងនៅក្នុងទីតាំងបុរី ១ កន្លែង តែត្រូវបានបង្ក្រាបដោយកងរាជអាវុធហត្ថខេត្តព្រះសីហនុសហការជាមួយព្រះរាជអាជ្ញាតុលាការខេត្ត។ ការបង្ក្រាបនេះសមត្ថកិច្ចក៏បានរឹបអូសវត្ថុតាងមួយចំនួនដូចជា ខ្នោះដៃចំនួន ១០ ខ្នោះជើងចំនួន ៤ ក្រណាត់រុំមុខចំនួន ២ និងកាំបិតប៉័ងតោចំនួន ១។
លោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុកាលពីថ្ងៃម្សិលមិញមិនបានបញ្ជាក់បន្ថែមអំពីករណីនេះទេ ដោយលោកបង្វែរឱ្យទៅសួរលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសវិញ ប៉ុន្តែលោក អេង ហ៊ី បានជំរុញបន្តឱ្យទៅសួរខាងអយ្យការតុលាការដោយលោកអះអាងថា ខាងអយ្យការជាអ្នកដឹកនាំបង្ក្រាបករណីនេះ។
លោក លឹម ប៊ុនហេង ព្រះរាជអាជ្ញារង និងអ្នកនាំពាក្យអយ្យការអមសាលាដំបូងខេត្តព្រះសីហនុបានប្រាប់ថា ជនជាតិចិនទាំងនេះកំពុងត្រូវបានសាកសួរនៅបញ្ជាការដ្ឋានកងរាជអាវុធហត្ថខេត្តនៅឡើយ ហើយមិនទាន់បានបញ្ជូនមកតុលាការនៅឡើយទេ។
លោកបន្តថា ដោយសារពេលនេះការស៊ើបអង្កេតមិនទាន់បញ្ចប់ ដូច្នោះលោកមិនអាចបញ្ជាក់បន្ថែមបានទេ។
លោកថា៖ «ឥឡូវហ្នឹងកំពុងកសាងសំណុំរឿងនៅបញ្ជាការដ្ឋានកងរាជអាវុធហត្ថ ហើយបើតាមនីតិវិធីការឃាត់ខ្លួនដើម្បីកសាងសំណុំរឿងគឺតាមច្បាប់បានរយៈពេល ៤៨ ម៉ោង ហើយបើចាំបាច់អាចពន្យារបាន ២៤ ម៉ោងទៀត»។
កាលពីថ្ងៃទី ៣០ ខែ កញ្ញា ជនជាតិចិនចំនួន ៦ នាក់ ក៏ត្រូវបានកងរាជអាវុធហត្ថខេត្តព្រះសីហនុឃាត់ខ្លួនពីបទចាប់បង្ខាំងជនជាតិចិនដូចគ្នាចំនួន ៤ នាក់ផងដែរ នៅក្នុងភូមិ ៥ សង្កាត់លេខ ៤ ក្រុងព្រះសីហនុ។
ចាប់តាំងពី ២០១៨ មកមានជនជាតិចិនរាប់រយនាក់ត្រូវបានអាជ្ញាធរចិនបញ្ជូនយន្តហោះមកដឹកត្រឡប់ទៅប្រទេសកំណើតវិញជាបន្តបន្ទាប់ ក្រោយពីពួកគេត្រូវបានអាជ្ញាធរកម្ពុជាឃាត់ខ្លួនពីបទល្មើសផ្សេងៗ ប៉ុន្តែភាគច្រើនគឺជាបទល្មើសជំរិតទារប្រាក់ ។
លោកស្រី ជៀប សុធារី អ្នកសម្របសម្រួលសមាគមអាដហុកប្រចាំខេត្តព្រះសីហនុបានបង្ហាញក្ដីបារម្ភថា ការកើតឡើងញឹកញាប់នៃករណីចាប់បង្ខាំងមនុស្សជំរិតទារប្រាក់រវាងជនជាតិចិន និងជនជាតិចិននេះអាចជាគំរូអាក្រក់មួយជះឥទ្ធិពលដល់ពលរដ្ឋខ្មែរដែលអាចប្រព្រឹត្តតាមទង្វើបែបនេះលើខ្មែរគ្នាឯង។
លោកស្រីបានបន្តថា ជនជាតិចិនដែលធ្វើសកម្មភាពជំរិតទារប្រាក់គឺសុទ្ធតែជាអ្នកលេងល្បែងក្នុងកាស៊ីណូ ហើយបើតាមលោកស្រីសួរបុគ្គលិកខ្មែរដែលកំពុងបម្រើការតាមកាស៊ីណូនានាក្នុងខេត្តព្រះសីហនុគឺបានអះអាងថាក្រៅពីជនជាតិចិនក៏មានជនជាតិខ្មែរមួយចំនួនតូចចូលលេងដែរ។
លោកស្រីថា៖ «ខ្ញុំធ្លាប់ជួបបុគ្គលិកខ្មែរយើងដែលគាត់ធ្វើការក្នុងកាស៊ីណូធំៗទាំងអស់ហ្នឹង។ យើងសួរគាត់ថា អ្នកដែលទៅលេងក្នុងកាស៊ីណូទាំងអស់ហ្នឹងមានប្រជាពលរដ្ឋខ្មែរអត់?។ គាត់ឆ្លើយថាមានដែរគឺមួយៗ។ អ៊ីចឹង! យើងដឹងហើយ ល្បែងតែងវិនាស ហើយល្បែងតែងបង្កើតឱ្យមានបទល្មើសផ្សេងៗ»៕