ព្រះសីហនុៈ នគរបាលខេត្តព្រះសីហនុកំពុងសួរជនសង្ស័យ ៦ នាក់ពាក់ព័ន្ធករណីគេចវេះពីគោលដៅត្រួតពិនិត្យការធ្វើចត្តាឡីស័ក បន្ទាប់ពីឃាត់ខ្លួនពីថ្ងៃទី ៣១ ខែមីនា នៅចំណុចគោលដៅត្រួតពិនិត្យការធ្វើចត្តាឡីស័កលើផ្លូវជាតិ ៤ ក្នុងស្រុកកំពង់សីលា។
លោក ជួន ណារិន្ទ ស្នងការនគរបាលខេត្តព្រះសីហនុថ្លែងថា ជនសង្ស័យទាំង ៦ នាក់កំពុងត្រូវបានសមត្ថកិច្ចឃាត់ខ្លួនបណ្តោះអាសន្ននៅស្នងការដ្ឋាននគរបាលខេត្តដើម្បីបន្តតាមនីតិវិធី។ «ឥឡូវនេះមិនសម្បូររឿងអ្នកគេចចេញពីកន្លែងធ្វើចត្តាឡីស័កទេ សម្បូរតែបងប្អូនយើងមួយចំនួនចង់ទៅនេះទៅនោះទេ ព្រោះយើងអនុវត្តវិធានការម៉ឺងម៉ាត់ទៅករណីហ្នឹងក៏លែងសូវមានទេ»។
លោក ហួត ចាន់ធី អធិការនគរបាលស្រុកកំពង់សីលាថ្លែងថា កម្លាំងរបស់លោកបានឃាត់រថយន្ត ១ គ្រឿង ម៉ាកកូរ៉ូឡា ពណ៌ទឹកប៊ិកពាក់ស្លាកលេខភ្នំពេញ 2G-7227 បើកគេចពីចន្លោះគីឡូម៉ែត្រ 152-153 ចូលទៅផ្លូវល្បឿនលឿនក្នុងភូមិស្ទឹងឆាយ ឃុំកំពង់សីលា ស្រុកកំពង់សីលា ដែលមានគ្នា ៥ នាក់ បើកបរដោយជនជាតិខ្មែរ និងបុរសជនជាតិចិន ៤ នាក់ ស្លៀកពាក់បន្លំធ្វើជាក្រុមការងារផ្លូវល្បឿនលឿន។
លោកថ្លែងថា៖ «ខ្ញុំចាប់បាន ៥ នាក់ក្នុងនោះមានខ្មែរម្នាក់ជាអ្នកបើកបរបានសារភាពថា រូបគេធ្វើតាមបញ្ជាមេខ្លោងបុរសជាតិខ្មែរម្នាក់ទៀត។ បន្ទាប់មកខ្ញុំក៏បានកសាងសំណុំរឿងបញ្ជូនទៅខេត្តស្រាវជ្រាវបន្តទើបឃាត់បានមេខ្យល់ម្នាក់ទៀត អ៊ីចឹងបានសរុបទៅមាន ៦ នាក់»។
បើតាមលោក ហួន ចាន់ធី ជនសង្ស័យជាតិខ្មែរបានសារភាពថា ខ្លួនគេធ្លាប់ដឹកជនជាតិចិនពីភ្នំពេញមកខេត្តព្រះសីហនុ៣លើករួចមកហើយ។ រីឯជនជាតិចិនទាំង ៤ នាក់នោះបានឆ្លើយថា ពួកគេបានធ្វើចត្តាឡីស័ករួចហើយ ប៉ុន្តែពុំមានឯកសារបញ្ជាក់ទេ ដោយពួកគេមានបំណងទៅភ្នំពេញរួចបន្តទៅប្រទេសចិនវិញ។
តាមការផ្សាយរបស់អគ្គស្នងការដ្ឋាននគរបាលជាតិបានឱ្យដឹងថា វត្ថុតាងដែលសមត្ថកិច្ចចាប់បានមានរថយន្ត ២ គ្រឿងទី ១ ម៉ាកកូរ៉ូឡា ពណ៌ទឹកប៊ិក ពាក់ស្លាកលេខៈ ភ្នំពេញ 2G-7227 (មធ្យោបាយធ្វើសកម្មភាព) និងទី ២ ម៉ាកកាមរីឆ្លាម ពណ៌ទឹកប្រាក់ ពាក់ស្លាកលេខ ភ្នំពេញ 2T-8385 (មធ្យោបាយធ្វើសកម្មភាព)។
លោក ចាន់ធី បញ្ជាក់ថាក្នុង ១ ខែចុងក្រោយនេះលោកឃាត់បានករណីគេចវេះពីគោលដៅត្រួតពិនិត្យការធ្វើចត្តាឡីស័កបាន ២ លើកដោយលើកទី ១ ឃាត់បានស្ត្រីជាតិចិនម្នាក់ ប៉ុន្តែលោកមិនបានចាំថ្ងៃណានោះទេ ចំណែកលើកទី ២ គឺចាប់បាន ៥ នាក់នៅថ្ងៃទី ៣១ ខែមីនា ដែលមានខ្មែរម្នាក់ និងជនជាតិចិន ៤ នាក់៕