.jpg)
ក្រុមជនជាតិចិនក្រោយសមត្ថកិច្ចឃាត់ខ្លួននៅកំពង់ស្ពឺ។ សហការី
កំពង់ស្ពឺៈ បុរសជាជនជាតិចិន ១៨ នាក់ ក្នុងនោះមានចិនតៃវ៉ាន់ ១២ នាក់ កំពុងត្រូវបានសមត្ថកិច្ចជំនាញសាកសួរនៅស្នងការដ្ឋាននគរបាលខេត្តកំពង់ស្ពឺ បន្ទាប់ពីចាប់ខ្លួនពួកគេកាលពីថ្ងៃទី ១៧ កក្កដា នៅភូមិចារ ឃុំស្វាយចចឹប ស្រុកបសេដ្ឋ ដោយសង្ស័យពាក់ព័ន្ធករណីជំរិតទារប្រាក់តាមអ៊ីនធឺណិត។
លោក អ៊ុំ ចំរើន អធិការនគរបាលស្រុកបសេដ្ឋបានប្រាប់ថា បុរសជនជាតិចិនទាំង ១៨ នាក់នោះ ត្រូវបានសមត្ថកិច្ចនគរបាលខេត្តកំពង់ស្ពឺបង្ក្រាបបាននៅវេលាម៉ោងជាង ១០ ថ្ងៃទី ១៧ ខែ កក្កដា ឆ្នាំ ២០១៩ ក្នុងនោះមានជនជាតិចិនតៃវ៉ាន់ចំនួន ១២ នាក់។
លោកបានប្រាប់ថា ពួកគេទាំង ១៨ នាក់នោះ មានអាយុចន្លោះពី ២០ ទៅជាង ៣០ ឆ្នាំប៉ុន្តែគិតតាំងពីថ្ងៃចាប់ខ្លួនរហូតទល់ថ្ងៃទី ១៨ កក្កដា គឺលោកនៅមិនទាន់ដឹងថា ពួកគេបានប្រព្រឹត្តបទល្មើសអ្វីមួយឲ្យបានច្បាស់លាស់ទេ ព្រោះពួកគេកំពុងត្រូវបានឃុំខ្លួនបណ្តោះអាសន្ននៅស្នងការដ្ឋាននគរបាលខេត្តកំពង់ស្ពឺ ដើម្បីសួររកមូលហេតុពិត។
លោកថា ចំពោះទីតាំងដែលក្រុមជនសង្ស័យយកធ្វើជាការិយាល័យធ្វើការនោះ មិនមែនជារោងចក្រ ឬជាកន្លែងធ្វើសិប្បកម្ម អីទេ តែរបៀបជាផ្ទះការិយាល័យ ហើយពេលសមត្ថកិច្ចចូលទៅពិនិត្យទីនោះ ឃើញមានកុំព្យូទ័រយួរដៃមួយចំនួនផង។
លោកប្រាប់ថា ទីតាំងដែលពួកគេយកធ្វើជាកន្លែងប្រព្រឹត្តបទល្មើសនោះ គឺមានជនជាតិខ្មែរ បានជួលពីម្ចាស់ដីផ្ទាល់ហើយយកទៅជួលបន្តឲ្យក្រុមជនសង្ស័យជាតិចិនទាំងនោះដោយពួកគេបានស្នាក់នៅទីនោះបានប្រហែលជាង២ខែមកហើយ។រីឯអ្នកមានសិទ្ធិចូលទីតាំងនោះបាន គឺមានតែជនជាតិចិនគ្នាគេប៉ុណ្ណោះ។
លោកថា៖ «ក្រុមជនជាតិចិនទាំងនោះចូលមកនៅគ្មានប្រាប់អាជ្ញាធរឲ្យដឹងទេ ហើយក៏គ្មានសុំច្បាប់អីដែរ ប៉ុន្តែសមត្ថកិច្ចយើងដឹង ដោយសារពលរដ្ឋសង្ស័យ ហើយប្រាប់យើង រួចយើងក៏ដាក់បណ្តាញស៊ើបឃើញមានចិនមែន»។
លោកបានបញ្ជាក់ថា ចំពោះក្រុមជនសង្ស័យពាក់ព័ន្ធនឹងការជំរិតទារប្រាក់ឬមួយយ៉ាងណានោះលោកក៏មិនទាន់ដឹងច្បាស់ដែរ លុះណាតែមានការសួរចម្លើយចប់របស់ស្នងការដ្ឋានគរបាលខេត្តទើបដឹង។
ទោះយ៉ាងណា លោក សំ សាមួន ស្នងការនគរបាលខេត្តកំពង់ស្ពឺដែលជាអ្នកទទួលការងាររួមនោះបានប្រាប់កាលពីម្សិលមិញថា ករណីនេះ លោកមិនបានដឹងទេ ខណៈលោក ញ៉ែម សៅ ស្នងការរងទទួលផែនកណ្តាលសន្តិសុខនៃស្នងការដ្ឋានគរបាលខេត្តកំពង់ស្ពឺក៏ប្រាប់ថាលោកមិនដឹងដូចគ្នា។
ក៏ប៉ុន្តែបើតាម លោក សម សាក នាយការិយាល័យព្រហ្មទណ្ឌកម្រិតធ្ងន់ខេត្តបានប្រាប់ថា សមត្ថកិច្ចរបស់លោកក៏បានចុះប្រតិបត្តិការបង្ក្រាបជនជាតិចិនទាំងនោះដែរ ប៉ុន្តែលោកបានប្រគល់ក្រុមជនសង្ស័យទៅឲ្យខាងកណ្តាលសន្តិសុខនៃស្នងការដ្ឋាននគរបាលខេត្ត កំពង់ស្ពឺរួចហើយ។
លោកបានបញ្ជាក់ថា៖ «រឿងនេះខ្ញុំមិនអាចផ្តល់ព័ត៌មានជូនបានទេ ព្រោះខាងការិយាល័យខ្ញុំប្រគល់ឲ្យខាងកណ្តាលសន្តិសុខហើយ»។
តាមកំណត់ហេតុរបស់សមត្ថកិច្ចបង្ហាញថា វត្ថុតាងដែលរឹបអូសបាន រួមមាន៖ កុំព្យូទ័រឡេបថប់ ៥ គ្រឿង, ទូរស័ព្ទដៃម៉ាកអាយហ្វូនចំនួន ២១ គ្រឿង, អុបប៉ូ ១ គ្រឿង, សាំស៊ុង ១ គ្រឿង, ណូគា ៦ គ្រឿង, អាយផេត ៤ គ្រឿង, ដេសថប់ ១ គ្រឿង, ព្រីនធើរ ២ គ្រឿង, ដុំ WifI ២ គ្រឿង, ស្ទិកឃើរ ១ គ្រឿង, ទូរស័ព្ទលើតុ ៣៣ គ្រឿង (ថ្មី ៨ គ្រឿង), អាយកូម ៦ គ្រឿង និងលុយដុល្លារក្លែងក្លាយចំនួន ២ ដុំស្មើនឹង ៥២ សន្លឹក ៕
