.jpg)
ជនសង្ស័យដែលត្រូវបានសមត្ថកិច្ចឃាត់ខ្លួន បន្ទាប់ពីទន្ទ្រានយកដីដែនជម្រកសត្វព្រៃភ្នំសំកុស។ រូបថត Pursat Provincial Hall
ពោធិ៍សាត់ៈ មន្ត្រីជំនាញនៃមន្ទីរបរិស្ថានខេត្តពោធិ៍សាត់កំពុងសាកសួរបុរសម្នាក់ដែលអួតអាងថា ជាទាហានផ្កាយ ២ នៃក្រុមអង្គរក្សហើយបានទៅកាប់ទន្ទ្រានយកដីព្រៃក្នុងតំបន់ដែនជម្រកសត្វព្រៃភ្នំសំកុសអស់ជិត ៤០ ហិកតា មកធ្វើជាកម្មសិទ្ធិផ្ទាល់ខ្លួន តែត្រូវបានកម្លាំងសមត្ថកិច្ចចម្រុះស្រុកវាលវែងឃាត់ខ្លួនកាលពីរសៀលថ្ងៃចន្ទ។
លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់បានប្រាប់ភ្នំពេញប៉ុស្ដិ៍ នៅថ្ងៃទី ២៥ សីហា នេះថា បុរសជាប់សង្ស័យខាងលើនេះឈ្មោះ សេ ចំរើន អាយុ ៤២ ឆ្នាំ មានលំនៅភូមិស្ទឹងដាច់ ឃុំបវេល ស្រុកបវេល ខេត្តបាត់ដំបង។ នៅពេលឃាត់ខ្លួននោះជនសង្ស័យមិនមានស្លៀកពាក់ឯកសណ្ឋានទេ ហើយសមត្ថកិច្ចក៏រកមិនឃើញឯកសារបញ្ជាក់ថា គាត់ជាមន្ត្រីយោធាជាន់ខ្ពស់ពាក់ផ្កាយ២ដូចការអួតអាងនោះដែរ។
លោក មរកត បានបញ្ជាក់ថា៖ «នៅពេលនេះជនសង្ស័យកំពុងស្ថិតក្រោមការស៊ើបសួរចម្លើយដោយមន្ត្រីជំនាញបរិស្ថានយើងជុំវិញករណីកាប់រានដីព្រៃប្រមាណ ៤០ ហិកតា ក្នុងតំបន់ដែនជម្រកសត្វព្រៃភ្នំសំកុស។ ជាមួយគ្នានេះជនសង្ស័យក៏កំពុងត្រូវបានក្រុមមន្ត្រីជំនាញនៃមន្ទីរយុត្តិធម៌កងរាជអាវុធហត្ថខេត្តពោធិ៍សាត់សួរចម្លើយផងដែរ ជុំវិញករណីបុគ្គរូបនេះដើរអួតអាងប្រាប់អ្នកភូមិ និងសមត្ថកិច្ចមូលដ្ឋានថា ខ្លួនជានាយទាហានពាក់ផ្កាយ ២ នៃក្រុមអង្គរក្ស»។
ជុំវិញករណីនេះដែរ លោក អ៊ុង រដ្ឋា អភិបាលរងស្រុកវាលវែង ដែលបានដឹកនាំកម្លាំងសមត្ថកិច្ចចម្រុះចុះបង្ក្រាបបទល្មើសធនធានធម្មជាតិ នៅចំណុចភូមិដំណាក់កន្សែង ឃុំប្រមោយ ស្រុកវាលវែង ជាទីដែលជនសង្ស័យបានកាប់រានព្រៃដោយខុសច្បាប់បានប្រាប់ភ្នំពេញប៉ុស្តិ៍ថា មុនឃាត់ខ្លួន ជនសង្ស័យបានដើរអួតអាងប្រាប់អ្នកភូមិ និងអាជ្ញាធរមូលដ្ឋានថា ខ្លួនជានាយទាហានពាក់ផ្កាយ ២ នៃក្រុមកងអង្គរក្ស ហើយជារឿយៗជនសង្ស័យក៏បានស្លៀកឯកសណ្ឋានជានាយទាហាន ពាក់ផ្កាយ ២ ផងដែរ។ មិនតែប៉ុណ្ណោះ ជនសង្ស័យបានញុះញង់អ្នកភូមិដែលមានជីវភាពក្រីក្រឲ្យចូលកាប់ទន្ទ្រានដីព្រៃ ក្នុងតំបន់ដែនជម្រកភ្នំសំកុសយកមកលក់ឲ្យខ្លួនក្នុងតម្លៃថោក។
លោក រដ្ឋា បានបញ្ជាក់ថា៖ «ជនង្ស័យត្រូវបានចាប់ខ្លួនក្នុងបទល្មើសជាក់ស្ដែង គឺខណៈកំពុងកាប់រាន់ដីព្រៃនៅចំណុចទីតាំងខាងលើដោយខុសច្បាប់។ក្នុងការឃាត់ខ្លួននោះ ក្រុមសមត្ថកិច្ចចម្រុះយើង ដែលមានការចូលរួមពីមន្ត្រីឧទ្យានុរក្ស និងក្រុមជំនាញការអង្គការ Wildlife Alliance បានរឹបអូសវត្ថុតាង រណារយន្តចំនួន ២ គ្រឿង និងបានរឹបអូសផ្ទៃដីព្រៃប្រមាណ ៤០ ហិកតា ឬអាចច្រើនជាងនេះ ពីជនសង្ស័យមកទុកជាទ្រព្យសម្បត្តិរបស់រដ្ឋវិញ»។
បើតាមលោក រដ្ឋា ក្រៅពីប្រព្រឹត្តបទល្មើសកាប់រុករានដីព្រៃក្នុងតំបន់ខាងលើជនសង្ស័យមានជាប់ពាក់ព័ន្ធបទល្មើសជាច្រើនទៀតដូចជាការអួតអាងថា ជានាយទាហានផ្កាយ២នៃក្រុមកងអង្គរក្សហើយដើរបោកបញ្ឆោតយកប្រាក់ពីពលរដ្ឋមួយចំនួន ជាថ្នូរនឹងការសន្យាផ្ដល់ការងារនិងតួនាទីក្នុងក្របខ័ណ្ឌក្រសួងការពារជាតិ។
យ៉ាងណាក៏ដោយ លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសនៅថ្ងៃទី ២៥ សីហា នេះ បានប្រាប់ភ្នំពេញប៉ុស្តិ៍ថា សមត្ថកិច្ចជំនាញកំពុងតែស្រាវជ្រាវពីករណីនេះ និងសុំមិនអធិប្បាយអ្វីបន្ថែមនោះទេរហូតមានការប្រកាសលទ្ធផលពីមន្ត្រីជំនាញសិន។
លោក មៀន វៀត មេភូមិស្ទឹងដាច់នៃឃុំបវេល បានប្រាប់ភ្នំពេញប៉ុស្តិ៍នៅថ្ងៃ ២៥ សីហា នេះដែរថា ជនសង្ស័យឈ្មោះ សេ ចំរើន បានចាកចេញពីភូមិជាច្រើនខែមកហើយចាប់តាំងពីមានករណីផ្ទុះជំងឺរាតត្បាតកូវីដ ១៩ មក។
លោកថា គ្មានអ្នកភូមិណាម្នាក់បានដឹងពីការងារពិតប្រាកដរបស់បុគ្គលខាងលើនោះទេ។ ប៉ុន្តែបុគ្គលនេះបានដើរអួតអាងប្រាប់គេឯងថាខ្លួនជាមេបញ្ជាការរងនៃកងអង្គរក្ស និងតែងតែស្លៀកឯកសណ្ឋានកងទ័ពនិងមានកាំភ្លើងខ្លីជាប់ខ្លួនទៀតផង។
លោក វៀត បានបញ្ជាក់ថា៖ «បុគ្គលនេះបានប្រាប់ថា គាត់ជាមេបញ្ជាការរងកងអង្គរក្ស ប៉ុន្តែមិនបានបញ្ជាក់ថា កងអង្គរក្សអ្វីឲ្យច្បាស់នោះទេ»។
ចំណែកលោក ឃុន រ៉ែន នាយនគរបាលប៉ុស្តិ៍ ឃុំប្រមោយ បានប្រាប់ភ្នំពេញប៉ុស្តិ៍ថា ជនសង្ស័យកាលពីមកបោះទីតាំងស្នាក់នៅដំបូងក្នុងភូមិដំណាក់កន្សែង បានមកទាក់ទងសុំរាប់អានគាត់ធ្វើជាបងប្អូនធម៌នឹងគ្នា និងបានប្រាប់គាត់ថា ខ្លួនជានាយទាហានផ្កាយ២នៃកងអង្គរក្ស។
លោក រ៉ែន បានបញ្ជាក់ថា៖ «កាលពីអំឡុងពេលនោះ ខ្ញុំក៏បានរាប់អានគាត់ [សេ ចំរើន] ជាបងប្អូនធម៌ ព្រោះគាត់ពាក់ឯកសណ្ឋានជានាយទាហានពាក់ផ្កាយ ២ និងមានរថយន្តទំនើបជិះ ដែលខ្ញុំមានឋានៈតូចទាប ធ្វើម៉េចនឹងអាចបដិសេធបានទៅ។ ប៉ុន្តែក្រោយមក ខ្ញុំឃើញគាត់មានសកម្មភាពមិនល្អគឺគាត់ជួលអ្នកភូមិចូលកាប់រានដីព្រៃ ខ្ញុំក៏បានហាមឃាត់គាត់ កុំឲ្យធ្វើតែគាត់មិនស្ដាប់ឡើយ ទើបខ្ញុំរាយការណ៍ប្រាប់ថ្នាក់លើឲ្យចាត់វិធានការតាមផ្លូវច្បាប់»៕
