កំពង់ស្ពឺៈ សមត្ថកិច្ចនគរបាលខេត្តកំពង់ស្ពឺកំពុងសួរនាំព្រះសង្ឃ ២ អង្គ និងជនក្លែងខ្លួនជាមន្ត្រីនគរបាល ២ នាក់ដែលបំពានបម្រាមឆ្លងកាត់រាជធានី-ខេត្តហើយត្រូវបានសមត្ថកិច្ចស្រុកបសេដ្ឋចាប់ខ្លួនកាលពីម្សិលមិញ។
តាមការផ្សាយរបស់អគ្គស្នងការដ្ឋាននគរបាលជាតិបានឲ្យដឹងថា កម្លាំងនគរបាលពិតជាបានឃាត់ខ្លួនមុខសញ្ញាចំនួន ៤ អង្គ /នាក់ ប្រាកដមែន ដោយសារតែអ្នកទាំងអស់គ្នានោះ បានធ្វើដំណើរល្មើសនឹងវិធានការរបស់រាជរដ្ឋាភិបាលដែលកំណត់មិនអនុញ្ញាត ឱ្យធ្វើចរាចរណ៍ឆ្លងកាត់ពីតំបន់មួយទៅតំបន់មួយទៀត ក្នុងអំឡងពេលនៃការបិទខ្ទប់រាជធានីភ្នំពេញ, ខេត្ដកណ្ដាល នៅចំណុចស្ពានអង្គដែកកណ្តាលស្ថិតនៅ ភូមិអង្គដែកកណ្តាល ឃុំពោធិ៍ម្រាល ស្រុកគងពិសី ខេត្តកំពង់ស្ពឺ។
ជនសង្ស័យទាំង ៤ អង្គ/នាក់ នោះពាក់ព័ន្ធបទល្មើសផ្សេងៗគ្នាក្នុងនោះសង្ឃ ២ អង្គ ត្រូវបានព្រះមេគណខេត្ដសម្រេចផ្សឹក និងប្រគល់ជូនសមត្ថកិច្ចចាត់ការតាមនីតិវិធីច្បាប់ ទី ១ ព្រះតេជព្រះគុណ នួន ចិន្តា ព្រះជន្ម ៣៩ វស្សា ជាចៅអធិការវត្តមុនីសោភ័ណ្ឌ ស្ថិតនៅឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ និងទី ២ ព្រះតេជគុណ ជឹង ម៉េងហៀក ព្រះជន្ម ៣៥ វស្សា ជាចៅអធិការវត្ត សែនឧត្តម ហៅវត្ត (បឹងសាឡាំ) ស្ថិតនៅឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ ចំណែកជនសង្ស័យ ២ នាក់ទៀត សមត្ថកិច្ចមិនបញ្ជាក់អត្តសញ្ញាណទេ។
បើតាមអគ្គស្នងការដ្ឋានវត្ថុតាងដែលសមត្ថកិច្ចដកហូតបានមានដូចជា រថយន្ត ២ គ្រឿង ដែល ១ គ្រឿងម៉ាក PRIUS ពាក់ស្លាកលេខភ្នំពេញ 2AY-7780 និង ១ គ្រឿងទៀតម៉ាក Lexus 300 2AC-1129 ។ ក្រៅពីនោះមានស្រាបៀរចំនួន ៥ កំប៉ុង -តេឡេបញ្ជា ១ គ្រាប់ -ចានអាប៉ោង ១ -គ្រាប់អាប៉ោងចំនួន ៤ គ្រាប់ ប្រាក់រៀល ១ ៥៨០០០០ រៀល និងប្រាក់ដុល្លារ 100 ដុល្លារ និង ឯកសណ្ឋាន នគរបាលជាតិ (ក្លែងឋានៈ ) ១ ឈុត។
តាមសេចក្តីសម្រេចលេខ ៤៤. សសរ សេចក្តីសម្រេចលេខ ៤៩.សសរ របស់រាជរដ្ឋាភិបាល បានហាមឃាត់ការធ្វើដំណើរឆ្លងកាត់ខេត្ត-រាជធានី និងការបិទខ្ទប់ភូមិសាស្ដ្ររាជធានីភ្នំពេញ និងក្រុងតាខ្មៅខេត្ដកណ្ដាលរយៈពេល ១៤ ថៃ្ង រហូតដល់ថ្ងៃ ទី ២៨ មេសា ដើម្បីទប់ស្កាត់ការរីករាលដាលជំងឺកូវីដ១៩។
យ៉ាងណាក្ដី ភ្នំពេញប៉ុស្តិ៍មិនអាចទាក់ទងសុំការបំភ្លឺបន្ថែមពីអាជ្ញាធរមូលដ្ឋានជុំវិញករណីនេះបានទេនៅព្រឹកនេះ៕