ឧត្ដរមានជ័យៈ នគរបាលខេត្តឧត្ដរមានជ័យកំពុងបន្តសាកសួរអតីតមន្ត្រីយោធានៅវរសេនាតូចលេខ ៤០២ ម្នាក់ដើម្បីរកអ្នកពាក់ព័ន្ធ មុននឹងបញ្ជូនទៅតុលាការ បន្ទាប់ពីឃាត់ខ្លួនករណីបង្កៃគ្រាប់ (B40) ៤ គ្រាប់ និងគ្រាប់ (DK75) ១ គ្រាប់ នៅក្រោយអនុវិទ្យាល័យរួតចំប៉ី ក្នុងភូមិរួតចំប៉ី សង្កាត់អូរស្មាច់ ក្រុងសំរោង ក្រោយពលរដ្ឋប្រទះឃើញកាលពីថ្ងៃទី ១៦ ខែ មិថុនា។
លោក ឡឹក សុខា ស្នងការរងនគរបាលខេត្តឧត្ដរមានជ័យ បានប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យពាក់ព័ន្ធការបង្កៃគ្រាប់ B40 និងគ្រាប់ DK75 នោះ ឈ្មោះ ហេង ចន្ថា ជាអតីតមន្ត្រីយោធាបម្រើការនៅអង្គភាពវរសេនាតូច ៤០២។ ប៉ុន្តែពេលនេះសមត្ថកិច្ចកំពុងស្រាវជ្រាវបន្តទៀត ដើម្បីរកអ្នកពាក់ព័ន្ធ។ រីឯជនសង្ស័យ លោកគ្រោងនឹងបញ្ជូនទៅសាលាដំបូងខេត្តមិនឲ្យលើសពី ៤៨ ម៉ោងនោះទេ។
លោកថា៖ «រឿងនេះខ្ញុំមិនទាន់ប្រាប់លម្អិតជូនបានទេ ដោយសារសមត្ថកិច្ចរបស់ខ្ញុំកំពុងធ្វើកិច្ចការនេះបន្តទៀតដែលសង្ស័យថា អាចមានជនពាក់ព័ន្ធ»។
ដោយឡែក លោក ហម ភិរម្យ អធិការនគរបាលក្រុងសំរោង ខេត្តឧត្តរមានជ័យ បានប្រាប់ដែរថា ជនសង្ស័យនោះ ត្រូវបានសមត្ថកិច្ចឃាត់ខ្លួនកាលពីរសៀលថ្ងៃទី ១៧ ខែ មិថុនា នៅក្នុងភូមិ-សង្កាត់ខាងលើ ហើយគាត់បានឆ្លើយប្រាប់ថា ពិតជាបានដាក់បង្កៃគ្រាប់នោះមែន។ ប៉ុន្តែមូលហេតុយ៉ាងណានោះលោកមិនទាន់អាចប្រាប់នៅពេលនេះបានទេ ព្រោះត្រូវទុកពេលឲ្យសមត្ថកិច្ចស្រាវជ្រាវបន្តិចទៀតសិន។
លោកថា៖ «ករណីនេះ តាមពិតទៅសមត្ថកិច្ចខ្ញុំគ្រាន់តែសហការក្នុងការស្រាវជ្រាវកំណត់មុខសញ្ញាឈានទៅចាប់ជនសង្ស័យប៉ុណ្ណោះ ហើយនិងធ្វើការស្រាវជ្រាវបន្តទៀតក្រែងមានជនពាក់ព័ន្ធ»។
លោកបានបញ្ជាក់ដែរថា ចំពោះគ្រាប់ B40 និងគ្រាប់ DK75 នោះ តាមការសន្និដ្ឋានរបស់សមត្ថកិច្ចជំនាញបង្ហាញថា វាមិនទាន់អាចបង្កការផ្ទុះបានទេលុះត្រាតែមានកុងដង់ តែវាគ្មានភ្ជាប់នឹងកុងដង់ទេ។ ប៉ុន្តែក្រោយមានចំណាត់ការ សមត្ថកិច្ចបានប្រមូលគ្រាប់ទាំងនោះ មករក្សាទុកនៅស្នងការដ្ឋាននគរបាលខេត្ត ហើយក៏មានសមត្ថកិច្ចជំនាញមកពីអគ្គស្នងការដ្ឋាននគរបាលជាតិចូលរួមអង្កេតស្រាវជ្រាវផងដែរ។
លោកបានបន្តថា គ្រាប់ B40 ផលិតនៅអតីតសហភាពសូវៀត ៤ គ្រាប់ ត្រូវបានគេយកទៅកប់ក្នុងរណ្តៅនៅ ៣ ទីតាំងខុសគ្នា ដោយឃ្លាតពីកន្លែងមួយទៅកន្លែងមួយប្រហែល ១០ ម៉ែត្រ និងមានការចាក់រំសេវផង។ ចំណែកគ្រាប់ DK ចំនួន ១ គ្រាប់ ត្រូវបានគេដាក់ចម្ងាយប្រហែល ១០០ ម៉ែត្រពីគ្រាប់ B40 តែមានលក្ខណៈច្នៃបង្កៃទុកចោលដូចគ្នា៕