កំពង់ស្ពឺៈ លោក វ៉ី សំណាង អភិបាលខេត្តកំពង់ស្ពឺបានឲ្យដឹងកាលពីម្សិលមិញថា សមត្ថកិច្ចកំពុងបន្តស៊ើបអង្កេតរកមេខ្លោងដែលនៅពីក្រោយទីតាំងផលិតបារីម៉ាក ៥៥៥ ក្លែងក្លាយរបស់ជនជាតិចិន ខណៈជនជាប់សង្ស័យពី ២ ទៅ ៣ នាក់ កំពុងត្រូវបានឃាត់ខ្លួនសួរនាំ។
កាលពីថ្ងៃទី ១១ មិថុនា សមត្ថកិច្ចខេត្តកំពង់ស្ពឺ និងក្រុមមន្ត្រីពីនាយកដ្ឋានប្រឆាំងផលិតផលក្លែងក្លាយរបស់ក្រសួងមហាផ្ទៃបានចុះបង្ក្រាបទីតាំងផលិតបារីម៉ាក៥៥៥ក្លែងក្លាយរបស់ជនជាតិចិនស្ថិតនៅក្នុងភូមិចេក ឃុំអូរ ស្រុកភ្នំស្រួច ដោយរឹបអូសបានបារីជាង ១ ពាន់ប៊ិក ម៉ាស៊ីនផលិតបារី ២ គ្រឿង និងសម្ភារផ្សេងៗមួយចំនួនទៀត។
លោក វ៉ី សំណាង បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្រោយការចុះបង្ក្រាបជនជាប់ពាក់ព័ន្ធចន្លោះពី ២ ទៅ ៣ នាក់ (ជាជនជាតិចិន) ត្រូវបានបញ្ជូនភ្លាមៗមកក្រសួងមហាផ្ទៃ។ លោកបន្តថា ក្រោយពីសាកសួរចប់ ពួកគេទាំងនោះត្រូវបានបញ្ជូនត្រឡប់មកខេត្តកំពង់ស្ពឺវិញហើយ ដើម្បីឲ្យសមត្ថកិច្ចចាត់ការបន្ត។
លោកបន្ថែមថា សមត្ថកិច្ចបានសាកសួរជនជាប់ពាក់ព័ន្ធទាំងនោះដើម្បីស្វែងរកមេខ្លោង ខណៈលោកមិនអាចបញ្ជាក់លម្អិតអ្វីបន្ថែមទៀតបានទេ ព្រោះស្ថិតក្នុងការស៊ើបអង្កេត។ «យើងកំពុងខិតខំស្រាវជ្រាវរកមេខ្លោងអាចមាន ២ ទៅ ៣ នាក់ដែលជាអ្នកនៅពីក្រោយពិតប្រាកដ»។
បើតាមលោក វ៉ី សំណាង បារីដែលបានផលិតក្នុងទីតាំងនេះគឺសម្រាប់នាំចេញទៅប្រទេសចិន ដោយមិនបានចែកចាយលក់នៅក្នុងប្រទេសកម្ពុជានោះទេ។ លោកថា៖ «បារីទាំងនេះគាត់ទើបតែផលិត...រឿងវាអ៊ីចេះទេ គឺទាក់ទងនឹងការបើកទីតាំងនេះខ្ញុំសន្និដ្ឋានថា ដោយសារតែប្រទេសយើងនេះ វត្ថុធាតុដើមក្នុងស្រុកយើងនេះមានតម្លៃសមល្មម ដែលអាចផលិតបាន ទើបគាត់ជ្រើសរើសកម្ពុជា។ គ្រាន់តែទីតាំងនេះខុសមួយដោយមិនបានសុំច្បាប់ អនុញ្ញាតគឺខុសច្បាប់»។
លោក សម សាមួន ស្នងការនគរបាលខេត្តកំពង់ស្ពឺថ្លែងពីម្សិលមិញថា កាលពីចុះបង្ក្រាបភ្លាមៗគឺមានមនុស្សជាប់ពាក់ព័ន្ធចំនួន ៧ នាក់ ត្រូវបានហៅទៅសួរនាំ។ ប៉ុន្តែក្រោមនីតិវិធីនៃការស៊ើបអង្កេតនេះ លោកមិនអាចធ្វើការអត្ថាធិប្បាយអ្វីបន្ថែមទៀតទេ។
លោកថា៖ «ការបង្ក្រាបនេះគឺដឹកនាំដោយមន្ត្រីនៃក្រសួងមហាផ្ទៃខាងសមត្ថកិច្ចខេត្តគ្រាន់តែចូលរួមសហការប៉ុណ្ណោះ។ ចំពោះវត្ថុតាង គេកំពុងយកសំណាកបារីទាំងនោះទៅពិសោធនៅភ្នំពេញ ដើម្បីដឹងពីសារធាតុផ្សេងៗនៅក្នុងហ្នឹង ប៉ុន្តែលទ្ធផលយ៉ាងម៉េចនោះមិនទាន់ដឹងទេ»៕