.jpg)
ជនរងគ្រោះ អ៊ី បញ្ញា ដែលបានស្លាប់បន្ទាប់ពីវះកាត់។ រូបថត ហ្វេសប៊ុក
ភ្នំពេញៈ ក្រោយពីទទួលបានពាក្យបណ្តឹង អាជ្ញាធរមានសមត្ថកិច្ចកំពុងធ្វើការស៊ើបអង្កេតករណីដែលក្រុមគ្រួសារនៃសពបានចោទប្រកាន់មន្ទីរពហុព្យាបាលម៉ាយហ៊ែលស្ថិតនៅរាជធានីភ្នំពេញពីបទធ្វេសប្រហែសក្នុងការវះកាត់បណ្តាលឱ្យកូនរបស់ខ្លួនស្លាប់។
អ្នកស្រី ស៊ឹម សម្បត្តិ អាយុ ៥០ ឆ្នាំ មានទីលំនៅបច្ចុប្បន្នភូមិព្រៃស្នួល ឃុំរវៀង ស្រុកសំរោង ខេត្តតាកែវកាលពីថ្ងៃទី ២២ ខែមករា បានដាក់ពាក្យបណ្តឹងទៅអធិការដ្ឋាននគរបាលខណ្ឌដង្កោ ដោយប្តឹងម្ចាស់មន្ទីរពហុព្យាបាលម៉ាយហ៊ែលមានទីតាំងស្ថិតនៅភូមិម័ល ខណ្ឌដង្កោ ថាបានវះកាត់ជំងឺពោះវៀនដុះខ្នែងលើឈ្មោះ អ៊ី បញ្ញា ត្រូវជាកូនប្រុសខុសលក្ខណៈបច្ចេកទេស និងធ្វេសប្រហែសក្នុងវិជ្ជាជីវៈដោយមិនទទួលខុសត្រូវក្នុងការព្យាបាលបន្ត។ ជនរងគ្រោះឈ្មោះ អ៊ី បញ្ញា អាយុ ២២ ឆ្នាំ មុខរបរជាអ្នកសារព័ត៌មានបានទទួលមរណភាពនាថ្ងៃទី ៣០ ខែមករា បន្ទាប់ពីផ្ទេរចេញពីមន្ទីរពហុព្យាបាលម៉ាយហ៊ែលទៅមន្ទីរពេទ្យរុស្ស៊ី។
លោក ជីម ស៊ីថា អធិការនគរបាលខណ្ឌដង្កោបានប្រាប់ ភ្នំពេញ ប៉ុស្តិ៍ថា ក្រោយពីទទួលបានពាក្យបណ្តឹង ក្រុមការងាររបស់លោកបានចុះធ្វើការអង្កេត និងកសាងសំណុំរឿង ដើម្បីប្រមូលព័ត៌មានផ្តល់ជូនស្ថាប័នមានសមត្ថកិច្ច ពោលគឺមន្ទីរសុខាភិបាលរាជធានីភ្នំពេញ។
លោកថា៖ «យើងបានទាក់ទងនៅស្ថាប័នមានសមត្ថកិច្ច ហើយកំពុងធ្វើការរឿងនេះ ជាពិសេសខាងសុខាភិបាលដែលមានជំនាញនេះ ដើម្បីចូលរួមធ្វើការនេះ។ ម្សិលមិញ (ថ្ងៃទី ៣០ មករា) យើងបានសម្ភាសសួរខាងមន្ទីរពហុព្យាបាលម៉ាយហ៊ែលរួចហើយយើងគ្រោងទៅសម្ភាសខាងមន្ទីរពេទ្យរុស្ស៊ីបន្ថែមទៀត ថាតើការងារនេះ ស៊ីចង្វាក់គ្នាឬអត់ដើម្បីយើងប្រមូលព័ត៌មាន។ ខាងខ្ញុំធ្វើការតាមជំនាញរបស់ខ្ញុំ ហើយខាងមន្ត្រីសុខាភិបាល គាត់នឹងធ្វើទៅតាមជំនាញរបស់គាត់»។
ប្រធានមន្ទីរសុខាភិបាលរាជធានីភ្នំពេញលោក ងី មានហេង បានប្រាប់ ភ្នំពេញ ប៉ុស្តិ៍ថា ក្រសួងសុខាភិបាលរួមនឹងមន្ទីរសុខាភិបាលបានចុះអង្កេតដល់ទីតាំងរួចហើយ ដើម្បីធ្វើរបាយការណ៍បឋម ហើយជនរងគ្រោះពិតជាបានចូលវះកាត់ពោះវៀនដុះខ្នែងនៅមន្ទីរពហុព្យាបាលម៉ាយហ៊ែលពិតមែន។
លោកថា៖ «តាមរបាយការណ៍ បន្ទាប់មកអ្នកជំងឺមានអាការមិនស្រួលក៏បានបញ្ជូនទៅមន្ទីរពេទ្យសូវៀត ហើយមន្ទីរពេទ្យសូវៀតជួយសង្គ្រោះវះកាត់ម្តងទៀត ពេលវះទៅឃើញមានរលាកលំពែងបន្ថែម ហើយគ្រូពេទ្យក៏ជួយសង្គ្រោះបន្ត»។
ទាក់ទងការចោទប្រកាន់ថា វះកាត់ខុសបច្ចេកទេសលោក ងី មានហេង បញ្ជាក់ថា៖ «រឿងនេះមិនមែនអ្នកណាអាចនិយាយបានទេ ព្រោះមានក្រុមបច្ចេកទេសសុខាភិបាល ១ ក្រុមទៀត កាលណាមានភាពមិនប្រក្រតីក្រុមបច្ចេកទេសនោះនឹងចុះទៅធ្វើការអង្កេត»។
ភ្នំពេញប៉ុស្តិ៍មិនអាចទាក់ទងប្រធានមន្ទីរពហុព្យាបាលម៉ាយហ៊ែលបាននៅឡើយទេ ប៉ុន្តែបុគ្គលិកផ្នែកគណនេយ្យដែលលើកទូរស័ព្ទបានឆ្លើយថា ខ្លួនពុំទទួលបានព័ត៌មានពីការចោទប្រកាន់នេះនៅឡើយទេ។
នៅក្នុងពាក្យបណ្តឹងរបស់អ្នកស្រី ស៊ឹម សម្បត្តិ បញ្ជាក់ថាកាលពីព្រឹកថ្ងៃទី ១៨ ខែ មករា ឆ្នាំ ២០២១ ក្រុមគ្រូពេទ្យនៃមន្ទីរពហុព្យាបាល ម៉ាយហ៊ែល បាននាំគ្នាសម្រេចធ្វើការវះកាត់ជំងឺពោះវៀនដុះខ្នែងឱ្យឈ្មោះ អ៊ី បញ្ញា។ ក្រោយលទ្ធផលវះកាត់បាន ៣ ថ្ងៃ ស្ថានភាពជំងឺរបស់ឈ្មោះ អ៊ី បញ្ញា មានលក្ខណៈធ្ងន់ធ្ងរខ្លាំងដូចជាហើមពោះ ពិបាកដកដង្ហើម ហើយពេលក្រុមគ្រួសារ អ្នកថែទាំជំងឺព្យាយាមទាក់ទង ហៅពេទ្យដែលវះកាត់នោះមកពិគ្រោះ ឬតាមដានជំងឺម្តងៗ គ្មានគ្រូពេទ្យទទួលខុសត្រូវច្បាស់លាស់ឡើយ។
ដោយសារបញ្ហានេះ និងដោយសារអ្នកជំងឺមានអាការកាន់តែធ្ងន់ធ្ងរទៅៗពី ១ ថ្ងៃទៅ ១ ថ្ងៃធ្វើឱ្យក្រុមគ្រួសារអ្នកស្រីអស់ជំនឿលើមន្ទីរពហុព្យាបាល ម៉ាយហ៊ែល ទើបសម្រេចចិត្តសុំចេញពីមន្ទីរពេទ្យនេះនៅថ្ងៃទី ២០ ខែ មករា ឆ្នាំ ២០២១ ដោយទៅព្យាបាលសង្គ្រោះបន្ទាន់នៅមន្ទីរពេទ្យមិត្តភាពខ្មែរ សូវៀតវិញម្តង។
ពាក្យបណ្តឹងបន្តថា៖ «ក្រោយមកស្ថានភាពអ្នកជំងឺមានអាការមិនធូរស្រាលឡើយហើយក្រុមគ្រូពេទ្យជំនាញៗនៅមន្ទីរពេទ្យមិត្តភាពខ្មែរ សូវៀត បង្ហើបប្រាប់ថា អ្នកជំងឺមានលក្ខណៈធ្ងន់ធ្ងរណាស់ បណ្តាលមកពីការព្យាបាលរបស់ក្រុមគ្រូពេទ្យវះកាត់នៅខាងក្រៅ ព្យាបាលខុសបច្ចេកទេស និងវិជ្ជាជីវៈ»។
យោងតាមពាក្យបណ្តឹងដដែលបន្តទៀតថា ឈ្មោះ អ៊ី បញ្ញា មុនពេលវះកាត់គឺមានអាការនឹងនរធម្មតា គ្រាន់តែចុកពោះតិចតួច អាចបើកបរឡានខ្លួនឯង តាំងពីស្រុករហូតមកដល់មន្ទីរពហុព្យាបាល ម៉ាយហ៊ែល ដើម្បីពិគ្រោះជាមួយគ្រូពេទ្យអំពីមូលហេតុនៃការចុកពោះ។
នៅពេលនោះក្រុមគ្រូពេទ្យបាននិយាយថា ឈ្មោះ អ៊ី បញ្ញា មានបញ្ហាពោះវៀនដុះខ្នែងត្រូវវះកាត់ជាបន្ទាន់ ហើយគ្រូពេទ្យសន្យាថា វះកាត់រយៈពេលតែ ២ ថ្ងៃ គឺអ្នកជំងឺជាហើយ បើមិនវះកាត់ទេអាចមានបញ្ហាដល់អាយុជីវិត៕
វីដេអូ៖
