.jpg)
តំបន់ដីដែលមានទំនាស់រវាងពលរដ្ឋ និងសមត្ថកិច្ច។ រូបថត ហ្វេសប៊ុក
កំពង់ធំ: លោក ទូច សុខា អភិបាលស្រុកសន្ទុកបានឲ្យដឹងថា សមត្ថកិច្ចកំពុងស៊ើបអង្កេតករណីអំពើហិង្សាដែលបណ្ដាលឲ្យមន្ត្រីរដ្ឋបាលព្រៃឈើខេត្តកំពង់ធំ ៣ នាក់របួសធ្ងន់ និងស្រាលក្នុងហេតុការណ៍ប៉ះទង្គិចគ្នាជាមួយប្រជាពលរដ្ឋចំនួនជាង ១០០ នាក់កាលពីសប្ដាហ៍មុន ស្ថិតនៅទីតាំងតំបន់ស្ថានីយផ្សព្វផ្សាយ និងស្តារព្រៃឈើឡើងវិញអន្លង់ថ្ម ស្ថិតនៅក្នុងអូរគគីរ ឃុំបឹងល្វា ស្រុកសន្ទុក ខេត្តកំពង់ធំ។
លោក សុខា ថ្លែងថា៖ «ខ្ញុំមិនទាន់ដឹងពីការសម្រេចបែបណាទេ ដោយរង់ចាំការស៊ើបអង្កេតរកមូលហេតុពិតប្រាកដសិន ព្រោះមន្ត្រីយើងកំពុងសម្រាកព្យាបាលរបួស ហើយដីដែលពលរដ្ឋកំពុងកាន់កាប់នេះស្ថិតក្នុងសភាពមិនច្បាស់លាស់នៅឡើយ។ អ៊ីចឹងយើងនៅស្រាវជ្រាវបន្តទៀត។ តែភ្លាមៗដែលកើតហេតុហ្នឹង យើងគ្រាន់តែសម្របសម្រួលរំដោះខ្លួនចេញពីពលរដ្ឋសិនប៉ុណ្ណោះ»។
លោក សុខា បានអះអាងថា មន្ត្រីដែលរងរបួសគឺលោក អាំង ប៊ុនថា របួសជើងខាងស្ដាំ ដោយសារត្រូវដំបងរបស់ប្រជាពលរដ្ឋគប់ រីឯលោក តូ រ៉ាត់ រងរបួសខ្នងធ្ងន់ ដោយសារពូថៅរបស់ពលរដ្ឋគប់ ខណៈដែលលោកកំពុងនៅក្នុងរថយន្ត និងម្នាក់ទៀតមិនចាំឈ្មោះត្រូវដៃខាងឆ្វេង ប៉ុន្ដែមិនធ្ងន់ធ្ងរទេ។
លោកបន្តថា មុនពេលកើតហេតុ ក្រុមមន្ត្រីរដ្ឋបាលព្រៃឈើខេត្តកំពង់ធំចំនួន ៣៥ នាក់បាននាំគ្នាទៅដាំកូនឈើចំនួនជាង ១ ម៉ឺនដើមនៅលើទីតាំងតំបន់ស្ថានីយផ្សព្វផ្សាយ និងស្តារព្រៃឈើឡើងវិញ អន្លង់ថ្ម (ដីរដ្ឋ) ស្រាប់តែមានប្រជាពលរដ្ឋប្រមាណជាង ១០០ នាក់មកអះអាងថា ជាដីរបស់ពួកគាត់ ហើយនាំគ្នាមកឃាត់មន្ត្រីមិនឲ្យដាំកូនឈើទាំងអស់ ព្រមទាំងបានដកកូនឈើដែលដាំហើយនោះចោលទៀតផង។
លោក សុខា បញ្ជាក់ថា៖ «ក្នុងអំឡុងនោះមានការតវ៉ាខ្លាំងពលរដ្ឋជាច្រើននាក់ស្រែកតវ៉ា ស្រែកឡូឡា លើសពីនេះក្នុងដៃគាត់មានកាំបិត ពូថៅ និងដំបង។ ខណៈមន្ត្រីយើងបានដកខ្លួនថយចេញមកវិញ ប៉ុន្ដែមានពលរដ្ឋ ២ ឬ ៣ នាក់បានគប់ពូថៅមកលើមន្ត្រីធ្វើឲ្យរងរបួសមន្ត្រី ៣ នាក់ និងខូចខាតឡានរដ្ឋ និងឡានផ្ទាល់ខ្លួនរបស់មន្ត្រីយើងទៀត ប៉ុន្ដែខ្ញុំមិនដឹងថាបានផ្ទុះអាវុធ ឬយ៉ាងណាទេ»។
លោក ទូច សុខា បញ្ជាក់បន្ថែមថា៖ «ដីហ្នឹងរបស់រដ្ឋ ហើយពួកគាត់នាំគ្នាមកទន្ទ្រានយកដីលក់ទៅឲ្យក្រុមឈ្មួញផ្សេងទៀត ប៉ុន្ដែប្រសិនបើពួកគាត់ខ្វះដីធ្លីមែន គឺយើងអាចអនុញ្ញាតឲ្យគាត់អាស្រ័យផល។ ពួកគាត់រំលោភដីយកដីនេះ មិនមែនធ្វើកសិកម្មទេ គឺយកទៅលក់ឲ្យឈ្មួញ អ៊ីចឹងយើងមិនអនុញ្ញាតឲ្យគាត់ធ្វើបែបនេះទេ»។
លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំបានឲ្យដឹងថា លោកបានទទួលព័ត៌មាននេះ ប៉ុន្ដែលោកមិនបានដឹងស្ថានភាពជាក់ស្ដែងច្បាស់លាស់ទេ។
លោកថា៖ «ខ្ញុំដឹងរឿងហ្នឹងអត់ច្បាស់ទេ សាកសួរទៅមន្ត្រីខ្ញុំ»។
លោក ឈិត ឃឿន មេឃុំបឹងល្វាបានឲ្យដឹងថា ពលរដ្ឋនាំគ្នាមករស់នៅលើដីនេះមុនលោកចូលកាន់តំណែងឆ្នាំ ២០១៧ ដូច្នេះមិនបានដឹងច្បាស់ពីសាវតារដីដែលកំពុងមានទំនាស់ថា តើដីនេះជាដីរបស់រដ្ឋ ឬដីរបស់ប្រជាពលរដ្ឋទេ? ព្រោះពលរដ្ឋដែលកំពុងរស់នៅនេះមិនទាន់មានការចុះបញ្ជីដី ឬបណ្ណកម្មសិទ្ធិស្របច្បាប់ទេ។
លោកបញ្ជាក់ថា៖ «ពួកគាត់រស់នៅសព្វថ្ងៃនេះមិនទាន់មានបណ្ណកម្មសិទ្ធិត្រឹមត្រូវទេ តែពួកគាត់រស់នៅយូរឆ្នាំដែរហើយ។ ខ្ញុំមិនសូវដឹងច្បាស់ពីសាវតារដីហ្នឹងដែរ ព្រោះខ្ញុំមកកាន់តំណែងក្រោយគាត់រស់នៅលើដីហ្នឹង»។ ភ្នំពេញប៉ុស្តិ៍មិនទាន់អាចស្វែងរកប្រភពដើម្បីទាក់ទងប្រជាពលរដ្ឋដែលផ្ទុះការតវ៉ា និងរងការចោទប្រកាន់ពីអំពើហិង្សាបានទេកាលពីម្សិលមិញ៕
