.jpg)
ស្រ្តីរងគ្រោះដែលត្រូវភ្លើងឆេះស្លាប់ក្នុងខ្ទម។ រូបថត FN
កំពង់ឆ្នាំងៈ នគរបាលស្រុកសាមគ្គីមានជ័យក្នុងខេត្តកំពង់ឆ្នាំងកំពុងស្រាវជ្រាវរកមូលហេតុពិតនៃការឆេះខ្ទមចាំស្រែដែលបណ្ដាលឲ្យស្រ្តីចំណាស់ម្នាក់ស្លាប់កាលពីថ្ងៃទី ២១ មិថុនា ឆ្នាំ ២០២០ នៅភូមិគ្រាំកន្ទ្រោលឃុំពាម ស្រុកសាមគ្គីមានជ័យ ខណៈសមត្ថកិច្ចមិនទាន់អាចសន្និដ្ឋានបាននៅឡើយ ប៉ុន្តែបានផ្ដោតលើធ្វេសប្រហែសរបស់ជនរងគ្រោះច្រើនជាងមូលហេតុផ្សេង។
លោក សេង ចិន្តា អធិការនគរបាលស្រុកសាមគ្គីមានជ័យប្រាប់នៅថ្ងៃទី ២៣ មិថុនា នេះថា ស្រ្តីរងគ្រោះឈ្មោះ ជា ថន អាយុ ៥៦ ឆ្នាំ។ គាត់មានប្តីនិងកូនរស់នៅក្នុងភូមិ-ឃុំកើតហេតុខាងលើ។ រីឯមូលហេតុនៃការឆេះនេះសមត្ថកិច្ចកំពុងស្រាវជ្រាវដើម្បីឲ្យដឹងថាតើគាត់ត្រូវបានគេដុតសម្លាប់ឬមួយស្លាប់ដោយសារការធ្វេសប្រហែសខ្លួនឯង។
លោកថា៖ «បើតាមមន្រ្តីជំនាញកោសល្យវិច័យសន្និដ្ឋានថាបើករណីឃាតកម្មគឺមានវត្ថុតាងដូចជាគំនរឈើគរនៅទីនោះតែករណីនេះមើលទៅគ្មានទេ។ ប៉ុន្តែយ៉ាងណាសមត្ថកិច្ចយើងកំពុងស្រាវជ្រាវហើយ»។
លោកបានឲ្យដឹងថាស្រ្តីរងគ្រោះជាមនុស្សញៀនស្រាដែលសមត្ថកិច្ចក៏សន្និដ្ឋានដែរថា ពេលកើតហេតុអាចជនរងគ្រោះផឹកស្រាហើយបង្កាត់ភ្លើងចោលនៅចង្ក្រានរួចដេកលក់ក៏អាចថាបាន។ ប៉ុន្តែនេះគ្រាន់តែជាការសន្និដ្ឋានប៉ុណ្ណោះរីឯមូលហេតុពិតយ៉ាងណានោះសមត្ថកិច្ចកំពុងបន្តស្រាវជ្រាវ តែសាកសពគ្រាន់តែឆេះរោលខ្លួនមិនមែនឆេះសុសសាច់អស់ទេ។
លោក សៅ វ៉ាន់ នាយនគរបាលប៉ុស្តិ៍ពាមបានប្រាប់តាមសម្ដីសាក្សីថា ពីភូមិទៅកន្លែងកើតហេតុមានចម្ងាយប្រហែល ៦ គីឡូម៉ែត្រ ហើយនៅទីនោះមានតែខ្ទមចាំស្រែរបស់ស្រ្តីរងគ្រោះមួយទេ។ មុនកើតហេតុថ្ងៃទី ២១ មិថុនា គេបានឃើញស្រ្តីរងគ្រោះចេញពីភូមិទៅខ្ទមចាំស្រែនៅម៉ោងប្រហែល ៨ ព្រឹក។ លុះដល់ម៉ោង ៧ និង ១៥ នាទីយប់ ទើបលោកទទួលបានព័ត៌មានថាជនរងគ្រោះត្រូវភ្លើងឆេះស្លាប់នៅចន្លោះម៉ោងជាង ៣ រសៀល។
លោកបន្តថា បន្ទាប់ពីទទួលព័ត៌មាននេះលោកបានដឹកនាំកម្លាំងចុះទៅកន្លែងកើតហេតុហើយបានឃើញស្រ្តីរងគ្រោះដេកស្លាប់ក្នុងភ្នក់ភ្លើង។ លោកថា ខ្ទមឈើនោះមានទំហំតូចទេតែបានឆេះអស់ដែលអាចបង្កឲ្យស្លាប់មនុស្សបាន។ ប៉ុន្តែករណីនេះសមត្ថកិច្ចនៅមិនទាន់ដាក់ការសង្ស័យលើអ្វីមួយឬក៏វាយតម្លៃឲ្យប្រាកដនៅឡើយទេ ខណៈនៅកំពុងស្រាវជ្រាវនោះ។
លោកថា៖ «នៅថ្ងៃនោះគេបានឃើញគាត់ទៅខ្ទមចាំស្រែតែម្នាក់ឯងទេហើយប៉ុន្មានម៉ោងក្រោយមកក៏មានដំណឹងថាគាត់ឆេះភ្លើងស្លាប់»។
លោកបញ្ជាក់ដែរថា បន្ទាប់ពីកើតហេតុ លោកស្នងការនគរបាលខេត្តកំពង់ឆ្នាំង ខូវ លី បានបញ្ជាឲ្យកម្លាំងរបស់លោកយាមនៅទីនោះ ១ យប់ ដើម្បីតាមដានករណីនេះ។ លុះព្រឹកថ្ងៃទី ២២ មិថុនា មន្រ្តីជំនាញនៃស្នងការដ្ឋាននគរបាលខេត្តបានចុះទៅពិនិត្យសភាពជាក់ស្តែងដល់កន្លែងកើតហេតុ។ លោកថា៖ «ខ្ទមចាំស្រែនោះនៅក្នុងព្រៃ ហើយនៅម្តុំនោះគ្មានគេនៅជិតគាត់ទេ»៕
