ភ្នំពេញៈ សមត្ថកិច្ចពន្ធនាគារ និងអាជ្ញាធរពាក់ព័ន្ធបាននិងកំពុងស៊ើបអង្កេតករណីស្លាប់អ្នកទោសម្នាក់ និង ១៥ នាក់ទៀតធ្លាក់ខ្លួនឈឺក្នុងពន្ធនាគារ (ម៤) នៅស្រុកតាលោសែនជ័យ ខេត្តពោធិ៍សាត់ដោយសារផឹកអាល់កុលលាយភេសជ្ជៈតែមិនទាន់បង្ហាញលទ្ធផលទេ ខណៈមន្ត្រីសង្គមស៊ីវិលសង្ស័យពីការធ្វេសប្រហែសរបស់មន្ត្រី និងស្នើឲ្យស៊ើបអង្កេតបានច្បាស់លាស់។
យោងតាមរបាយការណ៍អង្កេតរបស់សមត្ថកិច្ចនគរបាលស្រុកតាលោសែនជ័យដែលភ្នំពេញប៉ុស្តិ៍ទទួលបានកាលពីថ្ងៃទី ១ កក្កដា ករណីអ្នកទោសនាំគ្នាផឹកអាល់កុលលាយភេសជ្ជៈកូកាកូឡា ខារ៉ាបាវ និងកាហ្វេកញ្ចប់បណ្ដាលឲ្យពុលស្លាប់ម្នាក់ និង ១៥ នាក់ទៀតបានធ្លាក់ខ្លួនឈឺនេះបានកើតឡើងកាលពីល្ងាចថ្ងៃទី ២៧ ខែមិថុនា ឆ្នាំ ២០២០។
របាយការណ៍នោះបានបញ្ជាក់ថា បុរសជាទណ្ឌិតដែលបានស្លាប់នោះឈ្មោះ យ៉ា រិទ្ធ អាយុ ២៥ ឆ្នាំជាប់ចោទពីបទលួចមានស្ថានទម្ងន់ទោសដោយសារការប្រើដាវជាអាវុធគំរាមយកម៉ូតូជនរងគ្រោះប្រព្រឹត្តពីថ្ងៃទី ១០ ខែឧសភា ឆ្នាំ ២០១៧។
បុរសរូបនេះត្រូវបានសមត្ថកិច្ចឃាត់ខ្លួន និងបញ្ជូនទៅឃុំខ្លួននៅពន្ធនាគារ (ម៤) តាមអំណាចដីកាបង្គាប់ឲ្យឃុំខ្លួនរបស់លោក ស្វាញ តុច ចៅក្រមស៊ើបសួរសាលាដំបូងខេត្តពោធិ៍សាត់ចុះថ្ងៃទី ២៧ ខែឧសភា ឆ្នាំ ២០២០។
របាយការណ៍នោះក៏បានលើកយកចម្លើយរបស់លោក សាន បុរី អាយុ ៤០ ឆ្នាំ ជាប្រធានបន្ទប់ H២ នៃពន្ធនាគារ (ម៤) ដែលបានបំភ្លឺដល់សមត្ថកិច្ចនគរបាលយុត្តិធម៌ពីថ្ងៃទី ២៨ ខែមិថុនា ឆ្នាំ ២០២០ មកបញ្ជាក់ផងដែរថា៖ «នៅចន្លោះម៉ោង ១៧-១៨ ល្ងាចថ្ងៃទី ២៦ ខែមិថុនា ឆ្នាំ ២០២០ ទណ្ឌិតឈ្មោះ យ៉ា រិទ្ធ បានលួចយកអាល់កុលពីមុខអគារចូលក្នុងបន្ទប់ ហើយបានលាយជាមួយភេសជ្ជៈកូកាកូឡា,ខារ៉ាបាវ និងកាហ្វេនេសស្លេ រួចក៏នាំគ្នាផឹក។
លុះមកដល់ថ្ងៃទី ២៧ ខែមិថុនា ឆ្នាំ ២០២០ វេលាម៉ោង ១៧ និង ០២ នាទី ទណ្ឌិតរូបនេះក៏មានអាការចុកពោះ ក្អួតអស់កម្លាំង ហើយត្រូវបានមន្ត្រីពន្ធនាគារបញ្ជូនទៅមន្ទីរពេទ្យខេត្តពោធិ៍សាត់ដើម្បីព្យាបាល។ ប៉ុន្តែដោយអាការជំងឺធ្ងន់ធ្ងរពេកក៏បានស្លាប់នៅវេលាម៉ោង ២១ និង ២០ នាទីយប់ថ្ងៃខែ ឆ្នាំដដែល»។
យ៉ាងណាក៏ដោយនៅថ្ងៃចុះអង្កេតនោះ (ថ្ងៃទី ២៨ ខែមិថុនា ឆ្នាំ ២០២០) ក្រុមគណៈកម្មការបច្ចេកទេសកោសល្យវិច័យនៃស្នងការដ្ឋាននគរបាលខេត្តពោធិ៍សាត់មិនបានរកឃើញសំណាកអ្វីគួរឲ្យកត់សម្គាល់នៅកន្លែងកើតហេតុទេ «ព្រោះនៅកន្លែងកើតហេតុមានការប្រែប្រួលបាត់សភាពដើម ដូចជាសម្ភារដែលជនរងគ្រោះប្រើបានបាត់»។
លោក សឹង សែនករុណា អ្នកនាំពាក្យសមាគមសិទ្ធិមនុស្សអាដហុកនៅថ្ងៃទី ១ កក្កដាបានចាត់ទុកករណីនេះថា ជាការធ្វេសប្រហែសរបស់មន្ត្រីពន្ធនាគារដែលបណ្ដែតបណ្ដោយឲ្យមានជនរងគ្រោះជាទណ្ឌិតស្លាប់។
លោកថ្លែងថា៖ «យើងចង់ឲ្យគ្រប់បណ្ដាអង្គភាពទាំងអស់មិនចំពោះតែពន្ធនាគារនោះទេ ត្រូវបង្កើនការប្រុងប្រយ័ត្នកុំឲ្យមានករណីបែបនេះកើតឡើងជាថ្មីទៀត។ ត្រូវចាត់វិធានការស្រាវជ្រាវលើករណីនេះឲ្យបានច្បាស់ថា តើវាកើតឡើងបានយ៉ាងដូចម្ដេច ព្រោះករណីនេះបង្ហាញពីភាពធ្វេសប្រហែស ឬខ្វះចន្លោះរបស់អនុរក្សពន្ធនាគារ ដែលបណ្ដោយឲ្យមានករណីកើតឡើង រហូតបណ្ដាលឲ្យមានជនរងគ្រោះជាទណ្ឌិតស្លាប់ និងមានជំងឺ»។
ជុំវិញករណីនេះលោក នុត សវនា អ្នកនាំពាក្យអគ្គនាយកដ្ឋានពន្ធនាគារបានថ្លែងកាលពីថ្ងៃទី ១ កក្កដាថា ករណីនេះក្រុមអធិការកិច្ចនៃអគ្គនាយកដ្ឋានពន្ធនាគារបានសហការជាមួយប្រធានពន្ធនាគារខេត្តពោធិ៍សាត់ និងអាជ្ញាធរពាក់ព័ន្ធមួយចំនួនបានចុះស្រាវជ្រាវហើយ ប៉ុន្តែនៅមិនទាន់បានរបាយការណ៍អំពីលទ្ធផលនៃការចុះអង្កេតស្រាវជ្រាវនេះមកកាន់អគ្គនាយកដ្ឋានពន្ធនាគារនៅឡើយទេ។
លោកបានថ្លែងថា៖ «ក្នុងករណីរកឃើញថា ជាកំហុសដោយចេតនារបស់មន្ត្រីពន្ធនាគារដែលបង្កឲ្យមានករណីនេះកើតឡើងរហូតបណ្ដាលឲ្យទណ្ឌិតស្លាប់នោះនឹងត្រូវរងពិន័យដោយបណ្ដេញចេញពីក្របខ័ណ្ឌមន្ត្រីនគរបាលជាតិ។ ក៏ប៉ុន្តែប្រសិនបើជាកំហុសដោយអចេតនាគឺរងពិន័យព្យួរការងារមួយរយៈ ឬដកហូតស័ក្តិ ១ កម្រិត តែបើកំហុសតិចតួច គឺពិន័យដោយស្ដីបន្ទោស ឬក៏ព្រមានជាលាយលក្ខណ៍អក្សរ»៕