.jpg)
ជនប្រុស-ស្រីត្រូវសមត្ថកិច្ចឃាត់ខ្លួន ដែលបម្រុងលួចឆ្លងដែនខុសច្បាប់ទៅធ្វើការនៅថៃ កាលពីម្សិលមិញ។ រូបថត ប៉ូលិស
បន្ទាយមានជ័យ៖ សមត្ថកិច្ចនគរបាលខេត្តបន្ទាយមានជ័យ កំពុងស្រាវជ្រាវរកចាប់ខ្លួនជនសង្ស័យ ២ នាក់ ជាមេខ្លោងពាក់ព័ន្ធករណីនាំពលរដ្ឋបម្រុងលួចឆ្លងដែនខុសច្បាប់ទៅធ្វើការនៅថៃ បន្ទាប់ពីឃាត់ខ្លួនបាន ៤ នាក់ ក្នុងនោះមានទាំងក្មេងជំទង់ម្នាក់ និងកុមារីម្នាក់ផងដែរ។
តាមការផ្សព្វផ្សាយរបស់អគ្គស្នងការដ្ឋាននគរបាលជាតិបានឲ្យដឹងថា កម្លាំងចម្រុះដែលឈរជើងតាមបន្ទាត់ព្រំដែន រួមមាននគរបាលការពារព្រំដែនគោកលេខ ៩១១ កម្លាំងកងពលតូចថ្មើរជើង ៥១ និងកម្លាំងអាវុធហត្ថក្រុងប៉ោយប៉ែត បានឃាត់ខ្លួនពលរដ្ឋ ៤ នាក់ ក្នុងពេលកំពុងបម្រុងលួចឆ្លងដែនចូលទៅប្រទេសថៃ ខុសច្បាប់តាមរយៈការអូសទាញពីមេខ្យល់។
លោក រស់ ពិសិដ្ឋ នាយប៉ុស្តិ៍នគរបាលការពារព្រំដែនគោក លេខ ៩១១ បានឲ្យដឹងថា ការឃាត់ខ្លួននេះបានធ្វើឡើងកាលពីរំលងអធ្រាត្រ ឈានចូលថ្ងៃទី ១៧ ខែ មេសា ឆ្នាំ ២០២១ នៅចំណុចស្តារវីឡា ស្ថិតក្នុងភូមិព្រៃព្រិច សង្កាត់/ក្រុងប៉ោយប៉ែត ខេត្តបន្ទាយមានជ័យ។
បើតាមលោក រស់ ពិសិដ្ឋ ក្រោយពីបានឃាត់ខ្លួនសួរនាំរួចមក កម្លាំងសមត្ថកិច្ចបានបញ្ជូនអ្នកទាំង ៤ នាក់ ទៅមណ្ឌលធ្វើចត្តាឡីស័កនៅវិទ្យាល័យនិមិត្ត ស្ថិតនៅក្នុងសង្កាត់និមិត្ត ក្រុងប៉ោយប៉ែត ដើម្បីតាមដានសុខភាព។ ចំណែកជន ២ នាក់ផ្សេងទៀត ដែលសមត្ថកិច្ចមិនទាន់ស្គាល់អត្តសញ្ញាណជាមេខ្យល់បានរត់គេចខ្លួនបាត់ហើយពេលនេះសមត្ថកិច្ចកំពុងស្រាវជ្រាវរកចាប់ខ្លួន ដើម្បីបន្តចាត់ការតាមនីតិវិធីច្បាប់។
ពលរដ្ឋចំនួន ៤ នាក់ ដែលសមត្ថកិច្ចឃាត់នោះរួមមាន ទី១ ឈ្មោះ ជាវ ការ៉ាន់ ភេទប្រុស អាយុ ៣៥ ឆ្នាំ (លក់ដូរនៅផ្សាររុងក្លឿ) មានលំនៅក្នុងភូមិក្បាលស្ពាន ២ សង្កាត់/ក្រុងប៉ោយប៉ែត។ ទី២ ឈ្មោះ ឈិត ពន្លឺ ភេទប្រុស អាយុ ៣២ ឆ្នាំ (លក់ដូរនៅផ្សាររុងក្លឿ) មានលំនៅក្នុងភូមិក្បាលស្ពាន ២ សង្កាត់/ក្រុងប៉ោយប៉ែត។
ទី៣ ឈ្មោះ អេង មិនា ភេទស្រី អាយុ ១៤ ឆ្នាំ (សិស្ស) មានលំនៅក្នុងភូមិក្បាលស្ពាន ២ សង្កាត់/ក្រុងប៉ោយប៉ែត និងទី៤ ឈ្មោះ អេង ចាន់ណា ភេទស្រី អាយុ 6 ឆ្នាំ (សិស្ស) មានលំនៅក្នុងភូមិក្បាលស្ពាន ១ សង្កាត់/ក្រុងប៉ោយប៉ែត៕
