.jpg)
សពស្ត្រីរងគ្រោះដែលសង្ស័យជាករណីប្លន់។ រូបថត សហការី
ភ្នំពេញៈ នគរខណ្ឌពោធិ៍សែនជ័យកំពុងបន្តស្រាវជ្រាវរកអត្តសញ្ញាណជនសង្ស័យករណីប្លន់សម្លាប់ស្ដ្រីម្នាក់នៅបន្ទប់ជួលមួយក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញកាលពីព្រលប់ថ្ងៃទី ២៥ ខែ ឧសភា ឆ្នាំ ២០២០។
លោក ជា សុវណ្ណ អធិការរងនគរបាលខណ្ឌពោធិ៍សែនជ័យបានប្រាប់ភ្នំពេញប៉ុស្តិ៍ពីម្សិលមិញថា ស្ត្រីរងគ្រោះនោះឈ្មោះ អ៊ុច យ៉េន អាយុ ៤៦ ឆ្នាំ មុខរបរលក់ចាប់ហួយស្នាក់នៅផ្ទះជួលក្នុងភូមិកើតហេតុខាងលើជាមួយប្អូនស្រីបង្កើតម្នាក់ឈ្មោះ អ៊ុច សារ៉ន ជាកម្មការិនីរោងចក្រកាត់ដេរនៅរាជធានីភ្នំពេញ។
លោកថ្លែងថា បើតាមការរៀបរាប់របស់នារីជាប្អូនបង្កើតជនរងគ្រោះថា នៅថ្ងៃកើតហេតុពេលនាងត្រឡប់ពីធ្វើការវិញឃើញបន្ទប់ជួលដែលនាង និងបងស្រីស្នាក់នៅត្រូវបានចាក់សោជាប់ពីខាងក្រៅ។ ភ្លាមៗនោះនាងមិនចាប់អារម្មណ៍អ្វីទេដោយនឹកស្មានថា បងស្រីរងគ្រោះនោះចេញទៅទិញទំនិញដើម្បីទុកលក់ដូរដូចសព្វមួយដង។
លោក សុវណ្ណ បានដកស្រង់សម្ដីរបស់កញ្ញា អ៊ុច សារ៉ន មកបញ្ជាក់ថា៖ «បន្ទាប់មកខ្ញុំបានពិនិត្យឃើញធុងទឹកកកដែលបងស្រីខ្ញុំដាក់ក្លាស្សេភេសជ្ជៈនៅមុខបន្ទប់បើកចំហខុសប្រក្រតី ខ្ញុំក៏ទូរស័ព្ទទៅរកគាត់តែទូរស័ព្ទមិនចូល។ បន្ទាប់មកទៀតខ្ញុំក៏ទូរស័ព្ទហៅប្អូនប្រុសជីដូនមួយរបស់ខ្ញុំដែលជាកូនម្ចាស់ផ្ទះជួលឲ្យមកជួយពិនិត្យហើយពេលវាយដោះសោទ្វារបន្ទប់ក៏ឃើញបងស្រីស្លាប់ និងឃើញរបស់របរមួយចំនួននៅរាយប៉ាយពេញបន្ទប់ ព្រមទាំងមានការបាត់បង់ម៉ូតូ Honda Dream-125 មួយគ្រឿងពាក់ស្លាកលេខភ្នំពេញ DC7457»។
លោក សុវណ្ណ បានបន្តថា តាមការបំភ្លឺពីសាច់ញាតិជនរងគ្រោះ និងវត្ថុតាងនៅកន្លែងកើតហេតុរួមទាំងលទ្ធផលនៃការធ្វើកោសល្យវិច័យវិទ្យាសាស្ត្រលើសពជនរងគ្រោះ សមត្ថកិច្ចជំនាញបានសន្និដ្ឋានថា ករណីនេះ «ជាអំពើឃាតកម្ម ប្លន់សម្លាប់យកទ្រព្យ»។
លោកបានបញ្ជាក់ថា៖ «នៅកន្លែងកើតហេតុ សមត្ថកិច្ចយើងបានរកឃើញស្បែកជើងផ្ទាត់ ១ គូសង្ស័យជារបស់ជនល្មើស។ យើងបានពិនិត្យឃើញសពជនរងគ្រោះមានស្នាមជាំផ្នែកបំពង់ក និងគល់ថ្គាមផ្នែកខាងស្ដាំ ដែលអាចសន្មតថាជនរងគ្រោះស្លាប់ដោយសារជនមិនស្គាល់មុខវាយនឹងកណ្ដាប់ដៃ ឬដោយច្របាច់ក»។
បើតាមលោក សុវណ្ណ សមត្ថកិច្ចនគរបាលជំនាញបានស្កេនស្នាមក្រយៅជើងនៅលើស្បែកជើងផ្ទាត់មួយគូនោះ ព្រមទាំងស្នាមក្រយៅដៃដែលជាប់នៅលើផ្នែកករបស់ជនរងគ្រោះយកទៅពិសោធ ដើម្បីស្រាវជ្រាវបន្តស្វែងរកមុខសញ្ញាជនសង្ស័យ ដើម្បីចាប់ខ្លួនបញ្ជូនឲ្យតុលាការផ្ដន្ទាទោសទៅតាមផ្លូវច្បាប់៕
