.jpg)
ការបង្ក្រាបករណីលួចដាំកញ្ឆានៅស្រុកវាលវែងពីថ្ងៃ ១៨ កក្កដា។ រូបថត ប៉ូលិស
ពោធិ៍សាត់: មន្ត្រីជំនាញខេត្តពោធិ៍សាត់កំពុងស្រាវជ្រាវរកជនល្មើសដែលបានលួចដាំដើមកញ្ឆាខុសច្បាប់នៅភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់ បន្ទាប់ពីបានរកឃើញតាមរយៈពលរដ្ឋ និងបានដុតបំផ្លាញដើមកញ្ឆាចំនួន ៥ ៥៣០ ដើម នៅនឹងកន្លែងក្នុងពេលចុះបង្ក្រាបពីថ្ងៃទី ១៨ កក្កដា ខណៈជនសង្ស័យលួចដាំលើផ្ទៃដី ២ ហិកតា។
លោក ធាង ឡេង អធិការនគរបាលស្រុកវាលវែងបានប្រាប់ពីម្សិលមិញថា សមត្ថកិច្ចជំនាញបាននិងកំពុងស្រាវជ្រាវរកជនសង្ស័យដែលបានលួចដាំកញ្ឆាទាំងនេះនៅជ្រលងភ្នំអូរ ៧០ ក្នុងភូមិដីក្រហម ឃុំអន្លង់រាប ស្រុកវាលវែង។ ក្នុងនោះសមត្ថកិច្ចក៏បានរកឃើញកញ្ឆាក្រៀមជាង ៣០ គីឡូក្រាមបន្ថែមទៀតនៅទីតាំងនោះផងដែរ។
លោកបន្តថា វត្ថុតាងដែលបានរកឃើញរួមមានដើមកញ្ឆា, កញ្ឆាក្រៀម,រោង (លក្ខណៈតង់សម្រាប់ជ្រក) ចំនួន ៣ កន្លែង និងសម្ភារមួយចំនួនដែលបម្រើឲ្យការដាំកញ្ឆាទាំងនេះ។ លោកថា សមត្ថកិច្ចដុតបំផ្លាញចោលនៅនឹងកន្លែងតែម្ដង ដោយសារមិនអាចដឹកជញ្ជូនចេញមកក្រៅបាន ព្រោះឆ្ងាយពេក និងគ្មានផ្លូវបើករថយន្តចូលទៅដឹកជញ្ជូនចេញពីក្នុងព្រៃបាន។
លោក ធាង ឡេង បញ្ជាក់ថា៖ «ពេលកម្លាំងយើងចុះទៅដល់ទីតាំងនោះ គឺម្ចាស់ហ្នឹងបានរត់គេចខ្លួនបាត់អស់ហើយ ឥឡូវយើងកំពុងព្យាយាមកំណត់អត្តសញ្ញាណជនសង្ស័យ ព្រោះយើងមិនអាចអនុញ្ញាតឲ្យមានការដាំដុះដំណាំបែបនេះបានទេ វាខុសច្បាប់។ យើងមិនចំណាយពេលយូរទេ គឺជនសង្ស័យនឹងចាប់ខ្លួនបាននាពេលឆាប់ៗនេះ ព្រោះយើងកំពុងមមាញឹកក្នុងការស្រាវជ្រាវ»។
លោកបន្ថែមថា ប្រតិបត្តិការនេះគោរពតាមបទបញ្ជាលោក សារុន ចាន់ធី ស្នងការនគរបាលខេត្តពោធិ៍សាត់ដែលបានចាត់ឲ្យលោកដឹកនាំកម្លាំងនគរបាលស្រុកវាលវែង និងកម្លាំងប៉ុស្តិ៍អន្លង់រាប សហការជាមួយកងរាជអាវុធហត្ថស្រុកសរុបកម្លាំងទាំងអស់ ៣៤ នាក់បានចុះទៅបង្ក្រាបទីតាំងដាំដុះរុក្ខជាតិកញ្ឆាដោយខុសច្បាប់នេះ។
លោក សុខ ណាត នាយប៉ុស្ដិ៍នគរបាលរដ្ឋបាលឃុំអន្លង់រាបបានថ្លែងពីម្សិលមិញថា ក្នុងភូមិសាស្ត្រនោះសម្បូរភ្នំ ផ្លូវចូលលំបាកដែលមានចម្ងាយ ៣០ គីឡូម៉ែត្រពីផ្លូវជាតិលេខ ៥៥ ជាហេតុធ្វើឲ្យសមត្ថកិច្ចចាប់មុខសញ្ញាមិនបាន។ ម្យ៉ាងជនល្មើសបានចិញ្ចឹមសត្វឆ្កែនៅខ្ទមចាំចម្ការ ខណៈសមត្ថកិច្ចទៅជិតដល់ទីតាំងប្រព្រឹត្តបទល្មើស ឆ្កែក៏ព្រុសធ្វើឲ្យជនល្មើសអាចគេចខ្លួន។
លោកបន្តថា សមត្ថកិច្ចមិនអាចបើករថយន្ត ឬគោយន្តចូលទៅកាន់តំបន់ដាំដំណាំកញ្ឆានោះបានទេ ដោយនាំគ្នាដើរចម្ងាយជាង ៣០ គីឡូម៉ែត្រឆ្លងកាត់ព្រៃ និងមានទឹកជ្រោះច្រើនកន្លែង ហើយត្រូវចំណាយពេលជិត ៤ ម៉ោងទើបទៅដល់ទីនោះ។ ទីតាំងនោះអំណោយផលល្អដល់ដំណាំកញ្ឆា ព្រោះមានព្រៃធំៗ ហើយអាចដាំកញ្ឆាបន្លំនឹងព្រៃឈើតូចៗបាំងភ្នែកសមត្ថកិច្ច។ ជាពិសេសជនល្មើសបានយកទឹកជ្រោះទៅស្រោចដំណាំកញ្ឆារបស់ខ្លួនយ៉ាងងាយស្រួល។
លោក សុខ ណាត បញ្ជាក់ថា៖ «រហូតមកទល់ពេលនេះ យើងកំណត់អត្តសញ្ញាណជនល្មើសបានខ្លះហើយ។ បើតាមខ្ញុំបានសាកសួរអ្នកភូមិ គឺជនល្មើសមានសរុប ៤ នាក់ ក្នុងនោះមាន ៣ នាក់ មកពីស្រុកគិរីវង់ ខេត្តតាកែវ ហើយម្នាក់ជាអ្នកភូមិនៅទីនេះផ្ទាល់ ប៉ុន្ដែយ៉ាងណា ពួកគាត់បានរត់គេចខ្លួនបាត់អស់ហើយ។ យើងនៅតែបន្តស្រាវជ្រាវបន្តទៀត»។
លោកបន្ថែមថា មុនពេលចុះធ្វើប្រតិបត្តិការនេះអ្នកភូមិបានរាយការណ៍មកសមត្ថកិច្ចអំពីសកម្មភាពរបស់ជនល្មើសដែលលួចលាក់ដាំដំណាំកញ្ឆានៅក្នុងព្រៃជ្រៅ ខណៈពួកគាត់បានប្រទះឃើញពេលដើរបោចវល្លិក្នុងភូមិសាស្ត្រនេះ។ ក្រោយឃើញករណីនេះពួកគាត់បានប្រញាប់មករាយការណ៍ប្រាប់ទៅសមត្ថកិច្ចដើម្បីបង្ក្រាប និងចាត់វិធានការតាមច្បាប់៕
