ភ្នំពេញ៖ មន្ត្រីនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មបានឱ្យដឹងថា សមត្ថកិច្ចកំពុងស្រាវជ្រាវរកអ្នកផលិត ឬអ្នកនាំចូលអាល់កុលក្លែងក្លាយ ឬមេតាណុលប្រមាណ ៣០ តោន ដើម្បីយកមកផ្តន្ទាទោសតាមច្បាប់ បន្ទាប់ពីបង្ក្រាបបានក្នុងអំឡុងពេលបិទខ្ទប់នៅរាជធានីភ្នំពេញ។
ប្រធានសាខា ក.ប.ប រាជធានីភ្នំពេញ លោក ហេង មាលី ប្រាប់ ភ្នំពេញ ប៉ុស្តិ៍ នៅថ្ងៃទី ១៦ ឧសភានេះថា ក្នុងរយៈពេលបិទខ្ទប់ក្នុងភូមិសាស្ត្ររាជធានីភ្នំពេញជាង ១ ខែមកនេះ ដោយគិតពីដើមខែមេសា ដល់ថ្ងៃទី ១៣ ខែឧសភា ២០២១ នេះ មន្ត្រីជំនាញបានចុះបង្ក្រាបអាល់កុលក្លែងក្លាយ ឬមេតាណុលប្រមាណ ៣០ តោន និងបានដុតបំផ្លាញចោលមួយចំនួន។
លោកថា៖ «អគ្គនាយកដ្ឋាន ក.ប.ប បានធ្វើការបង្ក្រាបនូវអាល់កុលក្លែងក្លាយនៅភ្នំពេញដោយគិតជាមធ្យម ៥ ករណី បានចំនួនជិត ៣០ តោន យើងបង្ក្រាបគ្រប់ទីតាំងទីកន្លែងទាំងអស់នៅតាមស្តុកចែកចាយនៅតាមបណ្តាឱសថស្ថាន និងទីកន្លែងសាធារណៈផ្សេង យើងធ្វើការប្រមូលបានច្រើន»។
លោកបន្តថា ក្នុងកិច្ចការទាំងអស់នេះ សមត្ថកិច្ចបាននិងកំពុងរៀបចំសំណុំរឿង ដើម្បីបញ្ជូនទៅតុលាការ និងកំពុងស្វះស្វែងរកជនទុច្ចរិតដែលនាំចូលអាល់កុលក្លែងក្លាយនេះ។
លោកថា៖ «យើងកំពុងរៀបចំវត្ថុតាង និងសំណុំឯកសារផ្សេងៗទៀតបញ្ជូនទៅតុលាការយើងដឹងស្រាប់ហើយអ្នកលក់អាល់កុលខ្លះគាត់ទទួលទិញពីអាជីវករផ្សេងៗពីគ្រប់មជ្ឈដ្ឋានទាំងអស់យកមកលក់បន្ត ដូច្នេះយើងស្វែងរកអ្នកនាំចូលធំថា អ្នកណាជាអ្នកនាំចូលពិតប្រាកដ និងអ្នកណាម្ចាស់ពិតប្រាកដ»។
យ៉ាងណាក៏ដោយ លោកមិនទាន់អាចប្រាប់ពីចំនួនមនុស្សដែលត្រូវបានឃាត់ខ្លួន ឬនឹងត្រូវបញ្ជូនទៅតុលាការនោះទេ ខណៈសមត្ថកិច្ចកំពុងសួរនាំ ដើម្បីប្រមូលភ័ស្តុតាងបន្ថែមទៀត។
លោក ហេង មាលី ឱ្យដឹងដែរ កាលពីថ្ងៃទី ១៣ ឧសភា ថ្មីៗនេះ សមត្ថកិច្ចចុះបង្ក្រាបទីតាំងស្តុកទុកអាល់កុលក្លែងក្លាយ ឬមេតាណុលប្រមាណជាង ១២ តោន នៅរាជធានីភ្នំពេញ បន្ទាប់ពីបានសិក្សាស្រាវជ្រាវមួយរយៈមកនេះ។
លោកថា៖ «បន្ទាប់ពីបានស្រាវជ្រាវស៊ើបអង្កេតរកទីតាំងភូមិសាស្ត្រ ដែលកំពុងចរាចរ និងស្តុកទុកអាល់កុលក្លែងក្លាយបានច្បាស់លាស់នៅល្ងាចថ្ងៃទី ១៣ ខែឧសភា មន្ត្រីអគ្គនាយកដ្ឋាន ក.ប.ប ដោយមានការឯកភាពពីលោកព្រះរាជអាជ្ញារងអមសាលាដំបូងរាជធានីភ្នំពេញបានចុះត្រួតពិនិត្យ និងឃាត់ទុកបណ្តោះអាសន្នអាល់កុលក្លែងក្លាយ ឬមេតាណុលចំនួន ១២ ៣៦០ លីត្រ នៅខណ្ឌបឹងកេងកង»។
បើតាមលោក មាលី ក្នុងចំណោមអាល់កុលក្លែងក្លាយ ឬមេតាណុលប្រមាណ ៣០ តោន ត្រូវបានមន្ត្រីជំនាញបំផ្លាញចោលអស់ជាង ១២ តោនរួចហើយ ខណៈអាល់កុលដែលនៅសេសសល់កំពុងរៀបចំបំផ្លាញចោលជាបន្តបន្ទាប់។
ទន្ទឹមនេះដែរ អគ្គនាយកដ្ឋាន ក.ប.ប អំពាវនាវដល់អ្នកប្រើប្រាស់មានការប្រុងប្រយ័ត្នក៏ដូចជា អាជីវករលក់ដុំ លក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់សូមកុំយកសារធាតុមេតាណុលបន្លំជាអាល់កុលលក់ជូនពលរដ្ឋដោយចាត់ទុកថា សកម្មភាពនេះមិនត្រឹមតែមិនអាចទប់ស្កាត់ការចម្លងមេរោគ ឬបង្កផលប៉ះពាល់ដល់សុខភាពអ្នកប្រើប៉ុណ្ណោះទេ តែថែមទាំងប្រឈមចំពោះមុខច្បាប់ដល់ខ្លួនថែមទៀតផង។
ក.ប.ប បញ្ជាក់ថា «សូមបងប្អូនប្រជាពលរដ្ឋដែលជាអ្នកប្រើប្រាស់ទាំងអស់ប្រុងប្រយ័ត្នមុនទិញអាល់កុល ឬជែល យកមកប្រើប្រាស់ក្នុងគោលបំណងសម្លាប់មេរោគ សូមពិនិត្យ និងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវច្បាស់លាស់»។
អគ្គនាយកដ្ឋាន ក.ប.ប ក៏បានពន្យល់ដែរថា មេតាណុលគឺជាសារធាតុគីមី ដែលគេច្រើនប្រើធ្វើជាសារធាតុសម្រាប់ប្រើប្រាស់ក្នុងវិស័យឧស្សាហកម្ម ឬសំណង់។ សារធាតុនេះមិនមានប្រសិទ្ធភាពក្នុងការសម្លាប់មេរោគកូវីដ ១៩ នោះទេ ។
ផ្ទុយទៅវិញការប្រើមេតាណុលសម្រាប់លាងដៃសម្រាប់សម្លាប់មេរោគកូវីដ ១៩ អាចនឹងបណ្តាលឱ្យប៉ះពាល់ដល់សុខភាពរបស់អ្នកប្រើ ដូចជាបណ្តាលឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ ឬអាចបណ្តាលឱ្យស្លាប់បានប្រសិនបើយកទៅលាយជាមួយស្រាហើយបរិភោគលើសកម្រិត៕