.jpg)
ដីព្រៃក្នុងដែនជម្រកសត្វព្រៃត្រូវបានគេរំលោភយក។ រូបថត FN
ព្រះវិហារៈ អាជ្ញាធរស្រុករវៀង និងក្រុមមន្ត្រីឧទ្យានុរក្សនៃមន្ទីរបរិស្ថានខេត្តព្រះវិហារកំពុងបន្តកិច្ចសហការគ្នា ស្រាវជ្រាវស្វែងរកអត្តសញ្ញាណក្រុមជនសង្ស័យក្នុងបទល្មើសកាប់រានដីព្រៃប្រមាណ ២០០ ហិកតា ក្នុងតំបន់ដែនជម្រកសត្វព្រៃបឹងពែរ ដើម្បីចាប់ឃាត់ខ្លួនបញ្ជូនឲ្យតុលាការ ចាត់វិធានការទៅតាមនីតិវិធីច្បាប់។
លោក ព្រំ ស៊ីថា អធិការរងស្រុករវៀងបានថ្លែងថា ក្នុងកិច្ចសហប្រតិបត្តិការរួមគ្នារវាងកងបញ្ជាការឯកភាពស្រុករវៀង និង មន្ត្រីឧទ្យានុរក្សនៃមន្ទីរបរិស្ថានខេត្តព្រះវិហារកាលពីថ្ងៃទី ១៩ ខែ មិថុនា ឆ្នាំ ២០២០ សមត្ថកិច្ចចម្រុះបានរកឃើញបទល្មើសកាប់រានដីព្រៃ ១ កន្លែងក្នុងតំបន់ដែនជម្រកសត្វព្រៃបឹងពែរក្នុងភូមិសាស្ត្រឃុំរម្មណីយ៍។
លោក ស៊ីថា បានបញ្ជាក់ថា៖ «ទីតាំងដែលត្រូវបានគេកាប់រានមានទំហំប្រមាណ ២០០ ហិកតា និងមានដាំកូនឈើហូបផ្លែជាច្រើនប្រភេទរួមមានដូងក្រអូប ស្វាយចន្ទី ទុរេន សាវម៉ាវ ស្វាយខ្ទិះ និង ស្វាយកែវរមៀត។ នៅចំកណ្ដាលទីតាំងដី ដែលត្រូវបានកាប់រានមានសង់ផ្ទះឈើ ប្រក់ស័ង្កសី ១ ខ្នង និង ឧបករណ៍សម្ភារកសិកម្មជាច្រើនទៀត»។
បើតាមលោក ស៊ីថា ក្រុមជនប្រព្រឹត្តបទល្មើសទំនងជាបានដឹងខ្លួនជាមុន ហើយបាននាំគ្នារត់គេចខ្លួនពីទីតាំងខាងលើនេះមុនពេលសមត្ថកិច្ចទៅដល់។ យ៉ាងណាក៏ដោយ រហូតមកទល់ពេលនេះ កម្លាំងសមត្ថកិច្ចចម្រុះនៅមិនទាន់រុះរើផ្ទះ និង ដកឬកាប់បំផ្លាញដំណាំហូបផ្លែពីទីតាំងដីព្រៃនៃតំបន់ដែនជម្រកសត្វព្រៃបឹងពែរនោះនៅឡើយទេ។
លោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារបានឲ្យដឹងថា ក្រោយពីប្រទះឃើញករណីនេះលោកបានដាក់បញ្ជាឲ្យក្រុមមន្ត្រីឧទ្យានុរក្ស បន្តសហការជាមួយអាជ្ញាធរមូលដ្ឋាន និងកម្លាំងសមត្ថកិច្ចប្រដាប់អាវុធទាំង ៣ ប្រភេទ ចុះស្រាវជ្រាវរកឲ្យឃើញអត្តសញ្ញាណនៃក្រុមជនសង្ស័យដែលបានកាប់រានដីព្រៃក្នុងតំបន់ដែនជម្រកសត្វព្រៃបឹងពែរ ដើម្បីឃាត់ខ្លួនមកសួរនាំ និងកសាងសំណុំរឿងបញ្ជូនឲ្យតុលាការចាត់វិធានការទៅតាមផ្លូវច្បាប់។
លោក ច័ន្ទសុជាតិ ថ្លែងថា៖ «នៅពេលនេះក្រុមមន្ត្រីឧទ្យានុរក្សយើងទទួលបានតម្រុយខ្លះៗពាក់ព័ន្ធទៅនឹងក្រុមជនប្រព្រឹត្តបទល្មើសហើយ និងកំពុងសហការជាមួយសមត្ថកិច្ចពាក់ព័ន្ធ ដើម្បីឈានទៅដល់ការឃាត់ខ្លួន ក្រុមជនប្រព្រឹត្តបទល្មើសមកសួរនាំ និងចាត់វិធានការទៅតាមនីតិវិធីច្បាប់»។ កាលពីខែកុម្ភៈកន្លងទៅនេះ សមត្ថកិច្ចសង្កាត់រដ្ឋបាលព្រៃឈើរវៀងបានសហការជាមួយកម្លាំងសមត្ថកិច្ចមូលដ្ឋាន និងប្រជាសហគមន៍ព្រៃឈើសំព្រាងចុះស្រាវជ្រាវ និងបង្ក្រាបបានច្រើនករណី និងបានឃាត់ខ្លួនជនប្រព្រឹត្តបទល្មើស ៨ នាក់បញ្ជូនទៅតុលាការ ដើម្បីផ្ដន្ទាទោសផងដែរ។
លោក ហោ ប៊ុនហួរ អភិបាលស្រុករវៀងបានថ្លែងថា ករណីកាប់រានដីព្រៃសហគមន៍ និងដីព្រៃសាធារណៈរបស់រដ្ឋមកធ្វើជាកម្មសិទ្ធិផ្ទាល់ខ្លួន គឺជាអំពើល្មើសច្បាប់។ លោកថ្លែងថា៖ «ខ្ញុំ និងក្រុមការងារបានចុះទៅពិនិត្យដល់ទីតាំងនោះ និងបានឃើញទីតាំងនោះត្រូវបានគេកាប់រាន ពិតប្រាកដមែន។ ករណីនេះយើងនឹងមិនអនុញ្ញាតឲ្យជនប្រព្រឹត្តបទល្មើសរួចខ្លួនឡើយ។ យើងនឹងស៊ើបអង្កេតរកម្ចាស់ និងមេខ្លោងដើម្បីចាត់ការតាមនីតិវិធី»៕
