កណ្ដាល: សមត្ថកិច្ចជំនាញស្រុកពញាឮ និងខេត្តកណ្ដាលកំពុងស៊ើបអង្កេតករណីឃាតកម្មលើព្រះគ្រូចៅអធិការវត្តព្រះចេតិយថ្មី ព្រះនាម ជ័យ រិទ្ធ នៅភូមិចេតិយថ្មី ឃុំវិហារហ្លួង ស្រុកពញាឮ កាលពីយប់ថ្ងៃទី ១៩ ខែធ្នូ ខណៈសាច់ញាតិព្រះសង្ឃរងគ្រោះអះអាងថា ក្រោយកើតហេតុមានបាត់ប័ណ្ណកម្មសិទ្ធិដីធ្លី និងទ្រព្យសម្បត្តិមានតម្លៃមួយចំនួន។
លោក ឈឿន សុចិត្ត ស្នងការនគរបាលខេត្តកណ្ដាលបានឱ្យដឹងពីម្សិលមិញថា មន្ត្រីជំនាញនៃស្នងការដ្ឋាននគរបាលខេត្តកណ្ដាល និងមន្ត្រីអធិការដ្ឋាននគរបាលស្រុកពញាឮកំពុងស្រាវជ្រាវករណីឃាតកម្មនេះយ៉ាងយកចិត្តទុកដាក់។ ប៉ុន្ដែលោកមិនទាន់អាចសន្និដ្ឋានបានថាតើជាអំពើឃាតកម្មដោយសារគំនុំ ឬអំពើប្លន់យកទ្រព្យសម្បត្តិទេ។
លោកបញ្ជាក់ថា៖ «យើងស្រាវជ្រាវសិន បើមានព័ត៌មានអ្វីបន្ថែម ខ្ញុំនឹងជូនដំណឹងបន្តទៀត តែអំឡុងពេលនេះខ្ញុំអត់អាចបង្ហាញអ្វីបានទេ។ ចំពោះការបាត់បង់ទ្រព្យសម្បត្តិលោក គឺយើងកំពុងស្រាវជ្រាវដែរ»។
លោក ដួង តេង អធិការនគរបាលស្រុកពញាឮបានថ្លែងពីម្សិលមិញដែរថា ក្រោយពេលកើតហេតុ គណៈកម្មការវត្តព្រះចេតិយថ្មីបានរាយការណ៍ប្រាប់សមត្ថកិច្ចពីករណីឃាតករបានចូលធ្វើគុតព្រះគ្រូចៅអធិការវត្តព្រះចេតិយថ្មី ព្រះនាម ជ័យ រិទ្ធ ហៅ លោកតា រ៉ន ដែលមានព្រះជន្មជាង ៥០ ព្រះវស្សានៅក្នុងបន្ទប់កុដិរបស់ព្រះអង្គ។
លោកបន្តថា បន្ទាប់ពីទទួលព័ត៌មាននេះ មន្ត្រីជំនាញបានចុះទៅធ្វើកោសល្យវិច័យលើព្រះសពព្រះអង្គដល់កន្លែងកើតហេតុ ហើយបានពិនិត្យឃើញថាពិតជាពាក់ព័ន្ធអំពើឃាតកម្មមែន។ សមត្ថកិច្ចជំនាញកំពុងសាកសួរសាក្សី និងកំណត់អត្តសញ្ញាណជនសង្ស័យ។
លោកបញ្ជាក់ថា៖ «ខ្ញុំមិនទាន់អាចបង្ហាញអ្វីច្រើនលើសពីនេះទេ ព្រោះយើងកំពុងធ្វើការស្រាវជ្រាវតាមនីតិវិធី ដើម្បីឈានទៅចាប់ខ្លួនឃាតករមកផ្ដន្ទាទោសតាមច្បាប់»។
បើតាមលោក ហួត កក្កដា អាយុ ២៤ ឆ្នាំរស់នៅភូមិក្របីព្រៃ ឃុំភ្នំតូច ស្រុកឧដុង្គខេត្តកំពង់ស្ពឺ ត្រូវជាក្មួយបង្កើតរបស់ព្រះគ្រូអធិការរងគ្រោះបានឱ្យដឹងពីម្សិលមិញថា ព្រះអង្គព្រះនាម ជ័យ រិទ្ធ មានស្រុកកំណើតនៅស្រុកអង្គស្នួល ខេត្តកណ្ដាល ពុំធ្លាប់មានប្រពន្ធកូនទេ។
ព្រះអង្គធ្លាប់បានប្រាប់សាច់ញាតិថា ព្រះអង្គមានផ្ទះ ២ ល្វែងនៅផ្សារមាន់អាំង ខណ្ឌទួលគោក រាជធានីភ្នំពេញ និងកំពុងជួលឱ្យគេស្នាក់នៅព្រមទាំងមានដីធ្លីជាច្រើនកន្លែងសុទ្ធតែមានប្លង់រឹង និងមានបច្ច័យច្រើនទៀតផង។ ប៉ុន្តែក្រោយកើតហេតុមានការបាត់ប័ណ្ណកម្មសិទ្ធិដីធ្លី និងទ្រព្យសម្បត្តិមានតម្លៃរបស់ព្រះអង្គមួយចំនួន។
បុរសជាសាច់ញាតិរូបនេះបានរំឭកប្រាប់ថា នៅព្រឹកថ្ងៃទី ២០ ខែធ្នូ មានដូនជីម្នាក់ឆ្ងល់មិនឃើញព្រះគ្រូចៅអធិការវត្តនិមន្តមកឆាន់អាហារពេលព្រឹកដូចសព្វមួយដង។ ពេលនោះគាត់ក៏ដើរទៅមើលនៅក្នុងកុដិឃើញទ្វារកុដិចំហបន្ដិច ប៉ុន្ដែបើកទ្វារមិនរួចក៏បានទៅហៅដូនជីម្នាក់ទៀតមកជួយមើល ស្រាប់តែប្រទះឃើញព្រះអង្គសុគតបាត់ទៅហើយ។ សាកសពព្រះអង្គឃើញមានស្នាមប៉ោងមុខ ប៉ោងមាត់ និងឃើញមានខ្សែពួរចងរឹតកព្រះអង្គទៀតផង។
លោកបញ្ជាក់ថា៖ «នៅពេលដូនជីគាត់ឃើញហេតុការណ៍បែបនេះ ពួកគាត់ក៏បានស្រែកឆោឡោឱ្យគេជួយ ហើយក៏មានការភ្ញាក់ផ្អើលដល់អ្នកភូមិ និងសាច់ញាតិដទៃទៀត ហើយលោកតាអាចារ្យបានប្ដឹងទៅសមត្ថកិច្ចចុះធ្វើកោសល្យវិច័យសាកសពព្រះអង្គតែម្ដង»។
បើតាមលោក ហួត កក្កដា កន្លងមកព្រះអង្គបានរាប់អានបុរសម្នាក់រស់នៅស្រុកឧដុង្គ ខេត្តកំពង់ស្ពឺ ជាបងប្អូនធម៌ ហើយប្អូនធម៌ព្រះអង្គធ្លាប់ចេញចូលកុដិក្នុងវត្តនោះជាញឹកញាប់ ប៉ុន្ដែគេមិនទាន់អាចសន្និដ្ឋានថាជាអ្នកពាក់ព័ន្ធករណីឃាតកម្មនេះឡើយ ដោយរង់ចាំសមត្ថកិច្ចស្រាវជ្រាវឱ្យបានច្បាស់លាស់សិន។ យ៉ាងណាក្ដីលោកបានអំពាវនាវដល់សមត្ថកិច្ចជួយស្វែងរកឃាតករឱ្យឃើញដើម្បីយកមកផ្ដន្ទាទោសតាមច្បាប់៕