.jpg)
ជនរងគ្រោះស្លាប់ដែលសង្ស័យម្តាយបង្កើតកាប់នៅខណ្ឌមានជ័យ។ រូប FB
ភ្នំពេញៈ នគរបាលខណ្ឌមានជ័យកំពុងស្វែងរកចាប់ខ្លួនស្ត្រីជាម្តាយបង្កើត ពាក់ព័ន្ធនឹងការកាប់កូនប្រុសរបស់ខ្លួនស្លាប់ ដែលហេតុការណ៍នេះកើតឡើងនៅភូមិទ្រា៤ សង្កាត់ស្ទឹងមានជ័យ ៣ ខណ្ឌមានជ័យ រាជធានីភ្នំពេញកាលពីថ្ងៃទី ២៣ កុម្ភៈ។
លោក ម៉េង វិមានតារា អធិការនគរបាល ខណ្ឌមានជ័យឲ្យដឹងពីម្សិលមិញថាស្ដ្រីជាម្ដាយឈ្មោះ ហាស់ សុភាព រីឯកូនប្រុសជាជនរងគ្រោះឈ្មោះ កង ច័ន្ទសុខុម អាយុ ៣២ ឆ្នាំ។ ពួកគេរស់នៅជាមួយគ្នានៅផ្ទះលេខ ១៤៣២ ផ្លូវបេតុង ភូមិទ្រា៤ សង្កាត់ស្ទឹងមានជ័យ ៣ ខណ្ឌមានជ័យ។ ឃាតកម្មនេះ សមត្ថកិច្ចកំពុងស្វែងរកគ្រប់មធ្យោបាយដើម្បីចាប់ខ្លួនជនសង្ស័យ។ ការសង្ស័យជាជំហានដំបូង និងផ្អែកតាមការប្រមូលព័ត៌មានបានពីសាក្សីនៅជុំវិញកន្លែងកើតហេតុបានឲ្យដឹងថា ជនសង្ស័យគឺជាម្តាយបង្កើតរបស់បុរសរងគ្រោះ។
លោកប្រាប់ថា៖ «ជនល្មើសមិនអាចគេចផុតពីដៃសមត្ថកិច្ចយើងបានទេ ហើយពេលនេះសមត្ថកិច្ចខ្ញុំកំពុងដុតដៃដុតជើងរកចាប់ខ្លួនជននោះហើយ»។
លោក ឯម ភារី នាយនគរបាលប៉ុស្តិ៍សង្កាត់ស្ទឹងមានជ័យ ៣ ប្រាប់ពីម្សិលមិញថា ជនរងគ្រោះមានប្រពន្ធឈ្មោះ កែវ ស្រីភឿក និងមានកូនស្រីម្នាក់ឈ្មោះ រ៉ា ដានី អាយុ ៧ ឆ្នាំ។ គ្រួសារនេះមានមុខរបរលក់ចាប់ហួយនៅផ្ទះ។ ហេតុការណ៍នេះកើតឡើងនៅវេលាម៉ោង ២ រសៀលថ្ងៃទី ២៣ កុម្ភៈ។ អ្នកនៅក្បែរខាងផ្ទះរបស់ជនរងគ្រោះបានឮជនរងគ្រោះឈ្មោះ កង ច័ន្ទសុខុម ដែលមានជំងឺសរសៃប្រសាទឈ្លោះប្រកែកពាក្យសម្ដីជេរបញ្ចោរគ្នាជាមួយម្ដាយបង្កើតរបស់ខ្លួនឈ្មោះ ហាស់ សុភាព នៅក្នុងផ្ទះ។
លោកបន្តថា ស្ត្រីជាម្តាយក៏ជាមនុស្សមានជំងឺសរសៃប្រសាទដូចគ្នាដែរ។ ពួកគេរស់នៅក្នុងគ្រួសារតែមួយដែលមានទីតាំងដូចខាងលើ។ មុនពេលកើតហេតុគេបានឃើញស្ត្រីជាប្រពន្ធរបស់ជនរងគ្រោះដេកលក់នៅខាងក្រៅផ្ទះ។ ឯកូនស្រីនៅលេងក្នុងផ្ទះហើយបានឃើញស្ត្រីសង្ស័យកាប់សម្លាប់ជនរងគ្រោះ។ ប៉ុន្តែពេលស្ត្រីសង្ស័យកាប់ជនរងគ្រោះនោះកូនស្រីរបស់ជនរងគ្រោះមិនបានប្រាប់ម្តាយរបស់ខ្លួនទេ។ លុះពេលស្ត្រីសង្ស័យចេញពីផ្ទះបាត់ ទើបក្មេងស្រីទៅដាស់ម្តាយប្រាប់ពីហេតុការណ៍នោះ។
លោកបញ្ជាក់ថា៖ «សមត្ថកិច្ចសង្ស័យថា ម្តាយបង្កើតរបស់ជនរងគ្រោះ ព្រោះសំអាងលើសម្តីក្មេងស្រីជាកូនរបស់ជនរងគ្រោះដែលបានឃើញហេតុការណ៍នោះផ្ទាល់ភ្នែក»។
លោកវេជ្ជបណ្ឌិត នង សុវណ្ណរ័ត្ន គ្រូពេទ្យផ្នែកជំនាញកោសល្យវិច័យលើសាកសពប្រាប់ពីម្សិលមិញថា លើក្បាលសាកសពមានស្នាមកាប់ចំហៀងក្បាលផ្នែកខាង ស្តាំផុងលលាដ៍ចេញខួរ ៤ កន្លែង។ ចំណែកនៅលើផ្ទៃមុខមានស្នាមកាប់ផុងដល់ឆ្អឹងចំនួន ៣ កន្លែង។
លោកប្រាប់ថា នៅក្នុងផ្ទះផ្នែកខាងក្រោយសមត្ថកិច្ចរកឃើញពូថៅ ១ ប្រឡាក់ឈាមដែលជនសង្ស័យលាក់ទុក។ ដោយផ្អែកលើពូថៅប្រឡាក់ឈាមនេះហើយបានជាសមត្ថកិច្ចសន្និដ្ឋានថា ពូថៅនោះជាមធ្យោបាយដែលជនសង្ស័យយកទៅសម្លាប់ជនរងគ្រោះ។ ពេលលោកកំពុងពិនិត្យសាកសពនោះ គឺលោកឃើញសមត្ថកិច្ចសាកសួរឪពុកបង្កើត និងប្រពន្ធរបស់ជនរងគ្រោះតែបាត់ម្តាយជនរងគ្រោះ។
លោកថ្លែងថា៖ «ខ្ញុំមាននាទីតែកោសល្យវិច័យលើសាកសពទេ គឺបង្ហាញថាជនរងគ្រោះស្លាប់ដោយកាប់ផុងលលាដ៍ក្បាលហើយពូថៅវាស័ក្តិសមនឹងស្នាមកាប់។ ដូច្នេះសមត្ថកិច្ចសន្និដ្ឋានថា ជាវត្តុតាង»៕
