កណ្ដាលៈ នគរបាលក្រុងតាខ្មៅ កាលពីថ្ងៃទី ១៨ ឧសភា បានបញ្ជូនរបាយការណ៍ទៅស្នងការដ្ឋាននគរបាលខេត្តកណ្តាល រឿងមន្ត្រីនគរបាលម្នាក់បានប្រើកាំភ្លើងបាញ់ទៅលើសត្វឆ្កែមួយក្បាល ក្រោយពីវាបានព្យាយាមដេញខាំ។
លោក យី វណ្ណដា អធិការនគរបាលក្រុងតាខ្មៅ នៅថ្ងៃទី ១៨ ខែឧសភា បានថ្លែងថា មន្ត្រីនគរបាលម្នាក់ឈ្មោះ អ៊ុន សំអាត បំរើការងារនៅការិយាល័យពិនិត្យវិភាគ និងកោសល្យវិច័យនៃស្នងការដ្ឋាននគរបាលខេត្តកណ្តាល បានប្រើប្រាស់អាវុធខុសច្បាប់បាញ់ឆ្កែមួយក្បាល នៅយប់ថ្ងៃទី ១៦ ឧសភា នៅភូមិព្រែកសំរោង៣ សង្កាត់-ក្រុងតាខ្មៅ តែមិនបណ្ដាលឱ្យវារបួស ឬងាប់នោះទេ។
ករណីនេះត្រូវបានលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឲ្យលោកដែលជាអធិការនគរបាលក្រុងតាខ្មៅ និងនគរបាលសង្កាត់តាខ្មៅ ចុះស្រាវជ្រាវភ្លាមៗ ដើម្បីរកមូលហេតុនៃការបង្កហេតុនោះ។
លោក វណ្ណដា ថ្លែងថា៖ «លោកស្នងការបានឲ្យយើងកសាងសំណុំរឿង និងដាក់របាយការណ៍បញ្ជូនទៅគាត់។ ករណីនេះបើលោកស្នងការមានគោលការណ៍ឬចាត់ចែងយ៉ាងម៉េចទៀតនោះ គឺសម្រេចលើលោកស្នងការទេ។ ចំពោះកាំភ្លើងយើងដកហូតបានហើយ»។
លោកបញ្ជាក់ថា មូលហេតុដែលមន្ត្រីនគរបាលរូបនោះបង្កហេតុនេះ ព្រោះគាត់ខឹងនឹងសត្វឆ្កែដោយសារគាត់ជិះម៉ូតូតាមផ្លូវហើយឆ្កែ១ក្បាលដេញខាំគាត់ ហើយគាត់ក៏បានចូលផ្ទះយកកាំភ្លើងមកបាញ់សត្វឆ្កែនោះតែបាញ់មិនត្រូវឆ្កែទេ។
លោក ថ្លែងថា៖ «ក្រោយសាកសួរមក ខ្ញុំបានឱ្យមន្ត្រីនគរបាលរូបនោះត្រឡប់ទៅផ្ទះវិញ គឺមិនបានឃាត់ខ្លួនទេ»។
លោកស្រី មួងផា ចាន់មុន្នី មេភូមិស្តីទីភូមិសំរោង៣ ឱ្យដឹងនៅថ្ងៃទី១៨ឧសភាថា មន្ត្រីនគរបាលម្នាក់នោះ មានផ្ទះនិងរស់នៅក្នុងភូមិសំរោង៣ សង្កាត់-ក្រុងតាខ្មៅ មុនពេលកើតហេតុគេបានឃើញមន្ត្រីនគរបាលរូបនោះជិះម៉ូតូ ១ គ្រឿង នៅតាមផ្លូវក្នុងភូមិ ហើយគេបានឃើញសត្វឆ្កែរត់ដេញតាមព្រូសគាត់ បន្ទាប់មកក៏ស្ងាត់ ស្រាប់តែមួយសន្ទុះក្រោយមកគេឮស្នូរកាំភ្លើងផ្ទុះ ហើយបានផ្អើលដល់អ្នកភូមិនាំគ្នាចេញពីផ្ទះមកចោមរោមមើលហេតុការណ៍ផ្ទុះអាវុធ។
លោកស្រី ចាន់មុន្នី បានឱ្យដឹងទៀតថា៖ «មន្ត្រីនគរបាលរូបនោះបានប្រាប់សមត្ថកិច្ចថា មុនដំបូងគេបានជិះម៉ូតូតាមផ្លូវបម្រុងចូលផ្ទះ ប៉ុន្តែពេលនោះក៏មានសត្វឆ្កែ១ក្បាលដេញខាំគេ ហើយគេក៏មានកំហឹងនឹងសត្វឆ្កែនោះ បន្ទាប់មកគេបានជិះម៉ូតូទៅផ្ទះ ហើយបានយកកាំភ្លើងខ្យល់ដែលទុកប្រចាំនៅក្នុងផ្ទះស្រាប់មកដេញបាញ់សត្វឆ្កែ ១ ក្បាលនោះចំនួន ៣ ទៅ ៤ គ្រាប់ បង្កឱ្យមានការភ្ញាក់ផ្អើលដល់ប្រជាពលរដ្ឋ»៕