ភ្នំពេញៈ សមាជិករាប់រយនាក់នៃកងកម្លាំងសន្តិសុខក្នុងប្រទេស កំពុងរង់ចាំយ៉ាងអត់ធ្មត់ នៅមុខទ្វារភូមិគ្រឹះលោកស្រី ជឹង សុភាព ពាណិជ្ជករនៅក្នុងខណ្ឌដូនពេញ។
បន្ទាប់ពីបានបាញ់កាំជ្រួចក្នុងពិធីចូលឆ្នាំចិន ដែលរៀបចំឡើងដោយប្រធានក្រុមហ៊ុន Pheaphimex ភ្ញៀវបានចាប់ផ្តើមចេញមកផ្លូវ ហើយជិះចេញទៅបាត់ក្នុងរថយន្តទំនើបរបស់ខ្លួន។
បរិយាកាសមានភាពកាន់តែតានតឹង ខណៈដែលបុរសពាក់ឯកសណ្ឋានបន្តរង់ចាំ ដោយពួកគេចាប់ផ្តើមដឹងថា កញ្ចប់ក្រហមមានប្រាក់ ដែលគេហៅថា អាំងប៉ាវ ដែលពួកគេរំពឹងទទួលនោះ ពុំត្រូវបានផ្តល់ជូន ដូចឆ្នាំមុនៗទេ។
ភ្លាមៗនោះ មន្រ្តី និងយោធាបានចាប់ផ្តើមដើរចេញដោយមានទឹកចិត្តមិនសប្បាយចិត្ត ដោយអ្នកខ្លះបានស្តីបន្ទោសវត្តមានរបស់អ្នកសារព័ត៌មាន ដែលមានម៉ាស៊ីនថត រង់ចាំយាយភូ និងប្តីរបស់លោកស្រី គឺលោក ឡៅ ម៉េងឃីន ព្រឹទ្ធសមាជិក ជាហេតុធ្វើឲ្យពាណិជ្ជករសម្រេចចិត្តមិនចែកប្រាក់ឲ្យពួកគេ។
លោក លី វ៉ា មន្រ្តីនគរបាលកុបកម្ម ដែលធ្លាប់ទទួលបានប្រាក់ ៥០០០០ រៀលពីយាយ ភូ កាលពីមុន បានថ្លែងថា៖ «ខ្ញុំ និងមនុស្សជាច្រើនទៀតខកចិត្ត ព្រោះមនុស្សក្នុងផ្ទះប្រាប់យើងថា គ្មានអាំងប៉ាវទេ ព្រោះអ្នកសារព័ត៌មានច្រើននាក់ថតវីដេអូ និងរូបថត។ ខ្ញុំមិនដឹងថាតើហេតុអ្វី គាត់ខ្លាចអ្នកសារព័ត៌មានបែបនោះទេ»។
ប្រភពមួយទៀត ដែលជិតស្និទ្ធនឹងគ្រួសារនេះ តែស្នើសុំមិនបញ្ចេញឈ្មោះ បានប្រាប់ ភ្នំពេញ ប៉ុស្តិ៍ ថា សេចក្តីសម្រេចត្រូវបានធ្វើឡើងកាលពីឆ្នាំមុន ដែលសម្រេចឈប់ចែកអាំងប៉ាវទៀតហើយ ដោយសារតែការចោទប្រកាន់ជាសាធារណៈថា ប្តីប្រពន្ធទាំងពីរនាក់ ដែលជាប់ពាក់ព័ន្ធនឹងវិវាទដីធ្លីជាច្រើននោះ រួមទាំងដីនៅបឹងកក់ បានប្រើប្រាស់ឱកាសនៃបុណ្យចូលឆ្នាំចិនប្រចាំឆ្នាំដើម្បីទិញការគាំទ្រពីកងប្រដាប់អាវុធ។
ប្រភពនោះបានឲ្យដឹងថា៖ «យើងខកចិត្តណាស់ចំពោះការចោទបែបនេះ។ យើងគ្មានជម្រើសអ្វីទេ ក្រៅពីការមិនចែកអាំងប៉ាវឲ្យអាជ្ញាធររដ្ឋ ដែលពាក់ឯកសណ្ឋាននគរបាលកងរាជអាវុធហត្ថ និងកងប្រដាប់អាវុធ បន្ទាប់ពីការចែកនេះត្រូវបានរិះគន់ដោយសាធារណជន»។
ប៉ុន្តែ លោក វ៉ា មន្រ្តីនគរបាល បានរិះគន់សេចក្តីសម្រេចនេះ ដែលលោកថា គឺជាប្រាក់រង្វាន់បន្ថែមសម្រាប់មនុស្សដែលមានប្រាក់ខែមិនគ្រប់គ្រាន់ ដូចរូបលោក។ លោក វ៉ា រកបានប្រាក់១៥០ ដុល្លារក្នុងមួយខែ។
លោកបានបន្ថែមថា៖ «ដោយសារប្រាក់ខែទាប យើងមកយកអាំងប៉ាវ។ មិនត្រឹមតែមនុស្សមានឋានៈទាបដូចខ្ញុំទេ ប៉ុន្តែអ្នកឋានៈខ្ពស់ ក៏មកសុំដែរ ហើយយើងខ្មាសអៀន ព្រោះយើងធ្វើការជាមួយនឹងរដ្ឋាភិបាល ហើយយើងពាក់ឯកសណ្ឋាន»។
លោក បូរ៉ា ទាហានវ័យកណ្តាល ដែលចាកចេញជាមួយនឹងកូនក្មេង ពីរនាក់ បានថ្លែងឲ្យដឹងថា លោកទទួលបាន ២០០០០ រៀលកាលពីឆ្នាំមុន ពីយាយភូ។ «ហើយកូនខ្ញុំក៏បានអាំងប៉ាវផងដែរ។ ប៉ុន្តែឆ្នាំនេះ ខ្ញុំមិនដឹងថា ហេតុអ្វីគាត់មិនឲ្យអ្វីយើងនោះទេ»។
ប៉ុន្តែនៅកែងផ្លូវជិតនោះ អាំងប៉ាវត្រូវបានចែកផងដែរនៅផ្ទះលោក កុក អាន ដែលជាអ្នកជំនួញមានឥទ្ធិពលម្នាក់និងជាព្រឹទ្ធសមាជិកគណបក្សប្រជាជនកម្ពុជានិងជាទីប្រឹក្សាលោកនាយករដ្ឋមន្រ្តី ហ៊ុន សែន។
នៅវេលាម៉ោង១១:៣០ ព្រឹក ម្សិលមិញមានការលេចឮព័ត៌មានថានៅជិត Cobra Gold KTV ដែលគេដឹងថាជាកម្មសិទ្ធិរបស់មន្រ្តីគយជាន់ខ្ពស់ម្នាក់ ក៏មានការចែកអាំងប៉ាវនិងភេសជ្ជៈផងដែរ និងមានទាហានជាច្រើននាក់បានទៅកាន់ទីនោះ។
មន្រ្តីនគរបាលម្នាក់ដែលបដិសេធមិនបង្ហាញឈ្មោះបានប្រាប់កាលល្ងាចម្សិលមិញថា គាត់និងអ្នកដទៃៗទៀតរាប់រយអ្នកបានត្រឡប់ទៅផ្ទះយាយភូនៅពេលរសៀល ប៉ុន្តែក៏មិនទទួលបានអាំងប៉ាវដែរ។
លោក សុខ សំអឿន មេធាវីសិទ្ធិមនុស្សនិងជាសកម្មជនម្នាក់ បានថ្លែងកាលម្សិលមិញថា បើទោះបីជាវាទំនងជាថា យាយ ភូ និង លោក ឡាវម៉េងឃិន ដឹងថា ចំនួនទាហាន និងនគរបាលជាច្រើននាំគ្នាទៅក្រៅផ្ទះរបស់ពួកគាត់ដើម្បីទទួលបានអាំងប៉ាវ វាមើលទៅមិនល្អមែន តែវានឹងមិនមានន័យថា ប្តីប្រពន្ធអ្នកទាំងពីរចង់ទិញភាពស្មោះត្រង់នោះទេ។
លោកបន្តទៀតថា៖ «ប្រសិនបើពួកគេចង់ ពួកគេនៅតែអាចឧបត្ថម្ភទៅអង្គភាពណាមួយដោយផ្ទាល់ឬធ្វើអ្វីមួយដូចនោះ។ វាមិនខុសច្បាប់ ច្បាប់មិនហាមប្រាមទេ»។ PS/TK
