រតនគិរី/កំពង់ស្ពឺ: សមត្ថកិច្ចខេត្តរតនគិរីបានចាប់ឃាត់រថយន្តដឹកគ្រឿងសង្ហារិមរបស់ប្រជាពលរដ្ឋមួយគ្រួសារនៅឃុំត្រពាំងក្រហម ស្រុកកូនមុំ ដែលរុះរើផ្ទះ ហើយដឹកយកទៅដាក់ផ្ទះថ្មីនៅភ្នំពេញ ខណៈដែលមន្ត្រីកងរាជអាវុធហត្ថខេត្តកំពង់ស្ពឺបានដុតកម្ទេចរថយន្តកែច្នៃដឹកឈើ ៥ គ្រឿង ក្រោយពីរឹបអូសពីជនល្មើសដឹកឈើខុសច្បាប់។
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរីបានថ្លែងពីម្សិលមិញថា កម្លាំងកងរាជអាវុធហត្ថស្រុកកូនមុំ សហការជាមួយអាវុធហត្ថលើផ្ទៃប្រទេសបានចាប់ឃាត់រថយន្តយីឌុបម៉ាកនីសាន់ ១ គ្រឿងដែលដឹកគ្រឿងសង្ហារិម និងសម្ភារធ្វើពីឈើមួយចំនួននៅភូមិ ១ ឃុំត្រពាំងក្រហម ស្រុកកូនមុំកាលពីថ្ងៃទី ១៤ ខែមិថុនា។
មន្ត្រីជំនាញបានផ្ដល់ដំណឹងមកលោកថា ម្ចាស់គ្រឿងសង្ហារិមទាំងនេះបានរុះរើផ្ទះរបស់ខ្លួន ដោយដឹកជញ្ជូនគ្រឿងសង្ហារិមទាំងអស់យកទៅដាក់នៅផ្ទះថ្មីនៅភ្នំពេញ ដោយមានលិខិតអនុញ្ញាតពីភូមិ ឃុំ ប៉ុន្ដែមិនមានលិខិតអនុញ្ញាតដឹកជញ្ជូនពីមន្ត្រីជំនាញរដ្ឋបាលព្រៃឈើទើបសមត្ថកិច្ចត្រូវតែឃាត់សាកសួរបែបនេះ។
លោកបានបន្តថា៖ «រឿងនេះខ្ញុំបានបញ្ជូនទាំងសំណុំរឿង និងវត្ថុតាងទៅឲ្យរដ្ឋបាលព្រៃឈើអស់ហើយ។ រីឯរឿងគាត់ពិន័យ ឬសម្រេចយ៉ាងណាខ្ញុំអត់ដឹងទេ ព្រោះពួកខ្ញុំគ្រាន់តែចុះបង្ក្រាប និងអនុវត្តបទបញ្ជា ហើយទាក់ទងបច្ចេកទេស ឬសម្រេចបែបណាខ្ញុំអត់ដឹងទេ»។
លោក កែប កត់ នាយខណ្ឌរដ្ឋបាលព្រៃឈើខេត្តរតនគិរីពីម្សិលមិញបានបដិសេធធ្វើអត្ថាធិប្បាយជុំវិញករណីនេះដោយអះអាងថា កំពុងជាប់រវល់។
លោក សយ សូណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តរតនគិរីថ្លែងថា លោកមិនទាន់បានទទួលរបាយការណ៍ ឬព័ត៌មាននេះទេ ដោយលោកអះអាងថា មន្ត្រីជំនាញប្រហែលកំពុងរវល់ធ្វើរបាយការណ៍នេះបញ្ជូនមកលោកពិនិត្យ។
តាមរបាយការណ៍របស់កងរាជអាវុធហត្ថលើផ្ទៃប្រទេសបានបង្ហោះលើគេហទំព័រហ្វេសប៊ុកខ្លួន (GRK News) ពីម្សិលមិញថា ម្ចាស់រថយន្តមានឈ្មោះ ណំ ប៊ុនថាន ភេទប្រុស អាយុ ៤៩ ឆ្នាំមានលំនៅភូមិអូរកន្សែង សង្កាត់បឹងកន្សែង ក្រុងបានលុង ត្រូវបានឃាត់ខ្លួនរួមនឹងវត្ថុតាងរួមមាន តុ ១ ក្តារងឿ ១ ទ្វារ ៥ សន្លឹក និងកៅអី ព្រមទាំងសម្ភារធ្វើពីឈើមួយចំនួនទៀត។ បច្ចុប្បន្នសមត្ថកិច្ចបានប្រគល់រថយន្ត និងសម្ភារទាំងអស់ជូនមន្ត្រីរដ្ឋបាលព្រៃឈើខេត្តរតនគិរី ដើម្បីចាត់ការតាមនីតិវិធី។
រឿងដាច់ដោយឡែកមួយទៀតមន្ត្រីកងរាជអាវុធហត្ថលើផ្ទៃប្រទេស និងកងរាជអាវុធហត្ថខេត្តកំពង់ស្ពឺនៅថ្ងៃទី ១២ ខែមិថុនា បានបំផ្ទុះចោលរថយន្តកែច្នៃបាកុងចំនួន ៥ គ្រឿងនៅភូមិក្រាំងពង្រ ឃុំសង្កែសាទប ស្រុកឱរ៉ាល់ ដែលត្រូវបានបង្ក្រាបនាពេលកន្លងមក។
លោក ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺកាលពីម្សិលមិញបានបដិសេធធ្វើអត្ថាធិប្បាយ ជុំវិញករណីនេះដោយអះអាងថា លោកកំពុងជាប់រវល់មិនអាចនិយាយទូរស័ព្ទបាន។
តាមរបាយការណ៍របស់កងរាជអាវុធហត្ថលើផ្ទៃប្រទេសឲ្យដឹងថា ក្រោយពីបំផ្ទុះកម្ទេចចោលរួច បំណែករថយន្តបាកុងទាំង ៥ គ្រឿងនេះត្រូវបានប្រគល់ជូនស្នាក់ការបរិស្ថាន ដែនជម្រកសត្វព្រៃភ្នំឱរ៉ាល់យកទៅរក្សាទុកនៅស្នាក់ការ។
របាយការណ៍បន្ដថា បន្ទាប់ពីមានបទបញ្ជាពីលោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស សមត្ថកិច្ចជំនាញបានបង្ក្រាបរថយន្តបាកុងនៅស្រុកឱរ៉ាល់សរុបចំនួន ១៧ គ្រឿងក្នុងអំឡុងពេលយុទ្ធនាការបង្ក្រាបបទល្មើសព្រៃឈើកន្លងទៅ។ ក្នុងនោះសម្រេចកាត់កម្ទេចចោលសរុបចំនួន ១៤ គ្រឿង និងប្រគល់រថយន្តដែលនៅមានគុណភាពចំនួន ៣ គ្រឿងជូនស្នាក់ការដែនជម្រកសត្វព្រៃថែរក្សាទុក៕