The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ខ្មែរ​ និង​ FBI ​ចាប់​បុរស​អាមេរិក​ពី​បទ​រំលោភ




សមត្ថកិច្ច​ខ្មែរ​ និង​ FBI ​ចាប់​បុរស​អាមេរិក​ពី​បទ​រំលោភ

Content image - Phnom Penh Post
បុរស​ជាតិ​អាមេរិក​ក្នុង​ពេល​ចាប់​ខ្លួន​កាលពី​ថ្ងៃ​សុក្រ​។ រូប សហការី

សមត្ថកិច្ច​ខ្មែរ​ និង​ FBI ​ចាប់​បុរស​អាមេរិក​ពី​បទ​រំលោភ

បាត់ដំបងៈ បុរស​ជនជាតិ​អាមេរិកាំង​ម្នាក់​ត្រូវ​បាន​សមត្ថកិច្ច​កម្ពុជា និង​មន្ត្រី​ FBI ​របស់​អាមេរិក​ចាប់​ខ្លួន​កាល​ពី​ថ្ងៃ​សុក្រ​សប្ដាហ៍​មុន​នៅ​ភោជនីយដ្ឋាន​មួយ​ក្នុង​សង្កាត់​ចំការ​សំរោង ក្រុង-ខេត្ត​បាត់ដំបង​។

លោក ស ថេត ស្នងការ​នគរបាល​ខេត្ត​បាន​ថ្លែង​ថា​សមត្ថកិច្ច​មូលដ្ឋាន​បាន​ធ្វើការ​ជាមួយ​ភ្នាក់ងារ​ FBI អស់​ពេល​ជិត​ ២ ​ឆ្នាំ​មក​ហើយ​ដើម្បី​ស្វែងរក​ចាប់​ខ្លួន​បុរស​ឈ្មោះ Boehnlein ​នេះ​។

លោក​បាន​បញ្ជាក់​ថា​៖ «​យើង​គ្រាន់តែ​សហការ និង​នាំ​កម្លាំង​ទៅ​កន្លែង​ជនសង្ស័យ​នៅ​»​។ លោក​បន្ថែម​ថា​៖ «​ជនសង្ស័យ​តែងតែ​ចេញ​ចូល​ខេត្ត​បាត់ដំបង​ និង​ខេត្ត​សៀមរាប​»​។

លោក Boehnlein ត្រូវ​បាន​ផ្តន្ទាទោស​ពី​បទ​រួមភេទ និង​ប្រព្រឹត្ត​ទង្វើ​មិន​សមរម្យ​ជាមួយ​ក្មេង​អាយុ​ក្រោម​ ១៦ ​ឆ្នាំ​នៅ​រដ្ឋ​តិចសាស សហរដ្ឋអាមេរិក​កាលពី​ឆ្នាំ​ ២០០២ ​។

យោង​តាម​កំណត់ត្រា​របស់​តុលាការ​យោធា​បាន​បញ្ជាក់​ថា​លោក Boehnlein បាន​រំលោភ​ផ្លូវ​ភេទ​លើ​កូនស្រី​របស់​គាត់​អស់​រយៈពេល​ជាច្រើន​ឆ្នាំ​។

លោក Boehnlein បាន​ភៀស​ខ្លួន​ចេញ​ពី​សហរដ្ឋ​អាមេរិក​រយៈពេល​ខ្លី​ក្នុង​ឆ្នាំ​ ២០០០ បន្ទាប់ពី​ករណី​រំលោភ​ផ្លូវភេទ​របស់​គាត់​ត្រូវ​បាន​គេ​រាយការណ៍​ទៅ​អាជ្ញាធរ​ក្រោយពី​គេ​បាន​ឃើញ​បុរស​រូប​នេះ​នៅ​ប្រទេស​ម៉ិកស៊ិក​អស់​ពេល​ ២ ​ឆ្នាំ​ដោយ​បង្រៀន​ភាសា​អង់គ្លេស​តាម​សាលា​។

យោង​តាម​បញ្ជី​ឈ្មោះ​ជនល្មើស​រំលោភ​បំពាន​ផ្លូវភេទ​នៅ​ក្រុង Louisiana សហរដ្ឋ​អាមេរិក លោក Boehnlein ត្រូវ​បាន​ដោះលែង​ពី​ការ​ឃុំឃាំង​នៅ​ឆ្នាំ​ ២០១១ ហើយ​បាន​ផ្លាស់ប្តូរ​លំនៅ​ដោយ​មិន​បាន​ជូន​ដំណឹង​ដល់​អាជ្ញាធរ​ទេ​។

អ្នក​នាំពាក្យ​ក្រសួង​ការបរទេស​អាមេរិក​លោក Arend Zwartjes បាន​បដិសេធ​មិន​អត្ថាធិប្បាយ​លម្អិត​ពី​រឿង​ក្តី​នេះ​ទេ ប៉ុន្តែ​បាន​បញ្ជាក់​តាម​អ៊ីមែល​ថា រដ្ឋាភិបាល​សហរដ្ឋ​អាមេរិក​ និង​ភ្នាក់ងារ​អនុវត្ត​ច្បាប់​ជាច្រើន​ទៀត​មាន​មោទនភាព​ចំពោះ​កិច្ចសហប្រតិបត្តិការ​នេះ​ហើយ​​លោក​ថ្លែង​ថា​ពិត​ជា​រីករាយ​​ជាមួយ​នឹង​អាជ្ញាធរ​កម្ពុជា​ក្នុង​ការ​ប្រយុទ្ធ​ប្រឆាំង​នឹង​ឧក្រិដ្ឋកម្ម​អន្តរជាតិ​នេះ​៕ NS

Daphne Chen

អត្ថបទគួរចាប់អារម្មណ៍