ស្វាយរៀង/បាត់ដំបង: មន្ត្រីកាំកុងត្រូលសាខាខេត្តស្វាយរៀង និងខេត្តបាត់ដំបងនៅថ្ងៃទី ១៨ ឧសភា បានដកហូតទំនិញចម្រុះខូចគុណភាព និងហួសកាលបរិច្ឆេទប្រើប្រាស់សរុបជាង ១០០ គីឡូក្រាម បន្ទាប់ពីរកឃើញពេលចុះត្រួតពិនិត្យទំនិញនៅតាមទីកន្លែងផ្សេងៗគ្នា ហើយពេលនេះសមត្ថកិច្ចកំពុងរៀបចំដុតកម្ទេចចោលទៅតាមនីតិវិធី។
លោក ម៉ាន់ សុខន អនុប្រធានសាខាកាំកុងត្រូលខេត្តស្វាយរៀងបានថ្លែងពីម្សិលមិញថា កាលពីថ្ងៃទី ១៨ ឧសភា ដោយមានកិច្ចសហការពីមន្ត្រីមន្ទីរពាណិជ្ជកម្មខេត្ត និងអាជ្ញាធរដែនដីមន្ត្រីរបស់លោកបានបន្តចុះផ្សព្វផ្សាយពីគុណភាពសុវត្ថិភាពម្ហូបអាហារ ត្រួតពិនិត្យផលិតផលម្ហូបអាហារ និងទំនិញវេចខ្ចប់ស្រាប់នៅតាមដេប៉ូក្នុងផ្សារ នៅឃុំដូនស ស្រុកស្វាយជ្រំ ខេត្តស្វាយរៀង។
លោកបន្តថា ប្រតិបត្តិការនេះមន្ត្រីជំនាញបានរកឃើញទំនិញខូចគុណភាព និងហួសកាលបរិច្ឆេទប្រើប្រាស់មួយចំនួនដូចជា នំបង្គា ១៥ កញ្ចប់ធំ,កាហ្វេ ៥ កញ្ចប់ធំ, នំបាញ់ត្រាង ២០០ កញ្ចប់, ទឹកក្រូចកូកា ១០ ដបធំ,
មីស្រួយ ៣ កេស, ប្រហិត ២៥ កញ្ចប់, ងៀតគោ ២ កេសធំ, ម្សៅបំពងស្រួយ ៣០ កញ្ចប់ធំ និងនំចម្រុះ ៥០ គីឡូក្រាម។
លោកបន្ថែមថា ទំនិញខូចគុណភាពទាំងនេះត្រូវបានសមត្ថកិច្ចបានធ្វើកំណត់ហេតុដកហូតទៅរក្សាទុក និងគ្រោងដុតកម្ទេចចោលតាមនីតិវិធី។
ទន្ទឹមនឹងនេះមន្ត្រីជំនាញបានណែនាំដល់អាជីវករឲ្យយល់ដឹង និងអនុវត្តទៅតាមច្បាប់ស្តីពីការគ្រប់គ្រងគុណភាព សុវត្ថិភាពលើផលិតផល ទំនិញ និងសេវាចៀសវាងបង្កផលប៉ះពាល់ដល់សុខភាពពលរដ្ឋ និងអាចប្រឈមមុខនឹងផ្លូវច្បាប់ទៀតផង។
លោក សុខន បញ្ជាក់ថា៖ «ខ្ញុំសូមអំពាវនាវឲ្យពលរដ្ឋសហការជាមួយសមត្ថកិច្ចដោយរាយការណ៍ ឬផ្ដល់ព័ត៌មានបើមានការសង្ស័យទំនិញដែលគ្មានសុវត្ថិភាពដើម្បីធានាគុណភាពទំនិញលើទីផ្សារឲ្យមានសុវត្ថិភាពល្អ ក៏ដូចជារួមគ្នាគិតគូរពីសុខភាពសាធារណៈ»។
ករណីស្រដៀងគ្នានេះនៅថ្ងៃដដែលនោះ មន្ត្រីកាំកុងត្រូលខេត្តបាត់ដំបងក៏បានដកហូតទំនិញខូចគុណភាពចម្រុះសរុប ៤៣ គីឡូក្រាម ដែលក្លែងបន្លំស្លាកសញ្ញា និងផុតកំណត់កាលបរិច្ឆេទប្រើប្រាស់ផងដែរ បន្ទាប់ពីមន្ត្រីជំនាញកាំកុងត្រូលបានចុះត្រួតពិនិត្យនៅផ្សារថ្មគោល និងផ្សារដំណាក់ស្ដៅនៅស្រុករតនមណ្ឌល ខេត្តបាត់ដំបង។
លោក ហាក់ សុខរិន ប្រធានសាខាកាំកុងត្រូលខេត្តបាត់ដំបងបានថ្លែងពីម្សិលមិញថា ប្រតិបត្តិការនេះមានការសហការពីមន្ត្រីមន្ទីរពាណិជ្ជកម្ម និងគណៈកម្មការផ្សារទាំង ២ ក្នុងការទប់ស្កាត់ចរាចរណ៍ទំនិញខូចគុណភាព ក្លែងបន្លំស្លាកសញ្ញា និងផុតកំណត់កាលបរិច្ឆេទប្រើប្រាស់។
លោកបន្តថា មន្ត្រីជំនាញបានធ្វើតេស្តលើម្ហូបអាហារមានដូចជា គុយទាវសរសៃតូច-ធំ ប្រហិតសាច់គោ សាច់ក្រកគោ មឹកស្រស់ និងបង្គាស្រស់ ដើម្បីរកសារធាតុគីមីហាមឃាត់ដែលអាចធ្វើឲ្យប៉ះពាល់ដល់សុខភាពពលរដ្ឋ។ ជាមួយគ្នានោះ មន្ត្រីជំនាញបានត្រួតពិនិត្យរកភាពមិនអនុលោមនៅលើសម្បកវេចខ្ចប់ផលិតផលម្ហូបអាហារផងដែរ។
លោកបន្ថែមថា ប្រតិបត្តិការនោះមន្ត្រីជំនាញបានរកឃើញទំនិញខូចគុណភាព រួមមាន ទឹកតែខៀវចំនួន ៣៦ គីឡូក្រាមទឹកស៊ីអ៊ីវចំនួន ៦ គីឡូក្រាមម្សៅដូងចំនួន ១ គីឡូក្រាម និងទំនិញមួយចំនួនទៀតសរុបទំនិញដកហូតបានចំនួន ៤៣ គីឡូក្រាម។
លោក សុខរិន បញ្ជាក់ថា៖ «មន្ត្រីជំនាញយើងបានធ្វើកំណត់ហេតុដកហូតទំនិញទាំងនោះដោយគ្រោងដុតកម្ទេចចោល និងបានធ្វើការណែនាំដល់អាជីវករដទៃឲ្យយល់ដឹង និងអនុវត្តទៅតាមច្បាប់ស្តីពីការគ្រប់គ្រងគុណភាពសុវត្ថិភាពលើផលិតផលទំនិញ និងសេវាចៀសវាងបង្កផលប៉ះពាល់ដល់សុខភាពពលរដ្ឋ និងប្រឈមមុខផ្លូវច្បាប់»៕