.jpg)
នគរបាលបង្ហាញខ្លួនជនជាតិចិននិងវត្ថុតាង ក្រោយចាប់ខ្លួនកាលពីយប់ថ្ងៃទី ២៩ ខែកក្កដា នៅខណ្ឌសែនសុខ។ រូបថត នគរបាល
ភ្នំពេញ: មន្ត្រីជំនាញនៃអធិការដ្ឋាននគរបាលខណ្ឌសែនសុខ គ្រោងបញ្ជូនជនសង្ស័យជាជនជាតិចិនចំនួន ២ នាក់ ក្នុងចំណោម ៣ នាក់ ទៅសាលាដំបូងរាជធានីភ្នំពេញ បន្ទាប់ពីសមត្ថកិច្ចឃាត់ខ្លួនពួកគេកាលពីយប់ថ្ងៃទី ២៩ ខែកក្កដា ពាក់ព័ន្ធការបង្ខាំង និងជំរិតទារប្រាក់ពីជនរងគ្រោះជាជនជាតិចិនចំនួន ៣ នាក់ ក្នុងផ្ទះជួលមួយកន្លែង នៅសង្កាត់អូរបែកក្អម ខណ្ឌសែនសុខ រាជធានីភ្នំពេញ។
លោក ហួរ ម៉េងវ៉ាង អធិការនគរបាលខណ្ឌសែនសុខ បានថ្លែងប្រាប់ភ្នំពេញប៉ុស្ដិ៍នៅថ្ងៃនេះថា សមត្ថកិច្ចជំនាញនៃអធិការដ្ឋាននគរបាលខណ្ឌសែនសុខ បាននិងកំពុងសាកសួរជនសង្ស័យជាជនជាតិចិនចំនួន ២ នាក់ ក្នុងចំណោមបក្ខពួក ៣ នាក់ (រត់គេចខ្លួនម្នាក់) បន្ទាប់ពីសមត្ថកិច្ចឃាត់ខ្លួនពួកគេនៅយប់ថ្ងៃទី ២៩ ឈានចូលថ្ងៃទី ៣០ ខែកក្កដា នៅក្នុងសង្កាត់អូរបែកក្អម។
លោកបានឲ្យដឹងទៀតថា សមត្ថកិច្ចបានទទួលព័ត៌មានពីជនរងគ្រោះម្នាក់ក្នុងចំណោម ៣ នាក់ ដែលបានរត់គេចខ្លួនចេញពីក្រុមជនល្មើស ហើយបានរត់មកពឹងពលរដ្ឋខ្មែរឲ្យជួយប្រាប់សមត្ថកិច្ចពីការបង្ខាំង និងជំរិតទារប្រាក់ពីពួកគេរាប់ម៉ឺនដុល្លារ។ ក្រោយពីទទួលបានដំណឹងនេះ លោកបានដឹកនាំកម្លាំងជំនាញចុះទៅបង្ក្រាបផ្ទាល់ ដោយឃាត់ខ្លួនជនល្មើសបានចំនួន ២ នាក់ រីឯបក្ខពួកម្នាក់ទៀតបានរត់គេចខ្លួន។
លោកថ្លែងថា៖ «ក្រោយពីយើងចាប់ហើយ គឺឥឡូវនេះមន្ត្រីជំនាញយើងកំពុងសាកសួរទាំងជនរងគ្រោះ និងជនសង្ស័យ ដើម្បីធ្វើកំណត់ហេតុ និងកសាងសំណុំរឿងបញ្ជូនទៅតុលាការ។ ការបញ្ជូនទៅតុលាការ គឺយើងគ្រោងនឹងបញ្ជូនទៅ តែខ្ញុំមិនដឹងពេលវេលាជាក់លាក់ទេ បើយើងសាកសួររួចរាល់ថ្ងៃនេះ (៣០ ខែកក្កដា) គឺអាចនឹងបញ្ជូនទៅនៅថ្ងៃទី ៣១ ខែកក្កដា តែយ៉ាងណាខ្ញុំមិនទាន់អាចបញ្ជាក់ច្បាស់ទេ»។
លោក នាង ផល្លី នាយប៉ុស្ដិ៍នគរបាលរដ្ឋបាលសង្កាត់អូរបែកក្អមបានថ្លែងឲ្យដឹងនៅថ្ងៃនេះដែរថា សមត្ថកិច្ចជំនាញបានប្រាប់ឲ្យអ្នកបកប្រែភាសាចិនម្នាក់សួរឈ្មោះជនរងគ្រោះ និងជនសង្ស័យ។ ដោយពួកគេបានរៀបរាប់ប្រាប់ថា ជនរងគ្រោះមានចំនួន ៣ នាក់ឈ្មោះ HE LANG អាយុ ២១ ឆ្នាំ ជាជនជាតិចិន, ឈ្មោះ YANG XUELIN អាយុ ៣០ ឆ្នាំ ជនជាតិចិន និងឈ្មោះ LIS HIJIE អាយុ ១៨ ឆ្នាំ។
រីឯជនសង្ស័យចំនួន ២ នាក់ រួមមានឈ្មោះ JIANG LIANG អាយុ ២៨ ឆ្នាំ និងឈ្មោះ DENG ZHONGHENG អាយុ ២៨ ឆ្នាំ (អ្នកគេចខ្លួនមិនចាំឈ្មោះ) ពួកគេស្នាក់នៅភូមិទ្រូងមាន់ សង្កាត់អូរបែកក្អម ខណ្ឌសែនសុខ។
លោកបន្តថា ជនរងគ្រោះទាំង ៣ នាក់នេះ បានចេញពីធ្វើការនៅហាងមួយកន្លែងនៅវេលាម៉ោង ១២ យប់រំលងអាធ្រាត្រឈានចូលថ្ងៃទី ២៧ ខែកក្កដា ដោយសំដៅមកបន្ទប់ជួល ស្រាប់តែមានរថយន្តមួយគ្រឿងមានគ្នា ៣ នាក់ជាជនជាតិចិនដូចគ្នា បានចុះមកដាក់ខ្នោះដៃពួកគេ ហើយរុញបញ្ចូលរថយន្ត ហើយបើកសំដៅមកភ្នំពេញ បង្ខាំងនៅផ្ទះជួល និងបានគំរាម ជំរិតទារប្រាក់ពីជនរងគ្រោះរាប់ម៉ឺនដុល្លា និងប្រើឧបករណ៍ឆក់មុខមាត់ បណ្ដាលឲ្យជនរងគ្រោះឈាមមាត់ ស្លេកស្លាំង បង្អត់បាយចំនួន ៣ ថ្ងៃ។ ក្នុងនោះមានជនរងគ្រោះម្នាក់បានឲ្យលុយចំនួន ២០ ម៉ឺនយេនជាលុយចិនទៅឲ្យជនសង្ស័យ។
លោកថ្លែងថា៖ «ជនរងគ្រោះដែលអត់ប្រាក់ ត្រូវបានជនសង្ស័យវាយឲ្យរបួស។ លុះនៅយប់ថ្ងៃទី ២៩ កក្កដា នេះ មានជនរងគ្រោះម្នាក់បានរត់ចេញតាមសំយ៉ាបផ្ទះចេញមកខាងក្រៅ ហើយពឹងប្រជាពលរដ្ឋខ្មែរយើង ឲ្យជួយប្រាប់ទៅប៉ូលីសឲ្យជួយគាត់ផង។ ជនសង្ស័យដឹងខ្លួនថា បែកការណ៍ ហើយបានប្រមូលរៀបចំឥវ៉ាន់ បម្រុងនឹងចាកចេញពីផ្ទះទាំង ៣ នាក់ តែរត់គេចខ្លួនបានម្នាក់ រីឯ ២ នាក់ ត្រូវបានសមត្ថកិច្ចឃាត់ខ្លួនតែម្ដង»៕
