.jpg)
ជនសង្ស័យត្រូវសមត្ថកិច្ចឃាត់ខ្លួន ពាក់ព័ន្ធករណីរំលោភសេពសន្ថវៈលើក្មេងស្រី។ រូបថត ប៉ូលិស
ស្វាយរៀង៖ នគរបាលប្រឆាំងការជួញដូរមនុស្សខេត្តស្វាយរៀង គ្រោងបញ្ជូនបុរសចំណាស់ម្នាក់ទៅសាលាដំបូងខេត្តនៅថ្ងៃស្អែកនេះ បន្ទាប់ពីឃាត់ខ្លួនករណីចាប់រំលោភសេពសន្ថវៈក្មេងស្រីម្នាក់នៅឃុំទួលកី ស្រុកចន្រ្ទា ខេត្តស្វាយរៀង កាលពីថ្ងៃទី ១ ឧសភា។
លោក នេត សារឿន ប្រធានការិយាល័យប្រឆាំងការជួញដូរមនុស្សនៃស្នងការដ្ឋាននគរបាលខេត្តស្វាយរៀងប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២ ឧសភានេះថា បុរសឈ្មោះ សាង វ៉ាង អាយុ ៧០ ឆ្នាំ ដែលពាក់ព័ន្ធករណីចាប់រំលោភសេពសន្ថវៈក្មេងស្រីម្នាក់ គឺសមត្ថកិច្ចលោកគ្រោងបញ្ជូនទៅសាលាដំបូងខេត្តនៅថ្ងៃទី ៣ ឧសភា។
លោកប្រាប់ថា៖ «ពេលនេះមន្រ្តីជំនាញរបស់យើងកំពុងបន្តសាកសួរជនសង្ស័យ ដើម្បីបំពេញបែបបទតាមនីតិវិធីនៅឡើយ។ ប៉ុន្តែលោកគ្រោងនឹងបញ្ជូនជននេះទៅតុលាការនៅថ្ងៃស្អែក»។
ពាក់ព័ន្ធនឹងករណីដែរ លោក ញ៉ែម សុធាវុធ ប្រធានប៉ុស្តិ៍នគរបាលឃុំទួលកី ប្រាប់ថា ក្មេងរងគ្រោះឈ្មោះ ភ.ព អាយុ ១៤ ឆ្នាំ រស់នៅក្នុងឃុំ ស្រុក ជាមួយជនសង្ស័យដែរ។ ជនសង្ស័យត្រូវបានសមត្ថកិច្ចរបស់លោកឃាត់ខ្លួនកាលពីល្ងាចថ្ងៃទី ១ ឧសភា ក្រោយពីទទួលសេចក្តីរាយការណ៍ពីអ្នកភូមិ។ «ជនសង្ស័យមិនបានរត់គេចខ្លួនទៅណាទេ ប៉ុន្តែជននេះហាក់មិនព្រមសារភាពទេ»។
លោកបានរំឭកតាមសម្តីអ្នកភូមិថា រវាងជនសង្ស័យ និងក្មេងស្រីរងគ្រោះ ជាមនុស្សរស់នៅក្នុងភូមិជាមួយគ្នា រីឯម្តាយឪពុកក្មេងរងគ្រោះក៏គ្មានទំនាស់អ្វីនឹងគ្នាដែរ។
លោកបន្តថា មុនពេលកើតហេតុ ក្មេងរងគ្រោះត្រូវបានជនសង្ស័យល្បួងឱ្យលុយនៅផ្ទះរបស់នាង ហើយក៏បានចាប់រំលោភតែម្តង។ ប៉ុន្តែនៅពេលនាំខ្លួនមកដល់ប៉ុស្តិ៍នគរបាលឃុំជនសង្ស័យរូបនេះ បានបដិសេធថា មិនបានចាប់រំលោភនោះទេ៕
