.jpg)
ជនសង្ស័យពាក់ព័ន្ធគ្រឿងញៀនពេលសមត្ថកិច្ចឃាត់ខ្លួនបាន។ អាវុធហត្ថខេត្ត
ព្រៃវែង: សមត្ថកិច្ចអាវុធហត្ថខេត្តព្រៃវែងគ្រោងបញ្ជូនមនុស្សប្រុស-ស្រី ៦ នាក់ទៅសាលាដំបូងខេត្តបន្ទាប់ពីឃាត់ខ្លួនកាលពីថ្ងៃទី ១៤ ខែមករា នៅភូមិព្រៃអាស្ទាំង ឃុំអង្គររាជ្យ ស្រុកព្រះស្ដេច ពាក់ព័ន្ធករណីជួញដូរ និងប្រើប្រាស់គ្រឿងញៀន។ នេះបើតាមលោក ផាត់ សុជោត ប្រធានមន្ទីរយុត្តិធម៌នៃកងរាជអាវុធហត្ថខេត្តព្រៃវែង។
លោក ផាត់ សុជោត បានបញ្ជាក់ថា មន្ត្រីជំនាញបានសាកសួរជនសង្ស័យទាំង ៦ នាក់ រួចរាល់ហើយ ពាក់ព័ន្ធករណីជួញដូរ និងប្រើប្រាស់គ្រឿងញៀនប្រភេទម្សៅក្រាមពណ៌ស ចំនួន ៥៤ កញ្ចប់តូច ក្នុងនោះមាន ១ កញ្ចប់ធំ ហើយកំពុងកសាងសំណុំរឿងបញ្ជូនទៅសាលាដំបូងខេត្តព្រៃវែងដើម្បីចាត់ការតាមនីតិវិធី។
លោកបន្តថា ក្រោមបញ្ជាផ្ទាល់ លោក ឈួន គឹមសាន មេបញ្ជាការកងរាជអាវុធហត្ថខេត្តព្រៃវែង កម្លាំងកងរាជអាវុធហត្ថខេត្តសហការជាមួយសមត្ថកិច្ចមូលដ្ឋាននិងកងរាជអាវុធហត្ថស្រុកព្រះស្តេចដឹកនាំដោយរូបលោកផ្ទាល់បានចុះអនុវត្តនិងបង្ក្រាបបទល្មើសរក្សាទុក ជួញដូរ និងប្រើប្រាស់គ្រឿងញៀននៅចំណុចទីតាំងភូមិឃុំខាងលើ។
លោក សុជោត បានបញ្ជាក់ថា៖ «យើងសាកសួរពួកគាត់រួចហើយ ព្រោះយើងទើបឃាត់ខ្លួនពួកគាត់យប់ម្សិលម្ង៉ៃ ប៉ុន្ដែឥឡូវនេះ យើងកំពុងកសាងសំណុំរឿង ហើយយើងគ្រោងបញ្ជូនទៅតុលាការនៅថ្ងៃនេះ ឬថ្ងៃស្អែក ព្រោះយើងបញ្ជូននៅថ្ងៃទី ១៥ នេះអត់ទាន់ទេ»។
តាមរបាយការណ៍របស់មន្ទីរយុត្តិធម៌នៃកងរាជអាវុធហត្ថខេត្តព្រៃវែងបានបង្ហាញកាលពីថ្ងៃម្សិលមិញថា បន្ទាប់ពីមានសេចក្ដីរាយការណ៍ពីពលរដ្ឋ សមត្ថកិច្ចផ្នែកកងរាជអាវុធហត្ថ បានឃាត់ខ្លួនជនសង្ស័យ ៦ នាក់ ក្នុងនោះឈ្មោះ ជិន សុខុម ហៅ ទីទី ភេទស្រី អាយុ ៣៥ ឆ្នាំ រស់នៅភូមិព្រៃអាស្ទាំង ឃុំអង្គររាជ្យ, ឈ្មោះ ម៉ៅ កុសល ភេទប្រុស អាយុ ១៨ ឆ្នាំនៅភូមិអំពិល ឃុំបន្ទាយចក្រី, ឈ្មោះ ផន សុផាន់ ភេទប្រុស អាយុ ១៧ ឆ្នាំ នៅភូមិស្វាយចារ ឃុំអង្គររាជ្យ, ឈ្មោះ ឆេម សំនោ ភេទប្រុស អាយុ ១៧ ឆ្នាំ នៅភូមិស្វាយក្ដៀប ឃុំល្វា, ឈ្មោះ ភិន ខាវ ភេទប្រុស អាយុ ១៧ ឆ្នាំ ភូមិក្រសាំងទង ឃុំអង្គររាជ្យ និងឈ្មោះ ខៃ ម៉ៅ ភេទប្រុស អាយុ ២២ ឆ្នាំនៅភូមិព្រៃអាស្ទាំង ឃុំអង្គររាជ្យ អ្នកទាំង ៦ នាក់ រស់នៅក្នុងស្រុកព្រះស្ដេច ខេត្តព្រៃវែងជាមួយគ្នា។
របាយការណ៍បង្ហាញដែរថា វត្ថុតាងដែលសមត្ថកិច្ចរឹបអូសបានរួមមាន៖ ម្សៅក្រាមពណ៌ស ៥៤ កញ្ចាប់ (ធំ ១ កញ្ចប់ តូច ៥៣ កញ្ចប់), ទូរស័ព្ទដៃ ៤ គ្រឿង, ជញ្ជីងថ្លឹងថ្នាំ ២ គ្រឿង, ឧបករណ៍សម្រាប់ជក់ ២ សម្រាប់, ថង់សម្រាប់ច្រកថ្នាំ ១ ចំនួន,ដែកកេះ ២០, សៀវភៅបញ្ជី ២ ក្បាល, កន្រៃ្ត ១ និងម៉ូតូ ១ គ្រឿង៕
