The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ឃាត់​ខ្លួន​កម្មករ​​ ឈូសឆាយ​ដី​ព្រៃ ៣ នាក់

សមត្ថកិច្ច​ឃាត់​ខ្លួន​កម្មករ​​ ឈូសឆាយ​ដី​ព្រៃ ៣ នាក់

Content image - Phnom Penh Post
គ្រឿងចក្រ​ និង​កម្មករ​ឈូសឆាយ​ដីព្រៃ​ដែល​ត្រូវ​បាន​ឃាត់​ខ្លួន​កាលពី​ម្សិលមិញ។ រូបថត សហការី

សមត្ថកិច្ច​ឃាត់​ខ្លួន​កម្មករ​​ ឈូសឆាយ​ដី​ព្រៃ ៣ នាក់

កំពង់ធំៈ កម្មករ​ស៊ីឈ្នួល​ឈូសឆាយ​ដី ៣ នាក់​ត្រូវ​បាន​សមត្ថកិច្ច​ចាប់​ឃាត់​ខ្លួន​កាលពី​ម្សិលមិញ ខណៈ​ដែល​ពួកគេ​កំពុង​បញ្ជា​គ្រឿងចក្រ​ធ្វើការ​ឈូសឆាយ​ទន្រ្ទាន​យក​ដី​ព្រៃ​រដ្ឋ​ចំនួន ៤៦ ហិកតា​ស្ថិត​នៅ​ក្នុង​ភូមិ​ត្រពាំងកកោះ ឃុំ​បឹងល្វា ស្រុក​សន្ទុក​ដែល​ស្ថិត​នៅ​ជាប់​នឹង​ព្រៃឡង់ ខណៈ​ដែល​បទល្មើស​ព្រៃឈើ​នៅ​ក្នុង​តំបន់​នោះ​ក៏​កំពុង​តែ​កើតឡើង​យ៉ាង​ពេញ​បន្ទុក​ផង​ដែរ។

លោក តឹប ញាតា នាយ​ខណ្ឌ​រដ្ឋបាល​ព្រៃឈើ​ខេត្ត​កំពង់ធំ​បាន​ឲ្យ​ដឹង​កាលពី​ម្សិលមិញ​ថា​មនុស្ស​បី​នាក់​ត្រូវ​បាន​ចាប់​ខ្លួន និង​គ្រឿងចក្រ ចំនួន ២ គ្រឿង​ត្រូវ​បាន​រឹបអូស ខណៈ​ដែល​ពួកគេ​កំពុង​ធ្វើការ​ឈូសឆាយ​ទន្ទ្រាន​ដី​រដ្ឋ​នៅ​តំបន់​ត្រពាំង​កកោះ​ដោយ​ខុស​ច្បាប់។

លោក​និយាយ​ថា៖ «ពួកគេ​ជា​អ្នក​ស៊ីឈ្នួល​គេ យើង​នឹង​ស្រាវជ្រាវ​បន្ត​រក​មេខ្លោង​ដែល​បាន​ឈូសឆាយ និង​ដុត​ហ៊ុមព័ទ្ធ​ព្រៃឈើ​ដោយ​ខុស​ច្បាប់»។ ជនសង្ស័យ​ទាំង​បី​នាក់​មាន​ឈ្មោះ យ៉ាត ពិសី, សែម រុំ និង ឃិន សុភ័ក្រ្ត ខណៈ​ដែល​ពួកគេ​កំពុង​ឈូសឆាយ​ដី។

បើ​តាម​របាយការណ៍​របស់​ក្រសួង​កសិកម្ម​ចេញ​កាលពី​ម្សិលមិញ​បាន​ឲ្យ​ដឹង​ថា​ត្រាក់ទ័រ ១ គ្រឿង​ត្រូវ​ចាប់​បាន​នៅ​ចំណុច UTM (៥៧៥៦៨៥-១៤០០១២០) ឃាត់​មនុស្ស​បាន​ចំនួន ២ នាក់​ដោយ​ផ្ទៃដី​ដែល​រង​ការ​កាប់​រាន​ដុត​ឈូសឆាយ​ហ៊ុម​ព័ទ្ធ​ធ្វើ​ជា​កម្មសិទ្ធិ​ទំហំ ៣០,៦៤០ ហិកតា។ ត្រាក់ទ័រ ១ គ្រឿង​ទៀត​បាន​ចាប់​នៅ​ចំណុច UTM (៥៧៤៥៧២-១៤០១២១៩) និង​ឃាត់​ខ្លួន​មនុស្ស​ម្នាក់​ដោយ​ដី​ព្រៃ​រង​ការ​កាប់​រាន​ចំនួន ៦,៨៣ អា។

បច្ចុប្បន្ន​វត្ថុតាង និង​មនុស្ស​ត្រូវ​បាន​សមត្ថកិច្ច​យក​ទៅ​រក្សា​ទុក​នៅ​ផ្នែក​រដ្ឋបាល ព្រៃឈើ​កំពង់ថ្ម​ដើម្បី​ចងក្រង​សំណុំ​រឿង​បញ្ជូន​ទៅ​កាន់​តុលាការ។

លោក លេង សេងប៊ុនធឿន ជា​សកម្មជន​ការពារ​ព្រៃឡង់​បាន​ឲ្យ​ដឹង​ថា​ដី​ព្រៃ​នៅ​តំបន់​ត្រពាំង​កកោះ​គឺ​ជាប់​នឹង​តំបន់​ព្រៃឡង់​ដែល​នៅ​ពេល​នេះ​កំពុង​ទទួល​រង​នូវ​ការ​កាប់​យក​ឈើ និង​ការ​កាប់​រាន​យក​ដី។

លោក​និយាយ​ថា៖ «ដី​ព្រៃ​នៅ​តំបន់​ត្រពាំង​កកោះ​គឺ​ស្ថិត​នៅ​ក្រោម​ការ​គ្រប់គ្រង​របស់​រដ្ឋបាល​ព្រៃឈឺ។ ភាគច្រើន​បទល្មើស​គឺ​កាប់​ព្រៃឈើ​កើត​ឡើង​ច្រើន​ជាង​ការ​ទន្រ្ទាន​យក​ដី»។

កាលពី​ខែ​ធ្នូ​ឆ្នាំ ២០១៦ អាជ្ញាធរ​ខេត្ត​កំពត​ក៏​បាន​ព្រមាន​ពលរដ្ឋ​ចំនួន ១០០ គ្រួសារ​ដែល​បាន​ចូល​ទៅ​កាប់​ទន្រ្ទាន​យក​ដី​ព្រៃ​រដ្ឋ​ធ្វើ​ជា​កម្មសិទិ្ធ​ស្ថិត​នៅ​ឧទ្យាន​ជាតិ​បូកគោ​ផង​ដែរ​ហើយ​រហូត​មក​ដល់​ពេល​នេះ ប្រជាពលរដ្ឋ​ហាក់បី​ដូចជា​មិន​ហ៊ាន​ទៅ​កាប់​រាន ឬ​កាន់កាប់​ដីព្រៃ​នៅ​តំបន់​នោះ​ទៀត​ទេ៕

អត្ថបទគួរចាប់អារម្មណ៍