.jpg)
សមត្ថកិច្ចជំនាញកំពុងធ្វើការវិភាគ នៅទីតាំងរកឃើញសាកសព។ រូបថត CPU
កំពង់ចាមៈ បន្ទាប់ពីធ្វើការស្រាវជ្រាវ អស់រយៈពេល ៣ ថ្ងៃ ក្រុមមន្ត្រីជំនាញ ការិយាល័យព្រហ្មទណ្ឌកម្រិតធ្ងន់នៃ ស្នងការដ្ឋាននគរបាលខេត្តកំពង់ចាម និងមន្ត្រីជំនាញមកពីអង្គភាពការពារកុមារបានចាប់ឃាត់ខ្លួនបុរសម្នាក់ យកទៅសាកសួរជុំវិញករណីឃាតកម្មសម្លាប់ដោយកាត់ក្បាល ស្ដ្រីនិងចៅស្រីនៅភូមិ-ឃុំថ្មពូន ស្រុកព្រៃឈរ កាលពីថ្ងៃទី ៣ ខែ មេសា ឆ្នាំ ២០១៩។
លោក ហេង វុទ្ធី ស្នងការរងខេត្តកំពង់ចាមទទួលបន្ទុកផ្នែកព្រហ្មទណ្ឌកម្រិតធ្ងន់ បានឲ្យដឹងកាលពីម្សិលមិញថា បុរសដែលត្រូវបានចាប់ឃាត់ខ្លួនជុំវិញអំពើឃាតកម្មខាងលើនេះឈ្មោះ ស៊ឹម ខេង អាយុ ៥៥ ឆ្នាំ ជាប្រជាពលរដ្ឋ នៅភូមិត្រពាំងបឹង ឃុំថ្មពូន និងមានព្រំចម្ការជាប់គ្នាជាមួយជនរងគ្រោះ។
លោក វុទ្ធី បញ្ជាក់ថា៖ «ថ្វីបើចម្លើយមួយចំនួន វាមានភាពស៊ីចង្វាក់គ្នាទៅនឹងអង្គហេតុដែលអាចឲ្យយើងដាក់បន្ទុកលើជនសង្ស័យខាងលើនេះបាន ប៉ុន្តែយើងចាំបាច់ត្រូវធ្វើការស្រាវជ្រាវបន្តឲ្យបានច្បាស់លាស់ ព្រោះជនសង្ស័យបានបដិសេធអំពីការសម្លាប់ជនរងគ្រោះ ខណៈក្បាលជនរងគ្រោះទាំង ២ រហូតមកទល់ពេលនេះ មិនទាន់រកឃើញនៅឡើយ»។
កាលពីរសៀលថ្ងៃទី ៣ ខែមេសា ឆ្នាំ ២០១៩ មានករណីឃាតកម្មដ៏រន្ធត់មួយកើតឡើង ដោយជនរងគ្រោះជាស្ត្រីឈ្មោះ ពូ អូន អាយុ ៦៥ ឆ្នាំ និងចៅស្រីរបស់គាត់ឈ្មោះ ខេង សាវឿន អាយុ ៦ ឆ្នាំ ត្រូវបានឃាតករមិនស្គាល់អត្តសញ្ញាណ សម្លាប់ដោយកាត់ក្បាលទាំង ២ នាក់ នៅក្នុងព្រៃ ១ កន្លែង ដែលមានចម្ងាយប្រមាណ ៣៥០ ម៉ែត្រនៅភាគខាងត្បូងផ្ទះជនរងគ្រោះ នៅភូមិ-ឃុំថ្មពូន។
លោក លឹម ឡុង នាយប៉ុស្តិ៍ឃុំថ្មពូន ថ្លែងថា នៅរសៀលថ្ងៃកើតហេតុក្រោយពីរកឃើញសពជនរងគ្រោះទាំង ២ នោះសមត្ថកិច្ចបានរកឃើញក្រមា ១ ប្រឡាក់ពេញដោយឈាមនៅជាប់ព្រំចម្ការចេករបស់ជនសង្ស័យឈ្មោះ ស៊ឹម ខេង ដែលមានព្រំប្រទល់ក្បែរគ្នានឹងចម្ការស្វាយចន្ទីរបស់ជនរងគ្រោះ។
លោក ឡុង ថា នៅល្ងាចថ្ងៃនោះក្រុមមន្ត្រីនគរបាលជំនាញមកពីថ្នាក់ខេត្តរួមសហការជាមួយមន្ត្រីជំនាញមកពីអង្គភាពការពារកុមារ (Child Protection Unite) បានចុះស្រាវជ្រាវ និងសាកសួរក្នុងជំហានបឋម ហើយបានរកឃើញថា ក្រមាដែលប្រឡាក់ឈាមនោះ ជារបស់ ស៊ឹម ខេង។ លោកបន្តថា៖ «នៅល្ងាចថ្ងៃនោះ លោក ស៊ឹម ខេង និងប្រពន្ធកូនរបស់គាត់បានទទួលស្គាល់ថា ក្រមាដែលប្រឡាក់ដោយឈាមនោះ ជារបស់គាត់ ប៉ុន្តែគាត់បានបដិសេធថា គាត់មិនបានសម្លាប់ជនរងគ្រោះទាំង ២ នោះទេ។ យ៉ាងណាក៏ដោយគាត់ គឺជាជនដែលជាប់សង្ស័យជាងគេក្នុងអំពើឃាតកម្មនេះ»។
បើតាមលោក ឡុង ក្នុងរយៈពេល ៣ ថ្ងៃកន្លងមក រូបលោក និងមន្ត្រីនគរបាល រួមទាំងប្រជាការពារទាំងអស់នៅក្នុងឃុំថ្មពូន និងក្រុមគ្រួសារសាច់ញាតិជនរងគ្រោះបាននាំគ្នារុករកនៅតាមគុម្ពចេក គុម្ពឫស្សី ចម្ការស្វាយចន្ទី គំនរអុស ស្រះទឹក អណ្ដូងទឹក ប៉ុន្តែនៅមិនឃើញក្បាលរបស់សពជនរងគ្រោះយាយ និងចៅទាំង ២ នោះទេ។
លោក សួន វិច អាយុ ៣៤ ឆ្នាំ ជាឪពុកកុមារីរងគ្រោះ និងជាកូនប្រសាស្ត្រីរងគ្រោះបានប្រាប់ភ្នំពេញប៉ុស្តិ៍ថា កាលពីល្ងាចថ្ងៃសៅរ៍ ឈ្មោះ ស៊ឹម ខេង ត្រូវបានកម្លាំងនគរបាលចាប់ឃាត់ខ្លួនយកទៅសាកសួរ បន្ទាប់ពីគាត់និងប្រពន្ធកូនគាត់ទទួលស្គាល់ថា ក្រមាដែលប្រឡាក់ដោយឈាមដែលត្រូវបានរកឃើញនៅក្បែរកន្លែងកើតហេតុនោះជារបស់គាត់។
លោក វិច និយាយថា៖ «មកទល់ពេលនេះ ខ្ញុំមិនទាន់ដឹងច្បាស់ថា គាត់[ខេង] ជាឃាតករសម្លាប់ម្ដាយក្មេក និងកូនស្រីខ្ញុំឬមួយយ៉ាងណាទេ ព្រោះថា គាត់បានបដិសេធថា មិនបានសម្លាប់ទេ»។
បើតាមលោក វិច ជនសង្ស័យក្នុងសំណុំរឿងឃាតកម្មនេះអាចនឹងមានគ្នា ២ នាក់ ព្រោះតាមចម្លើយរបស់ ឈ្មោះ ស៊ឹម ខេង មុនពេលសមត្ថកិច្ចនាំយកទៅសាកសួរបន្តនៅស្នងការខេត្តកំពង់ចាម បានឆ្លើយថា ក្រមានោះ ត្រូវបានបុរសម្នាក់ឈ្មោះ ហុង ដែលមានខ្ទមចាំចម្ការនៅក្បែរនោះខ្ចីយកទៅផ្លាស់ងូតទឹក កាលពីយប់ថ្ងៃទី ២ ខែ មេសា ឆ្នាំ ២០១៩។ លោកថា បុរសឈ្មោះ ហុង ក៏ត្រូវបានសមត្ថកិច្ចឃាត់ខ្លួនផងដែរពាក់ព័ន្ធករណីប្រើប្រាស់គ្រឿងញៀន។
យ៉ាងណាក្តីក្រុមសមត្ថកិច្ច កំពុងបន្តនីតិវិធីស្រាវជ្រាវ ក្នុងករណីឃាតកម្មនេះយ៉ាងសកម្ម ដើម្បីស្វែងរកឃាតករពិត មកផ្ដន្ទាទោសតាមផ្លូវច្បាប់៕
