.jpg)
បុរស ២ នាក់ ត្រូវបានសមត្ថកិច្ចធ្វើការអប់រំហើយដោះលែងវិញ ករណីរកស៊ីថតចម្លងសន្លឹកប័ណ្ណចាក់វ៉ាក់សាំងកូវីដ ១៩។ រូបថត កងរាជអាវុធហត្ថរាជធានីភ្នំពេញ
ភ្នំពេញ៖ បុរស ២ នាក់ ដែលកម្លាំងអាវុធហត្ថខណ្ឌមានជ័យឃាត់ខ្លួនកាលពីថ្ងៃទី ៤ ឧសភា ពាក់ព័ន្ធរកស៊ីថតចម្លងសន្លឹកប័ណ្ណចាក់វ៉ាក់ស៊ាំងរបស់កងយុទ្ធពលខេរភូមិន្ទលក់ឱ្យពលរដ្ឋត្រូវសមត្ថកិច្ចអាវុធហត្ថខណ្ឌមានជ័យអប់រំ និងឱ្យធ្វើកិច្ចសន្យា បន្ទាប់ឃាត់ខ្លួនបានប៉ុន្មានម៉ោង។
លោក ហែម ឫទ្ធី មេបញ្ជាការកងរាជអាវុធហត្ថខណ្ឌមានជ័យប្រាប់ ភ្នំពេញ ប៉ុស្តិ៍ នៅរសៀលថ្ងៃទី ៥ ឧសភាថា បុរសទាំង ២ នាក់ ឈ្មោះ ស៊ុន ចាន់ថា អាយុ ៣៨ ឆ្នាំ រស់នៅសង្កាត់ស្ទឹងមានជ័យ ១ និងឈ្មោះ ចាយ វ៉ារិន រស់នៅសង្កាត់ស្ទឹងមានជ័យ ៣ ក្នុងខណ្ឌមានជ័យ រាជធានីភ្នំពេញ។
លោកថ្លែងប្រាប់ថា៖ «ពួកគាត់យើងបានដោះលែងវិញហើយ។ យើងឱ្យពួកគាត់ធ្វើកិច្ចសន្យា ហើយអប់រំគាត់។ ពួកគាត់សារភាពថា ធ្វើបែបនេះមិនដឹងថា ខុសច្បាប់ទេ»។ លោកបញ្ជាក់ប្រាប់ថា ពួកគាត់បានរៀបរាប់ប្រាប់សមត្ថកិច្ចថា សន្លឹកប័ណ្ណដែលថតចម្លងនោះ ក្នុង ១ សន្លឹកប័ណ្ណមានតម្លៃពី ១ ពាន់រៀល ទៅ ២ ពាន់រៀល ហើយក្នុង ១ ច្បាប់មាន ២ សន្លឹក។ ប័ណ្ណនេះ គឺប្រើសម្រាប់យកទៅបង្ហាញគ្រូពេទ្យនៅមណ្ឌលចាក់វ៉ាក់សាំង ព្រោះបើគ្មានប័ណ្ណបង្ហាញគ្រូពេទ្យ គឺគ្រូពេទ្យមិនចាក់ឱ្យទេ។
លោកបន្តថា មុនឃាត់ខ្លួនបុរសទាំង ២ នាក់នោះ មានបុរស ២ នាក់ និងស្រ្តីម្នាក់បានកាន់សន្លឹកប័ណ្ណនេះទៅបង្ហាញដល់គ្រូពេទ្យចាក់វ៉ាក់សាំងនៅសាលាបឋមសិក្សាស្ទឹងមានជ័យ វេលាម៉ោងជាង ១០ ព្រឹក ថ្ងៃទី ៤ ឧសភា។ ពេលនោះ គ្រូពេទ្យបានពិនិត្យមើលប័ណ្ណចាក់វ៉ាក់សាំងនោះឃើញថា ក្លែងក្លាយ ក៏ប្តឹងសមត្ថកិច្ចអាវុធហត្ថរហូតស្រាវជ្រាវឃាត់ខ្លួនពួកគេនៅថ្ងៃទី ៤ ឧសភាតែម្តង។
លោកប្រាប់ថា ករណីនេះ លោកក៏អំពាវនាវឱ្យពលរដ្ឋដែលមានបំណងចាក់វ៉ាក់សាំងការពារជំងឺកូវីដ ១៩ គឺពលរដ្ឋត្រូវទៅស្នើសុំប័ណ្ណចាក់វ៉ាក់សាំងពីលោកប្រធានភូមិនៅតាមតំបន់រស់នៅនីមួយៗរបស់បងប្អូន។ ព្រោះប័ណ្ណនោះ គឺជាប័ណ្ណត្រឹមត្រូវទៅតាមផ្លូវច្បាប់ បើក្រៅពីនោះ គឺពុំមែនជាប័ណ្ណត្រឹមត្រូវឡើយ ៕
