ស្ទឹងត្រែង/មណ្ឌលគិរីៈ អ្នកភូមិចំនួន ៤ នាក់ គោយន្ត ៦ គ្រឿង និងឈើជាង ១ ម៉ែត្រគុប ត្រូវបានមន្ត្រីបរិស្ថាន និងរដ្ឋបាលព្រៃឈើបង្ក្រាបចាប់ក្នុងអំឡុងពេលនៃការចុះល្បាតរយៈពេល ៣ ថ្ងៃ ក្នុងតំបន់ដែនជម្រកសត្វព្រៃ ព្រៃឡង់ក្នុងភូមិសាស្ត្រខេត្តស្ទឹងត្រែង និងនៅសង្កាត់សុខដុម ក្រុងសែនមនោរម្យ ខេត្តមណ្ឌលគិរី។
លោក នួន ពិសី អនុប្រធានដែនជម្រកសត្វព្រៃ ព្រៃឡង់ នៃមន្ទីរបរិស្ថានខេត្តស្ទឹងត្រែងបានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែមីនាថា នៅថ្ងៃដំបូងនៃប្រតិបត្តិការរយៈពេល ៣ ថ្ងៃ គឺចាប់ពីថ្ងៃទី ១៧ ដល់ថ្ងៃទី ១៩ ខែ មីនា ឆ្នាំ ២០២១ នៃការចុះល្បាតស្រាវជ្រាវ និងបង្ក្រាបបទល្មើសព្រៃឈើ និង សត្វព្រៃក្នុងតំបន់ដែនជម្រកសត្វព្រៃ ព្រៃឡង់ ក្រុមការងាររបស់លោកបានឃាត់ខ្លួនពលរដ្ឋ ៤ នាក់ ខណៈពួកគេកំពុងព្យាយាមបើកគោយន្តចំនួន ២ គ្រឿង ចូលទៅរកកាប់ឈើក្នុងដែនជម្រកសត្វព្រៃព្រៃឡង់ក្នុងភូមិសាស្ត្រស្រុកថាឡាបរិវ៉ាត់ ខេត្តស្ទឹងត្រែង។
ពលរដ្ឋដែលត្រូវបានឃាត់ខ្លួនទាំង ៤ នាក់ មានលំនៅក្នុងភូមិក្រូច ឃុំ-ស្រុកត្រពាំងប្រាសាទ ខេត្តឧត្តរមានជ័យក្នុងនោះមានម្នាក់ជាស្ត្រី ឈ្មោះ ហូន ជិន អាយុ ៥៣ ឆ្នាំ។ ចំណែកបុរស ៣ នាក់ទៀត រួមមាន ឈិត វ៉េន អាយុ ៥៨ ឆ្នាំ, ឈិត ហេង អាយុ ៦៩ ឆ្នាំ, សាន ឡុល អាយុ ៣១ ឆ្នាំ។
លោកបញ្ជាក់ថា៖ «ដោយសារពួកគាត់នៅមិនទាន់បានប្រព្រឹត្តបទល្មើសក្រុមការងារយើងក៏បានធ្វើការអប់រំណែនាំ និងតម្រូវឲ្យធ្វើកិច្ចសន្យាបញ្ឈប់សកម្មភាព បើកគោយន្តលុកចូល ឬឆ្លងកាត់តាមក្នុងព្រៃនៃតំបន់ដែនជម្រក ដោយគ្មានការអនុញ្ញាត ហើយពួកគាត់ក៏បានយល់ព្រម និងត្រឡប់ក្រោយវិញតាមការណែនាំរបស់មន្ត្រីយើង»។
បើតាមលោក ពិសី នៅថ្ងៃទី ១៨ មីនាក្រុមការងាររបស់លោកបានប្រទះឃើញគោយន្តចំនួន ៤ គ្រឿងផ្សេងទៀត ដែលត្រូវបានគេចតទុកចោលនៅក្នុងព្រៃ ក្នុងចំណុចភូមិសាស្ត្រអូរត្នោតដែលជាព្រំប្រទល់នៃស្រុកថាឡាបរិវ៉ាត់ និង ស្រុកសៀមបូក។
លុះដល់ថ្ងៃទី ១៩ មីនា ក្រុមការងារក៏បានប្រទះឃើញទីតាំងកាត់ដើមឈើ ១ កន្លែង ដែលក្រុមជនល្មើសទើបលួចកាត់ផ្ដួលរំលំនាពេលថ្មីៗដែលទីតាំងនោះស្ថិតនៅចំណុចអូរភ្ជុលព្រំប្រទល់ភាគខាងជើងនៃស្រុកថាឡាបរិវ៉ាត់ និង ស្រុកសៀមបូក។ លោកថ្លែងថា៖ «នៅទីនោះ ក្រុមការងារយើងបានរកឃើញ និងរឹបអូសរណារយន្ត ១ គ្រឿង និង ស្នាតេះ ១ ដើម ព្រមទាំងដើមឈើប្រភេទដួងចែម ១ ដើមដែលមានទំហំមុខកាត់ ០,៦ ម៉ែត្រ និងប្រវែង ៦ ម៉ែត្រ»។
បើតាមលោក ពិសី វត្ថុតាង រួមមានគោយន្ត ៤ គ្រឿងរណារយន្ត ១ គ្រឿង និងស្នាតេះ ១ គ្រឿង ដែលត្រូវបានគេចតទុកចោលក្នុងព្រៃ និងដើមឈើប្រភេទដួងចែម ១ ដើមនោះត្រូវបានក្រុមការងាររបស់លោក នាំយកទៅរក្សាទុកជាបណ្ដោះអាសន្ននៅស្នាក់ការបរិស្ថានទួលត្បែង ស្ថិតក្នុងឃុំសៀមបូក ស្រុកសៀមបូក ខេត្តស្ទឹងត្រែង ដើម្បីស្រាវជ្រាវបន្តតាមនីតិវិធីច្បាប់។
ដោយឡែកនៅឯខេត្តមណ្ឌលគិរី កម្លាំងសង្កាត់រដ្ឋបាលព្រៃឈើសែនមនោរម្យនៅរសៀលថ្ងៃ ២១ ខែមីនា ឆ្នាំ ២០២១ បានចុះប្រមូលរឹបអូសឈើស្រឡៅដែលត្រូវបានគេដាក់ឡាំង ៤ ជ្រុងចំនួន ៧ កំណាត់ក្នុង ១ កំណាត់មានមុខកាត់ ០,៤ ម៉ែត្រ និងមានប្រវែង ៥ ម៉ែត្រនៅដីស្រែមួយកន្លែងក្នុងសង្កាត់សុខដុម ក្រុងសែនមនោរម្យ បន្ទាប់ពីអ្នកភូមិបានរាយការណ៍ថា មានគេដឹកយកមកលាក់ទុក ដើម្បីនាំចេញទៅលក់នៅប្រទេសវៀតណាម។ នេះបើតាមលោក សុខ សារួន នាយសង្កាត់រដ្ឋបាលព្រៃឈើសែនមនោរម្យពីម្សិលមិញ។
លោកថ្លែងថា៖ «ឈើទាំងនោះជាឈើអញ្ញាតជនមានចំនួនសរុប ១,៤ ម៉ែត្រគុប។ នៅពេលនេះក្រុមការងារយើងបានដឹកវាយកមករក្សាទុកនៅទីស្នាក់ការរដ្ឋបាលព្រៃឈើសែនមនោរម្យ ដើម្បីរៀបចំសំណុំរឿងដាក់បញ្ចូលជាសម្បត្តិរដ្ឋ»។
ក្រុមបណ្ដាញសហគមន៍ព្រៃឡង់ប្រចាំខេត្តស្ទឹងត្រែង កញ្ញា ឈាង លី បានថ្លែងថា បច្ចុប្បន្នបទល្មើសព្រៃឈើ និងការបរបាញ់សត្វព្រៃនៅតែបន្តកើតមាន ប៉ុន្តែជនប្រព្រឹត្តបទល្មើសភាគច្រើននៅតែមិនទាន់ត្រូវបានចាប់ឃាត់ខ្លួនបាននៅឡើយ បើទោះជាមានភ័ស្ដុតាងគ្រប់គ្រាន់យ៉ាងណាក៏ដោយ។
កញ្ញា បន្តថា៖ «កាលពីមុន ក្រុមបណ្ដាញសហគមន៍ព្រៃឡង់យើងបានរកឃើញបទល្មើសព្រៃឈើជាច្រើនកើតមាននៅក្នុងតំបន់ដែនជម្រកសត្វព្រៃព្រៃឡង់។ ប៉ុន្តែរបាយការណ៍របស់ពួកយើងត្រូវបានអាជ្ញាធរច្រានចោល បើទោះបីជាយើងបានបង្ហាញភ័ស្តុតាងគ្រប់គ្រាន់ពីទីតាំងដែលកើតមានបទល្មើស និងក្រុមមនុស្សដែលចូលទៅប្រព្រឹត្តបទល្មើសនោះក៏ដោយ។ មិនតែប៉ុណ្ណោះ អាជ្ញាធរពិសេសខាងមន្ត្រីឧទ្យានុរក្សបានហាមឃាត់ពួកយើងមិនឲ្យចុះល្បាតព្រៃទេ»៕