.jpg)
សមត្ថកិច្ចជំនាញខេត្តកំពង់ធំបានចុះបង្ក្រាបទីតាំងរោងសន្និធិ (កន្លែងស្តុក) ឈើចំនួន ១១ ទីតាំង ដោយរឹបអូសឈើសរុបចំនួនជាង ១៥០ ម៉ែត្រគុប នៅក្នុងឃុំកំពង់ចិនត្បូង និងឃុំសំព្រោជ ស្រុកស្ទោង។ រូបថត GRK News
កំពង់ធំ: សមត្ថកិច្ចជំនាញខេត្តកំពង់ធំបានចុះបង្ក្រាបទីតាំងរោងសន្និធិ (កន្លែងស្តុក) ឈើចំនួន ១១ ទីតាំង ដោយរឹបអូសឈើសរុបចំនួនជាង ១៥០ ម៉ែត្រគុប នៅក្នុងឃុំកំពង់ចិនត្បូង និងឃុំសំព្រោជ ស្រុកស្ទោង ដោយកន្លែងស្តុកឈើទាំងនោះខ្លះមានច្បាប់ត្រឹមត្រូវ ប៉ុន្ដែហួសសុពលភាព និងខ្លះទៀត គ្មានច្បាប់អនុញ្ញាតក្នុងការធ្វើអាជីវកម្មឈើ។
របាយការណ៍លើទំព័រហ្វេសប៊ុកកងរាជអាវុធហត្ថលើផ្ទៃប្រទេស (GRK News) បានឲ្យដឹងពីម្សិលមិញថា កម្លាំងកងរាជអាវុធហត្ថស្រុកស្ទោង និងកម្លាំងកងរាជអាវុធហត្ថខេត្តកំពង់ធំនៅថ្ងៃទី ៣០ ខែឧសភា ដឹកនាំដោយលោក ឃុន ប៊ុនហូ មេបញ្ជាការរងកងរាជអាវុហត្ថខេត្តកំពង់ធំ សហការជាមួយខណ្ឌរដ្ឋបាលព្រៃឈើខេត្តកំពង់ធំ ដែលដឹកនាំបញ្ជាផ្ទាល់ដោយលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំបានចុះបង្ក្រាបទីតាំងរោងសន្និធិ ឈើគ្មានច្បាប់អនុញ្ញាតចំនួន ១១ ទីតាំង នៅភូមិកំពង់ក្តី ភូមិកំពង់ចិន ភូមិឈើទាល ស្ថិតនៅឃុំកំពង់ចិនត្បូង និងភូមិអំពិល ឃុំសំព្រោជ ស្រុកស្ទោង។
របាយការណ៍បន្តថា ជាលទ្ធផល សមត្ថកិច្ចបានត្រួតពិនិត្យទីតាំងរបស់ឈ្មោះ ប៊ាន លាន ភេទប្រុសរស់នៅភូមិកំពង់ក្តី ឃុំកំពង់ចិនត្បូងចំនួន ៤ កន្លែង រឹបអូសឈើស្មើនឹងជាង ៧៧ ម៉ែត្រគុប។ ទីតាំងរបស់ឈ្មោះ ហ៊ី គឹមហេង ភេទប្រុសរស់នៅភូមិកំពង់ចិន ឃុំកំពង់ចិនត្បូងចំនួន ៣ កន្លែងស្មើនឹងជាង ៣៤ ម៉ែត្រគុប។
របាយការណ៍បន្តថា ទីតាំងរបស់ឈ្មោះ ឈន បានហុក ភេទប្រុស រស់នៅភូមិកំពង់ក្តី ឃុំកំពង់ចិនត្បូងមាន ១ កន្លែង ស្មើនឹងជាង ២៥ ម៉ែត្រគុប។ ទីតាំងរបស់ឈ្មោះ តាន់ ប៉ូទី ភេទប្រុសរស់នៅភូមិកំពង់ក្តី ឃុំកំពង់ចិនត្បូង ១ កន្លែង ស្មើនឹងជាង ៧ ម៉ែត្រគុប ទីតាំងឈ្មោះ ស៊ឹង សុដា ភេទស្រី រស់នៅភូមិកំពង់ក្តី ឃុំកំពង់ចិនត្បូង ១ កន្លែង ស្មើនឹងជាង ៤ ម៉ែត្រគុប និងទីតាំងរបស់ម្ចាស់ឈ្មោះ ឃាង មុន្នី ភេទប្រុសរស់នៅភូមិអំពិល ឃុំសំព្រោជ ១ កន្លែងស្មើនឹងជាង ៤ ម៉ែត្រគុប។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំថ្លែងពីម្សិលមិញថា សមត្ថកិច្ចជំនាញនៃខណ្ឌរដ្ឋបាលព្រៃឈើខេត្តបានចុះបង្ក្រាបទីតាំងរោងសន្និធិឈើនៅក្នុងស្រុកស្ទោង ដោយរឹបអូសឈើចំនួនជាង ១៥០ ម៉ែត្រគុប។ ម្ចាស់ដេប៉ូឈើទាំងនេះមានមួយចំនួន មានច្បាប់ត្រឹមត្រូវ ប៉ុន្ដែអាជ្ញាប័ណ្ឌរបស់គាត់ហួសសុពលភាព ហើយខ្លះទៀតគ្មានច្បាប់តែម្ដង។
លោកបន្តថា ម្ចាស់ដេប៉ូដែលមានច្បាប់ត្រឹមត្រូវ ប៉ុន្ដែហួសសុពលភាពត្រូវតែមកសុំបន្តសុពលភាពអាជ្ញាប័ណ្ឌបន្តទៀត ប្រសិនក្នុងករណីពួកគាត់ចង់បន្តអាជីវកម្មទៀត។ បើមិនដូច្នេះអាជ្ញាធរនឹងបិទអាជីវកម្មទាំងនោះ។
លោក វណ្ណរិទ្ធ បានបញ្ជាក់ថា៖ «ខ្ញុំមិនទាន់ដឹងពីចំណាត់ការទៅលើម្ចាស់ដេប៉ូដែលគ្មានច្បាប់នោះបន្តទៀតយ៉ាងណាទេ ដោយរង់ចាំមន្ត្រីជំនាញកំពុងធ្វើការស្រាវជ្រាវឲ្យបានច្បាស់លាស់សិនថា តើត្រូវពិន័យគាត់ ឬបញ្ឈប់អាជីវកម្មគាត់ទាំងស្រុង ព្រោះសមត្ថកិច្ចយើងកំពុងធ្វើការវាស់វែងឈើ និងធ្វើកំណត់ហេតុផ្សេងៗបន្ថែមទៀត»។
លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ មិនអាចសុំការបញ្ជាក់បន្ថែមជុំវិញករណីនេះបានទេកាលពីម្សិលមិញ ដោយលោកបានចុចផ្ដាច់ទូរស័ព្ទ។ រីឯលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំក៏មិនអាចទាក់ទងបានដែរដោយទូរស័ព្ទលោកគ្មានអ្នកទទួល។
ភ្នំពេញប៉ុស្តិ៍មិនអាចស្វែងរកប្រភពទាក់ទងម្ចាស់ដេប៉ូឈើទាំង ១១ ទីតាំងនេះ ដើម្បីបញ្ជាក់ជុំវិញករណីនេះបានទេ។
លោក ម៉ុល វណ្ណា នាយសង្កាត់រដ្ឋបាលព្រៃឈើ ស្រុកស្ទោងត្រូវបានសារព័ត៌មានក្នុងស្រុកមួយដកស្រង់សម្ដីពីម្សិលមិញថា ដេប៉ូអត់ច្បាប់ចំនួន ១១ កន្លែង ដែលផ្ទុកឈើសរុបជាង ១៥០ ម៉ែត្រគុប សុទ្ធតែជាប្រភេទឈើមានតម្លៃ ដោយសមត្ថកិច្ចកំពុងដឹកជញ្ជូនឈើចេញពីដេប៉ូទាំងអស់នោះ ដើម្បីយកទៅរក្សាទុកនៅសង្កាត់រដ្ឋបាលព្រៃឈើស្រុកស្ទោងបណ្ដោះអាសន្នសិន៕
