ភ្នំពេញៈ សមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃកាលពីម្សិលមិញបានចាប់ខ្លួនជនសង្ស័យម្នាក់ ខណៈបុរសរូបនេះកំពុងឡើងជិះរថយន្តឈ្នួលនៅសង្កាត់-ខណ្ឌព្រែកព្នៅបម្រុងគេចខ្លួនទៅស្រុកកំណើតនៅខេត្តរតនគិរី ក្រោយពីបានរំលោភសម្លាប់ក្មេងស្រីអាយុ ១៤ ឆ្នាំម្នាក់ក្នុងបន្ទប់ជួល នៅខណ្ឌពោធិ៍សែនជ័យ រាជធានីភ្នំពេញកាលពីថ្ងៃអង្គារ។
លោក ជាវ វិបុល អនុប្រធាននាយកដ្ឋានព្រហ្មទណ្ឌបានប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យរូបនេះឈ្មោះ ឡាច ចន្ថា អាយុ ២៥ ឆ្នាំ ស្នាក់នៅផ្ទះជួលក្រុម ២ ភូមិជ្រៃកោង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ និងមានស្រុកកំណើតនៅខេត្តរតនគិរី។
បើតាមលោក វិបុល កាលពីរសៀលថ្ងៃអង្គារ (១ កញ្ញា) មានអំពើឃាតកម្មមួយបានកើតឡើងលើក្មេងស្រីអាយុ ១៤ ឆ្នាំម្នាក់ ឈ្មោះ ពេញ ស្រីពេជ្រ ស្នាក់នៅបន្ទប់ផ្ទះជួល ១ កន្លែងក្នុងភូមិជ្រៃកោង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។
លោកថា៖ «សពយុវតីរងគ្រោះត្រូវបានក្រុមគ្រួសារសាច់ញាតិប្រទះឃើញក្នុងសភាពអាក្រាតកាយ និងមានស្នាមអារផ្ដាច់បំពង់ក»។
លោក វិបុល បានបន្តថា ក្រោយធ្វើកោសល្យវិច័យ មន្ត្រីនគរបាលជំនាញបានសន្និដ្ឋានថា នេះជា «អំពើឃាតកម្មរំលោភសម្លាប់»។ មុនចាប់ខ្លួននគរបាលជំនាញនៃនាយកដ្ឋានព្រហ្មទណ្ឌក្រសួងមហាផ្ទៃបានសហការជាមួយកម្លាំងស្នងការដ្ឋាននគរបាលរាជធានីភ្នំពេញ ខេត្តកណ្ដាល និងខេត្តកំពង់ស្ពឺបានចុះស្រាវជ្រាវរហូតកំណត់អត្តសញ្ញាណ និងចាប់ខ្លួនជនសង្ស័យបាននៅចំណុចក្រោមស្ពានលីយ៉ុងផាត់ ក្នុងភូមិកណ្ដាល សង្កាត់-ខណ្ឌព្រែកព្នៅ រាជធានីភ្នំពេញ នាព្រឹកថ្ងៃពុធ ខណៈជនសង្ស័យកំពុងឡើងជិះរថយន្តឈ្នួលបម្រុងគេចខ្លួនទៅស្រុកកំណើតនៅខេត្តរតនគិរី។
លោកបានថ្លែងថា៖ «តាមចម្លើយសារភាពរបស់ជនសង្ស័យនៅមុនពេលរំលោភសម្លាប់យុវតីរងគ្រោះនេះ រូបគេបានផឹកស្រាសក្រឡុកលាយទឹកក្រូច និងថ្នាំញៀនប្រភេទ Ecstasy។
លុះពេលស្រវឹងដើរកាត់បន្ទប់ជួលបានឃើញក្មេងស្រីរងគ្រោះនៅក្នុងបន្ទប់ម្នាក់ឯង ក៏ចូលទៅចាប់នាងរំលោភរហូតបានសម្រេច រួចក៏យកកូនកាំបិតចុងស្រួច អារ ក សម្លាប់ក្មេងស្រីរងគ្រោះដើម្បីបំបិទមាត់»។
លោក វិបុល បានឲ្យដឹងទៀតថា ក្រោយស្ដាប់ចម្លើយរួច មន្ត្រីជំនាញបានធ្វើតេស្តទឹកនោមជនសង្ស័យឃើញ «មានផ្ទុកសារធាតុញៀន»។ បច្ចុប្បន្នជនសង្ស័យកំពុងត្រូវបានមន្ត្រីជំនាញបន្តសួរចម្លើយដើម្បីប្រមូលភ័ស្ដុតាងបន្ថែម និងកំពុងរៀបចំឲ្យជនសង្ស័យធ្វើត្រាប់សកម្មភាពដែលបានប្រព្រឹត្តទៅលើយុវតីរងគ្រោះ ដើម្បីជាប្រយោជន៍ក្នុងការកសាងសំណុំរឿងនៃបទល្មើស បញ្ជូនទៅតុលាការចាត់វិធានការតាមនីតិវិធីច្បាប់។
ជុំវិញករណីឃាតកម្មដ៏ឃោរឃៅនេះ អ្នកស្រី ចាន់ ស្រីមុំ អាយុ ៤៥ ឆ្នាំ ត្រូវជាម្ដាយក្មេងរងគ្រោះបានប្រាប់ភ្នំពេញប៉ុស្តិ៍ថា ពេលនេះអ្នកស្រីកំពុងរៀបចំពិធីបុណ្យសពឲ្យកូនស្រីជាទីស្រឡាញ់នៅក្នុងទីតាំងភូមិកើតហេតុខាងលើ។ អ្នកស្រីបានបញ្ជាក់ថា៖ «ខ្ញុំសូមឲ្យសមត្ថកិច្ចចាប់ជនសង្ស័យឲ្យទៅតុលាការ ធ្វើការផ្ដន្ទាទោសដាក់ពន្ធនាគារអស់ ១ ជីវិត»៕