ភ្នំពេញៈ ក្នុងទិសដៅរឹតបន្តឹងសន្តិសុខ និងទប់ស្កាត់សកម្មភាពចោរឆក់ ប្លន់ ក្នុងរាជធានីសមត្ថកិច្ចបានចាប់ផ្តើមបំពាក់កាមេរ៉ាសុវត្ថិភាពតាមបណ្តាភ្លើងស្តុបមហាវិថីសំខាន់ៗចំនួន ២០ ទីតាំងស្របពេលដែលសង្គមស៊ីវិលជំរុញឲ្យរដ្ឋាភិបាលដាក់បញ្ចូលនូវការផាកពិន័យចំពោះអ្នករួមដំណើរជាកុមារដែលមិនពាក់មួកសុវត្ថិភាពដើម្បីចូលរួមគោរព និងកាត់បន្ថយគ្រោះថ្នាក់ចរាចរណ៍។
តាមគេហទំព័ររបស់អគ្គស្នងការនគរបាលជាតិ ការបំពាក់កាមេរ៉េសុវត្ថិភាពធ្វើឡើងក្រោមកិច្ចសហការជាមួយក្រសួងសន្តិសុខសាធារណៈចិន។
លោក សោម ធារិទ្ធ នាយការិយាល័យទូរស័ព្ទនៃនាយកដ្ឋានវិទ្យុទាក់ទងអគ្គស្នងការដ្ឋាននគរបាលជាតិក្រសួងមហាផ្ទៃដែលដឹកនាំកម្លាំងចុះប្រតិបត្តិការនេះបានឲ្យដឹងថាវិធានការនេះមានសារៈសំខាន់ក្នុងការទប់ស្កាត់បទល្មើស លួច ឆក់ ប្លន់ ក៏ដូចជាករណីគ្រោះថ្នាក់ចរាចរណ៍ និងការមិនគោរពច្បាប់ចរាចរណ៍។
លោកបញ្ជាក់ថា៖ «អ្នកដំណើរទូទៅបំពានស្លាកសញ្ញា ភ្លើងស្តុបហើយសមត្ថកិច្ចនឹងធ្វើការផាកពិន័យទៅតាមភ័ស្តុតាងជាក់ស្តែងដែលមានជាប់នៅក្នុងកាមេរ៉ាសុវត្ថិភាព»។
ប្រធាននាយកដ្ឋានសណ្តាប់ធ្នាប់នៃអគ្គស្នងការដ្ឋាននគរបាលជាតិ លោក រុន រ័ត្នវាសនា បានឲ្យដឹងថាក្នុងកិច្ចការងារនេះការិយាល័យកណ្តាលមួយត្រូវបានបង្កើតឡើងក្នុងអគ្គស្នងការនគរបាលជាតិដែលជាទីតាំងនៃកន្លែងផ្ទុកឧបករណ៍ និងទូរស័ព្ទតាមដានសកម្មភាពនានាដែលថតបានដោយកាមេរ៉ាសុវត្ថិភាពទាំងនោះ។
លោកថា៖ «ខាងយើង (នាយកដ្ឋានសណ្តាប់ធ្នាប់) គឺរង់ចាំសហការក្នុងករណីបញ្ជូនព័ត៌មានពីការកកស្ទះចរាចរណ៍ឧបទ្ទវហេតុកន្លែងស្តុបណា ឬបទល្មើសនានា គឺខាងយើងនឹងបញ្ជូនកម្លាំងចុះទៅភ្លាមៗដើម្បីសម្រួលក៏ដូចជាបង្ក្រាបនូវបទល្មើស»។
តាមគម្រោងភ្លើងស្តុបសំខាន់ៗលើដងវិថីដែលនឹងត្រូវបំពាក់កាមេរ៉ាសុវត្ថិភាពសរុបមានចំនួន ២០ គោលដៅធំៗរួមមានស្តុបច្រមុះជ្រូកក្បាលថ្នល់ស្តុបក្រសួងមហាផ្ទៃស្តុបចំការមន ស្តុបបូកគោ ស្តុបពេទ្យចិន ស្តុបទូតអាល្លឺម៉ង់ ស្តុបផ្សារអូរឫស្សី ស្តុបផ្សារថ្មី ស្តុបសួនកាណាឌីយ៉ា ស្តុបសណ្ឋាគារណានជីង ស្តុបដេអិន ស្តុបវិទ្យាល័យសន្ធរម៉ុក ស្តុបទេពផន ស្តុបម៉ុងឌីយ៉ាល់ ស្តុបផ្សារដើមគ ស្តុបអាងទឹកអូឡាំពិក ស្តុបនាងគង្ហីង ស្តុបផ្សារដេប៉ូស្តុបអូឡាំពិក និងស្តុបច្បារអំពៅ។
ក្នុងវេទិកាថ្នាក់និពន្ធនាយកសារព័ត៌មានស្តីពី “រួមគ្នាជំរុញការពាក់មួកសុវត្ថិភាពនៅកម្ពុជា” ដែលធ្វើឡើងកាលពីម្សិលមិញនេះដែរនៅសណ្ឋាគារអាំងទែរកុងទីណង់តាល់លោក គឹម បញ្ញា នាយកអង្គការមូលនិធិបង្ការរបួសអាស៊ីបានថ្លែងថាច្បាប់ស្តីពីចរាចរណ៍ផ្លូវគោកថ្មីដែលបង្កើតឡើងកាលពីខែមករាបានតម្រូវឲ្យមនុស្សពេញវ័យកំពុងបើកបរពាក់មួយសុវត្ថិភាព ប៉ុន្តែអ្នករួមដំណើរជាមួយជាកុមារគឺមិនមានពាក់មួកសុវត្ថិភាពទេ។
លោកបានស្នើដល់រាជរដ្ឋាភិបាលពង្រឹងច្បាប់ និងចាត់វិធានការចាំបាច់បន្ថែមទៀតជាពិសេសបញ្ចូលការដាក់ពិន័យចំពោះអ្នករួមដំណើរជាកុមារដើម្បីជួយសង្គ្រោះជីវិតប្រជាពលរដ្ឋពីគ្រោះថ្នាក់ចរាចរណ៍។
លោកថា៖ «កុមារជាអនាគតនៃប្រទេសជាតិរបស់យើង គាត់ជាធនធានដ៏មានសក្តានុពលក្នុងការចូលរួមអភិវឌ្ឍជាតិយើង អ៊ីចឹងកុមារដែលជាជនរងគ្រោះមួយរូបដែរនោះចាំបាច់ទាមទារឲ្យមានការរឹតបន្តឹងការអនុវត្តច្បាប់ដើម្បីជំរុញឲ្យមានការពាក់មួកសុវត្ថិភាព»។
ក្នុងវេទិកានោះដែរអ្នកនាំពាក្យរាជរដ្ឋាភិបាល និងជារដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានថ្លែងថាបើទោះបីជាសមត្ថកិច្ចបានដាក់កាមេរ៉ាសុវត្ថិភាពនៅតាមភ្លើងស្តុបមួយចំនួនក៏ដោយ ប៉ុន្តែលោកស្នើឲ្យមានការរៀបចំជារូបភាពពន្យល់ពីគ្រោះថ្នាក់ចរាចរណ៍បែបវិទ្យាសាស្ត្រពាក់ព័ន្ធនឹងផលអាក្រក់កើតចេញពីគ្រោះថ្នាក់ចរាចរណ៍បន្ថែមទៀតដើម្បីផ្សព្វផ្សាយដល់ប្រជាពលរដ្ឋ និងបង្កើនការពាក់មួកសុវត្ថិភាព។
លោកថា៖ «ធ្វើបែបនេះនឹងមានផលច្រើន បើយើងអាចរៀបចំជារូបភាពពន្យល់ជាវិទ្យាសាស្ត្រថាការបុកគ្នាវាយ៉ាងម៉េចហើយក្រឡាប់ទៅគ្រោះថ្នាក់យ៉ាងម៉េចដាច់ក ហូរឈាមអីទៅ ដើម្បីទាញអារម្មណ៍មនុស្សឲ្យយល់ដាក់រូបភាពអ៊ីចឹងទៅបានគាត់ខ្លាច»។
យោងតាមរបាយការណ៍ប្រចាំឆ្នាំ ២០១៤ របស់ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកកម្ពុជាបានឲ្យដឹងថាជនរងគ្រោះដោយសារគ្រោះថ្នាក់ចរាចរណ៍សរុបមានចំនួន ១៥៣១៥ នាក់ ក្នុងនោះបាត់បង់ជីវិត ២២២៦ នាក់ និងរងរបួសធ្ងន់ ៦០០៥ នាក់ គិតជាមធ្យមចំនួនអ្នកស្លាប់ ៦ នាក់ និងរបួស ១៧ នាក់ក្នុងមួយថ្ងៃ។
ក្នុងនោះ ៩៥ ភាគរយនៃគ្រោះថ្នាក់ចរាចរណ៍បង្កដោយកត្តាមនុស្សដែលរួមមានការបើកបរហួសល្បឿនកំណត់ បើកបរក្រោមឥទ្ធិពលគ្រឿងស្រវឹងហើយ ៦៩ ភាគរយនៃអ្នកស្លាប់គឺដោយសារមិនពាក់មួកសុវត្ថិភាព។ ចំណែកការសិក្សារបស់អ្នកឯកទេសជាតិអន្តរជាតិ បានរកឃើញថាគ្រោះថ្នាក់ចរាចរណ៍បានធ្វើឲ្យប្រទេសកម្ពុជាមានការខាតបង់សេដ្ឋកិច្ចជាតិរហូតដល់ជាង ៣០០ លានដុល្លារឯណោះក្នុងមួយឆ្នាំ៕
